28 feb 2010

Entama la temporada 2010


Dempués del parón invernal, el Conceyu Nacional de Liriu entamó les actividaes preparatories pa la organzación de la temporada 2010, con importantes novedaes.


La primer reunión d’esti añu cellebróse nel Bar Timo d’Avilés, cola presencia de los tres equipos fundadores (Asturliriu, Quirinal Liriu Sport y Espor d’Asturies), y la de dos nuevos: los Sidrones, equipu residente a medies ente Xixón y Candás y que yá acompañó al Conceyu na segunda xornada de la temporada pasada; y la Camaretá de Liriu de Noreña, surdía de la escuela de gaites de la Asociación Folklórica Musical “Villa y Condáu de Noreña”.


Con munches ganes por escomenzar por parte de toos, los representantes de los equipos decidieron formalizar un calendariu cerráu pa les xornaes del II Campionatu d’Asturies de Liriu, calteniéndoles col formatu asociáu de partíu y tornéu abiertu. Amás, decidióse creyar un Campionatu d’Asturies de Liriu Individual, que cuerrerá paralelu ente les xornaes del Campionatu por equipos y los diferentes abiertos que los equipos CNL organicen dientro d’una serie de criterios qu’índa tan por establecer.


LLegóse al alcuerdu de facer otra sesión organizadora del conceyu, a finales de febreru o principios de marzu, pa establecer los flecos del sistema d’organización, les condiciones d’homologación de los abiertos CNL, el sistema de puntuación del Capionatu Individual y los posibles cambios nel reglamentu competitivu y de les regles del xuegu que se quisieren tratar. Pa facer más afayaízu esti caberu puntu, decidióse xugar un alcuentru de liriu onde probar les innovaciones propuestes y Hevia, representante de Quirinal, ufiertóse pa organizar un abiertu nel conceyu d'Illas.


Asina que la primera cita d’esti añu va ser el I Abiertu d’Illas de Liriu, a cellebrase nes escueles de La Caizuela pela mañana del domingu 7 de marzu. Les inscripciones pa’l abiertu, a partir de les 11 hores.


¡Escomienza la temporada!