29 mar. 2010

Xornada n'El LLano

Los cinco equipos miembros del Conceyu allugáronse a les pistes del colexu d’El Llano de Xixón, la mañana d’esti domingu 28, pa disputar la primer xornada del II Campionatu d’Asturies de Liriu y el primer Abiertu d’El LLano, valederu pal Campionatu individual.

Les 11 yera la hora elexida pa escomencipiar a xugar la partida del Campionatu, tan esperada dempués de tantes conversaciones preparatories y de tantos meses d’iviernu colos lirios xelaos d’inactividá. Les instalaciones bien afayidices, el solín de la mañana de primavera y les ganes de xugar de tolos machorradores reunidos xuniéronse p’algamar una partida intensa ya emocionante hasta l’últimu momentu.

Dende les primeres carreres, el organizador del eventu, Espor d’Asturies, quiso repitir la dinámica que lu llevó a ser campión del añu pasáu y algamó más puntos que’l restu los equipos xuntos nes cinco primeres carreres. Pero l’equipu avilesín del Quirinal, capitaneáu pol magníficu xugador Xermán Viluba, foi averándose carrera tres carrera hasta que, a falta de diez pal final de la partida, alcontrábase disputando la victoria solo un puntu per embaxo. Per detrás, la Camaretá de Liriu de Noreña esfrutaba d’un cómodu tercer puestu mientres diben avezándose a la competición. Astur Liriu y Sidrones puxaben por nun acabar col puntu de la cabera plaza.

Ensin embargu, la partida dio un vuelcu espectacular que coincidió cola marcha del gallegu Xermán: Quirinal solo foi quien a consiguir dos puntos de carrera nes últimes diez carreres, atenazáu polos nervios de ver como se-y alloñaba la posibilidá de ganar la partida ante la regularidá d’Espor[a] y, sobre too, a los estraordinarios güelpes del equipu condal. Los ánimos de los gaiteros a los sos compañeros xugadores, convirtiéronse nun récord de 22 puntos nesti intre, aventayando al equipu avilesín a falta d’una carrera.

Espectación ante la penúltima carrera con Toño (Sidrones),
Aarón (Camaretá) y Enrique (Asturliriu) xugando.


Pela parte baxa, y pesie a la magnífica actuación de Toño, l’equipu de los Sidrones pagó la novatada y nun pudo superar al decanu Asturlirio.

Asina, Espor d’Asturies mantuvo la so imbatibilidá con esti nuevu formatu a cinco equipos gracies al so llabor d’equipu y a la regularidá de los sos miembros, que finaron la partida toos ente los diez primeros xugadores a nivel individual.

Ensin embargu, el xugador más granible de la xornada foi el yá citáu Xermán de Quirinal, qu’algamó’l 92% de los puntos de les nueve carreres que disputó. Toño, de los Sidrones, alcanzó’l 91% quedando en segundu puestu. Aarón, de la Camaretá de Noreña, averóse hasta’l 88% y Iyán, d’Espor[a], col so 86% completó’l poker d’ases de la xornada.

La llarga duración de la partida superó toles previsiones y fizo que’l I Abiertu d’El LLano tuviera a puntu de suspendese. Ensin embargo, la decisión de los representantes de los cuatro equipos que se mantuvieron nes pistes dio’l vistu buenu pal so escomienzu.

Dieciochu xugadores d’Espor[a], Asturliriu, Sidrones y la Camaretá, amás de dalguna atrevida independiente, pusiéron los sos lirios en xuegu, sabiendo que’l tornéu sedría valederu pal I Campionatu d’Asturies de Liriu Individual. Les rondes previes corrieron bien rápides, con enfrentamientos d’a dos y a tres machorradores, daqué estremao cola dinámica de la partida oficial. Les semifinales volvieron a teñise de verde y negro, colores d’Espor[a], con tres xugadores d’esti equipu: Carlos, Mara y Sergio. Ensin embargu, nun se repitió la final d’Illas porque surdió de Noreña la figura de la machorradora Lucía, que-y arrebató el pasu a la final a Sergio pela vía rápida y venció a Carlos nuna final muncho más trabayada. Facíase Lucía col honor de vencer el primer abiertu homologáu pol CNL, de da-y el primer títulu al so equipu recién estrenáu y, sobre too, de ser la primer muyer qu’algama un tornéu individual del Conceyu.

Ganaba Lucía 5 puntos valiosos pal Campionatu Individual. Xermán, el xugador más granible de la xornada oficial, facíase colos 10 puntos gracies al so magníficu cociente, colocándose na primera plaza de la clasificación.

Dende’l Conceyu Nacional de Liriu damos les nueses más fonderes gracies a la direición del Colexu Públicu “El LLano” y a la Asociación de Vecinos “El Fumeru” d’esti barriu xixonés, poles facilidaes prestaes pala organización d’esti eventu, amás del sofitu amosáu cola so presencia n’elli. Amás, l’agradecimientu pol apoyu alcontráu na Academia de la LLingua Asturiana, que se fizo cómplice del CNL apurriendo los lliterarios premios pa los ganadores del abiertu.

Carlos (Espor[a]), Lucía (Camaretá) y Sergio
(Espor[a]), podiu del I Abiertu d'El LLano,
colos premios apurrios dende la ALLA.

