18 mar. 2012

El poder del metal

Nesta mañana de domingu, púnxose a esnalar la nueva temporada de liriu. Fueron pocos los asistentes al xuegu, escasamente ocho participantes, pero suficientes como pa falar del futuru del CNL, aldericar sobre delles propuestes de camudamientu y, sobre too, pa pasalo bien xugando al liriu.

Propuestes

Yera necesariu un cambeu na dinámica del xuegu, en cuantes a la normativa del sistema competitivu del Campionatu d'Asturies por equipos. Nun daba más de sí l'anterior, pesie al rigor o, quicias, precisamente por eso: el sistema de fiches foi inoperante, les inscripciones yeren mui complexes y la diferencia d'intervenciones por xugador, dependiendo del númberu de participantes por cada equipu y de los turnos de participación, fizo que'l xuegu fuera llentu, que s'estremare abondo ente una carrera y la siguiente del mesmu xugador, que solo tuvieren nel partíu el voceru y dalgún xugador que compitiera con un equipu con pocos representantes y, finalmente, lo más triste, que la xente dexara de vinir a xugar porque'l so equipu taba en cuadru.

Dende Espor[a] propunxéronse esta mañana dos midíes p'axilizar esti sistema competitivu: la partida por equipos siguiendo'l modelu d'abiertu y la puntuación pal Campionatu.
  • Pola primera, cada equipu va poder participar col númberu de xugadores que-y paezca oportunu. Los xugadores queden repartíos n'eliminatories mediante un sortéu tuteláu (pa evitar mayoríes de xugadores d'un equipu en cada eliminatoria). Nunca se fadrán más de cinco eliminatories, pasando a la ronda final cinco xugadores (los cinco primeros de cada grupu, si hai más de 25 participantes, o los primeros y les siguientes meyores puntuaciones -con una carrera de desempate si ye necesario-, si hai menos de cinco grupos. Cada grupu xugará cinco carreres, calteniéndose les puntuaciones del añu anterior (2 puntus pal que primero encastre y pa tolos qu'encastren na mesma ronda; 1 puntu pal que lo faiga na siguiente; 0 pal restu). La ronda final disputarase tamién a cinco carreres.
  • En cuantes a la puntuación del Campionatu d'Asturies, sumaránse los puntos algamaos por tolos xugadores del equipu que tengan participao nel eventu. L'equipu que más puntos individuales consiga llevará n+1 puntu (siendo "n" el númberu d'equipos participantes esi día); el restu n-1, n-2, n-3, etc.). La puntuación individual dependerá de la clasificiación al final del eventu (el primeru lleva 20; el segundu, 17; el terceru, 14; el cuartu, 12; el quintu, 10; los segundos de grupu, 7; los terceros de grupu, 4; los cuartos de grupu, 2; y el restu, 1 puntu), más de los encastraos qu'algame cada xugador (que sumen cinco puntos). Estos puntos sirvirán pa contabilizar la clasificación del Campionatu d'Asturies Individual.

Estes dos midíes presenten delles ventayes:
  • Caltiénse'l másimu de 30 carreres (5 por grupu eliminatoriu más 5 pola fase final), salvo que se dean empates. Amás, adáptase al númberu de xugadores, polo que nun han disputase munches carreres si son pocos y, sobre too, permite que la emoción del xuegu llegue hasta'l final, ensin que dengún equipu se destaque na primera posición o se descuelgue nes caberes.
  • Evítase penalizar a la xente que vaya a participar, porque permite que puntúen y estimula pa que nun queden en casa si-yos abulta que del so equipu nun son bastantes.
  • Nun se perxudica a los equipos más populosos, porque tienen más posibilidaes de puntuar cuantos más seyan.
  • Y el sistema d'inscripción ye más cenciellu, reproduciéndose'l de los abiertos (salvo pola novedá de la tutoría pa nun acumular machorradores d'un mesmu equipu nuna eliminatoria).

Embaxo estes propuestes se xugó'l primer abiertu del añu n'El Llano, que nun contó entovía pal Campionatu d'Asturies por equipos, pero sí pal Individual.

El xuegu.

