El liriu esnaló per primer vez esti añu n’Illas.

El I Abiertu d’Illas de Liriu disputóse la mañana del domingu con un éxtiu de participación gracies a la rempuesta de los equipos CNL, que s’aconceyaron dempués del tornéu pa decidir les nueves normes del sistema de xuegu y de puntuación del Campionatu d’Asturies de Liriu.

Imaxe del tarrén de xuegu, con Toño (Sidrones) y Xuacu (Espor[a])
atendiendo'l güelpe de Luisa (Asturlirio).

24 machorradores escomencipiaron l’abiertu ensin esmolecer pol fríu d’una mañana ñublada y de vientu. Esti aire, amás de les condiciones pindies de la pista de xuegu, fizo que los xugadores alcordaren la posibilidá de parar el liriu cola machorra dempués de los güelpes de rigor, pa evitar que marchare peles llindes del tarrén. Asina, pudieron vese unes cuentaes carreres bien prestoses que foron coreaes pol públicu.

Mar y Aarón, xugadores de los Sidrones y la Camaretá de Liriu de Noreña,

los dos nuevos equipos de la temporada.

Utilizóse’l sistema de xuegu propuestu dende Espor[a] pa homologar los abiertos CNL, de cara al Campionatu d’Asturies de Liriu Individual qu’escomienza esti añu al empar que’l Campionatu por equipos. Consiste nel establecimientu d’un sistema d’eliminatories unificáu, con 4 rondes y un máximu de 21 carreres, ensin contar los desempates, que consigue axilizar los torneos tanto na dinámica como nel tiempu. Esti I Abiertu d’Illas malpenes superó la hora de duración.

Daniel, el más xoven del tornéu, esperando'l machorrazu
de salida del campión del abiertu, Carlos d'Espor[a].

Ente ida y venida a la mesa d’almacenamientu de los productos isotónicos (bollos preñaos, empanada y sidre), les diferentes eliminatories foron desendolcándose, hasta que solo quedaron los cuatro semifinalistas. Na primer eliminatoria, Sergio (Espor[a]) impúsose en dos carreres a Javier (Asturlirio). Na segunda, el duelu ente otros dos miembros de Espor d’Asturies, Xuacu y Carlos, acabó col triunfu del segundu por dos carreres ganaes y un empate. La final monocolor decantóse pal lláu del avilesín Carlos, que venció na segunda carrera, mientres que Sergio nun pudo algamar denguna victoria. D’esta miente, atopaba el club carbayón los tres primeros puestos del abiertu.


Fináu’l tornéu, dióse pasu, a pie de pista, al conceyu estipuláu n’Avilés va un mes, pa tomar les decisiones terminantes pal proceder de la temporada 2010. Asina, aprobáronse les siguientes propuestes:

PUNTUACIÓN DE LES CARRERES

P’acortar la duración de los alcuentros, víase el CNL na necesidá d’atopar un sistema de puntuación nes carreres que axilizara la dinámica del xuegu respeutu a la del añu caberu. Alcordose la siguiente forma:

. Puntuarán los tres primeros xugadores: 3, 2 y 1 puntu respeutivamente.

. En casu d’empate, otórguense los mesmos a tolos xugadores empataos per enriba, dexando llibre el/los siguientes puestos.

. Establezse en 3 el númberu de rondes posteriores a que’l primer xugador encastre el so liriu.

. Otórgase 1 puntu extra al equipu del xugador qu’algame un encastráu (introducir el liriu del primer güelpe).

Asina, les posibles combinaciones son les siguientes (ensin contar los puntos por encastráu):

1 ganador: 3,0,0,0,0.

1 ganador y 1 segundu: 3,2,0,0,0.

1 ganador, 1 segundu y 1 terceru: 3,2,1,0,0.

1 ganador, 1 segundu y 2 terceros: 3,2,1,1,0.

1 ganador, 1 segundu y 3 terceros: 3,2,1,1,1.

1 ganador y 2 segundos: 3,2,2,0,0.

1 ganador y 3 segundos: 3,2,2,2,0.

1 ganador y 4 segundos: 3,2,2,2,2.

2 ganadores: 3,3,0,0,0

2 ganadores y 1 terceru: 3,3,1,0,0.

2 ganadores y 2 terceros: 3,3,1,1,0.

2 ganadores y 3 terceros: 3,3,1,1,1.

3 ganadores: 3,3,3,0,0.

4 ganadores: 3,3,3,3,0.

5 ganadores: 3,3,3,3,3.

PUNTUACIÓN DE LA XORNADA
Aplícase el sistema competitivu del añu anterior, obteniendo el equipu ganador n+1 puntos, el segundu n-1, el terceru n-2, el cuartu n-3 y el quintu n-4, siendo n el númerbu d’equipos de la competición. Ye dicir, valorarase en 6 puntos la victoria y 4, 3, 2 y 1 puntos los otros puestos.
En casu d’incomparecencia d’un equipu, llevará cero puntos.

NÚMBERU MÍNIMU DE XUGADORES POR EQUIPU
Establecióse como 4 el númberu mínimu de xugadores por equipu nuna xornada pa que esti puea participar na mesma.

El siguiente alcuentru CNL va ser la primer xornada del Campionatu d’Asturies de Liriu, qu’arrancará embaxo la organización del club Espor d’Asturies na cabera fin de selmana d’esti mesmu mes de marzu.