Nun hebo muncha discursión en cuantes a les propuestes y pasóse pronto a xugar. Primero, los concursos téunicos, que dalgunos descubríen por primer vez porque, pesia a que ya taben recoyíos l'añu anterior, solamente nuna ocasión se ficieron, con motivu del II Abiertu Xixón de Liriu. El sistema competitivu nuevu, al reducir el tiempu de xuegu al abiertu na más, permite ufiertar tamién estos concursos que, como la primer vez, prestaron a la xente.

El concursu de distancia llevólu Toño (con 11 puntos na final y 20 na clasificación), de los Sidrones, que ganó na final a Arturo (con 9 y 20 tamién), de Quirinal.

Arturo y Toño, colos diplomes de ganadores del Concursu de distancia.

El concursu d'encastraos foi pa Pepa, d'Espora, qu'escomenzaba asina, ensin dulda, la meyor xornada pa de so. Consiguió encastrar los seis lirios nun tiempu récord de 26,90 segundos, desbancando al so compañeru d'equipu Sergio, qu'acababa de faer 29,67.

Una vez pasáu'l calentamientu, escomenzó'l III Abiertu de Liriu d'El Llano, con ocho xugadores, distribuyíos en dos grupos de cuatro (diben pasar los dos primeros y el meyor terceru a la final).

Nel Grupu 1, taben Sergio y Pepa (Espora), Marisa (Asturliriu), y Marcos (Quirinal), nueva incorporación al mundu'l liriu de la mano d'Arturo. Sergio algamó la participación na final garrando los primeros seis puntos de les tres primeres carreres (quedaría con 7) y Pepa, Marisa y Marcos llegaron con posibilidaes de clasificase segundos a la última carrera, con 2, 1 y 1 puntu, respeutivamente. Marisa foi la primera n'encastrar y Pepa, na siguiente ronda, empataba con ella a 3 puntos nel segundu puestu. Faltaba la carrera del otru grupu pa saber si yera necesariu un desempate o si dambes pasaben.

Porque nel Grupu 2 la cosa tuvo más reñida. Luis (Espora) garró ventaya coles victories nes dos primeres carreres y pasó a la final colos dos puntos de la cuarta; Arturo (Quirinal) empató con Luis na primera y plantóse na última carrera con 3 puntos; pela so parte, Toño (Sidrones), taba con dos. Martínez yá nun tenía posibilidaes, con 0 puntos, asina que si Toño y Arturo puntuaben (el primeru con 2 y el segundu colo que fuera) pasaben a la siguiente ronda, dexando fuera a la que perdiera'l desempate ente Pepa y Marisa. Pero nun pasó ná d'eso: Arturo consiguió los dos puntos y naide más puntuó, quedando Toño y Martínez fuera de la final.

Martínez, d'Asturlirio.

Y na primer carrera d'esta fase, llegó'l machorrazu de la xornada: nel últimu turnu de la primera ronda, Pepa soltó un güelpe precisu que mandó al liriu drechu al castru. ¡Encastráu! Tol mundu corrió a felicitala, porque sabe lo difícil que ye abocar de salida. El casu ye que los cuatro saques anteriores fueren de los piores de la xornada, malpenes pasando Arturo del centru del campu. Amás del subidón, garraba los primeros dos puntos de la final, en solitario, y cinco extras pa la clasificación individual.

La segunda carrera llevóla Arturo con muncha facilidá en dos güelpes, puntuando en solitariu. La tercera, tuvo más repartida, ganando Luis los dos puntos, pero repartiéndose Marisa y Sergio el tantéu de la siguiente ronda. En la cuarta, ganaba Sergio en tres güelpes y, quedando los demás a cero, poníase en primer puestu.

Asina se llegaba a la cabera carrera, con posibilidaes de triunfu pa toos: Sergio, con 3 puntos; Pepa, Arturo y Luis, con 2; y Marisa, con 1. Y volvió a salir "el poder del metal", porque Pepa, que tamién respuende al nomatu de "La Jevi" pola so pasión a esi tipu de música, averó'l so liriu al castru al segundu güelpe; Sergio taba un pocu más p'atrás, pero con opciones d'encastrar tamién; el restu, esmolecíos coles sos males salíes, alcontrábense más lloñe. Pepa encastró al tercer machorrazu y llevó los dos puntos. Sergio tenía dos oportunidaes: una pa ganar y otra pa empatar na puntuación de la final; pero nun fue quien, quedando a cero, como los demás compañeros. ¡Y ganó Pepa! (Pol tercer puestu desempataron Luis y Arturo, ganando'l primeru)

Luis, Pepa y Sergio, d'Espora, colos diplomes de primeros clasificaos del abiertu.

La siguiente.

Espor d'Asturies yá se punxo en marcha pa organizar el siguiente eventu, dientro de quince díes, enantes del escomienzu de la Selmana Santa.

Queden dalgunos flecos por falar, como la cantidá d'equipos que tienen a bien participar nesta temporada de liriu o los xugadores qu'habrá en caún. Tamién cuando se pondrá en marcha el IV Campionatu d'Asturies de Liriu y si la participación sedrá mayor pa nuevos eventos. Pero yá tan saliendo dalgunes ufiertes pa llevar al CNL lloñe del centru'l país y nun se tienen que desaprovechar. Sobre too porque, anque seyamos mui pocos, esto préstamos abondo.


15 mar. 2012

¡Afayáivos!

Dizlo bien nidio'l cartel:
El sábadu 17 ye San Patriciu, pero vamos reservamos un pocu porque...
nos somos más de trasgos, sidra y
LIRIU LARIU.

¡AFAYÁIVOS!


11 mar. 2012

III Abiertu de Liriu d'El Llano


Escomienza la Temporada 2012

Dempués del parón de los caberos meses del añu 2011, onde la xente'l liriu solo s'aconceyó pa la Copa Cantábrica escontra Galicia, volvemos a ponemos en marcha con enerxíes anovaes. Fueron abondes les piticiones de volver a xugar y paecía que naide se decidía a ponese a la xera d'organizar un eventu y entamar l'actividá d'esta nueva temporada.

Y ye que les últimes xornaes del Campionatu del añu pasáu, con una baxa participación, y un balance mui negativu en cuantes a les capacidaes organizatives del
CNL (fracasu del sistema de fiches, desaniciu del llabor Pro-FALA...), fizo que les prioridaes de los participantes camudaren a otros intereses, abandonándose l'enfotu organizador d'otros años. Incluso esti blogue cayó nel desusu.

Toes estes torgues han ser falaes, puestes en común pa valorar los diferentes puntos de vista y evaluaes pa presentar propuestes que camuden la dinámica negativa que ta viviendo'l xuegu. Si los oxetivos d'otros años yeren algamar un mayor númberu d'eventos y de participantes que sofitaren el llabor de recuperación del xuegu'l liriu, los d'esta temporada han ser de reiniciu y de cambeu organizativu y normativu pa faer más afayaiza la práutica del xuegu a la xente que yá ta averada al mesmu. Ye'l momentu de saber si el
CNL ye un proyeutu viable o non, d'atalantar con qué sofitos cuenta y, sobre too, si los propios miembros lu entienden como daqué necesario.


III Abiertu de Liriu d'El Llano

Neses alcontramos al club Espor d'Asturies y, poro, va organizar el primer eventu del añu.

El viniente
domingu 18 de marzu, dende les 12 hores, la pista del Colexu Públicu d'El Llano de Xixón va ser l'escenariu del III Abiertu de Liriu d'El Llano.

Cuadru d'honor del II Abiertu de Liriu d'El Llano/N'alcordanza (añu 2012)

Propónense tres actividaes: dos concursos téunicos, d'encastráu y distancia, y l'abiertu.

Y convidase tamién a los participantes a aldericar nun conceyu constituyente de la
Temporada 2012 (como otros años se ficiera n'Illas) sobre posibles reformes organizatives y normatives. Espor d'Asturies va proponer una serie de midíes enfotaes en solucionar les torgues que provocaron el parón del añu pasáu.


¡Pa xugar y p'aldericar, tais toos convidaos!

¡Escomenzamos otra vuelta!