El Conceyu Nacional de Liriu dio esti domingu un importante pasu p’hacia alantre nesti proyeutu de consolidación del xuegu del liriu, al poner en marcha d’una forma efeutiva la temporada 2010 y, sobre too, porque quedó patente l’eleváu grau de compromisu de tolos sos miembros, a nivel grupal y particular.

El siguiente pasu, a mediaos d’abril en Noreña. La Camaretá de Liriu de la villa condal prométemos un magníficu día de fiesta y de liriu coincidiendo cola fiesta del Sabadiegu. ¡Ellí taremos!

22 mar. 2010

CONDICIONES D’HOMOLOGACIÓN DE LOS ABIERTOS CNL

Los abiertos CNL son aquellos torneos que permiten la participación de toes aquelles persones qu’asina lo deseen y que son organizaos por cualisquier equipu del Conceyu.
Tolos abiertos qu’acompañen les xornaes del Campionatu d’Asturies de Liriu sedrán consideraos abiertos CNL. Amás, los equipos del Conceyu Nacional de Liriu puen organizar abiertos CNL mientres cumplan estes dos premises:
  • Avisu a los equipos restantes con 15 díes d’antelación. Pa ello creyóse´l grupu de mailing cola siguiente direición:
    conceyu-nacional-de-liriu@googlegroups.com
  • Espublización nel blog del CNL d'horarios y sitiu de cellebración con 15 díes d’anticipu.

Per otru llau, establécense los siguientes criterios pa qu’estos abiertos fueren puntuables pal Campionatu d’Asturies de Liriu Individual:
  • Unificación del sistema d’eliminatories.

    Cuatro rondes (15 partides en total; 21 carreres en total, más posibles desempates): los machorradores inscritos distribuiránse por sortéu nos 8 encuentros de cuartos de final, pasando los campeones d’estos a los sos respeutivos cuartos; de cuartos de final, pasarán solo cuatro semifinalistes, ún de cada eliminatoria; la final sedrá a dos xugadores. En casu de que’l númberu de xugadores inscritos seya mui bayurosu, pue alcordase ente los representantes de los equipos CNL aumentar a una ronda más pa evitar una excesiva masificación nes carreres previes.

    Sistema progresivu de carreres:los octavos y los cuartos de final disputaránse a una carrera; la semifinal y la final, al meyor de tres.

    L'empate: Disputarase una carrera extraordinaria pa desempatar ente los implicaos. Nos octavos de final, tolos machorradores qu’empaten nel primer puestu pasarán a cuartos.
  • Usu de les plantiyes de fueyes CNL p’apuntar les inscripciones, el cuadru de xuegu y los resultaos de los abiertos.

    Incripciones: llistáu con casielles pal númberu d’orden (pal sortéu), nome y apellidu, nomatu ya equipu (pal xugador CNL) y, si ye posible, contautu (corréu llectrónicu, pa creyar un mailing futuru pa unviar semeyes del abiertu y nueves del CNL a los participantes).

    Cuadru de xuegu: onde s’apuntará’l resultáu del sortéu sigún l’orde siguiente: el primer xugador, dirá pal primer cuartu de final, el segundu, pal siguiente enfrentamientu y asina hasta’l octavu resultáu; el novenu, dirá de vueltes al primer cuartu, el décimu, al segundu... Siguiráse d’esta mena hasta que tolos machorradores inscritos tean situaos nun enfrentamientu, seya a dos, a tres o a cuatro. Equí tamién s’anotarán los enfrentamientos de cuartos y los empareyamientos de semifinales y final, los resultaos de les partides de más d’una carrera y los encastraos pañaos.

    Resultáu del abiertu: servirá pa oficializar los datos obteníos na competición y apurrirase pol equipu organizador al restu de los equipos CNL. De modelu similar a la fueya d’inscripciones, contará colos siguientes campos: númberu de clasificación; númberu d’encastraos; nome, apellíu, nomatu y equipu; contautu. Amás, tará firmada polos representantes de los equipos participantes nel abiertu.
  • Participación CNL.

    Rexistrarase la participación, como mínimo, del 60% de los equipos CNL nel abiertu, cola firma na fueya de resultaos del abiertu, por equipu, d’un xugador que disputare, al menos, una xornada del Campionatu d’Asturies de Liriu.









19 mar. 2010

Campionatu d'Asturies de Liriu Individual




SISTEMA COMPETITIVU PAL
CAMPIONATU D’ASTURIES DE LIRIU INDIVIDUAL

Puntuación nes xornaes del Campionatu d'Asturies de Liriu


-Solo disputarán los puntos individuales los xugadores que disputen 4 o más carreres nel trescursu de la xornada.

-La clasificiación individual de la xornada fadrase siguiendo’l baremu siguiente: cantidá de puntos algamaos pol machorrador ente cantidá de puntos máxima disputaos pol mesmu xugador. El cociente compararase col restu de los xugadores, siendo’l que mayor cociente tenga’l primeru na clasificación d’esa xornada.

-Valoraránse los 8 cocientes más altos cola siguiente puntuación:

Posición Puntuación
1ª 10 ptos.
2ª 8 ptos.
3ª 6 ptos.
4ª 5 ptos.
5ª 4 ptos.
6ª 3 ptos.
7ª 2 ptos.
8ª 1 ptu.


-En casu d’empate ente dos o más machorradores, toos llevarán el mesmu númberu de puntos, dexando vacantes tantes posiciones per detrás como xugadores seyan.
(Exemplu: si tres xugadores empaten pela cuarta posición, los tres llevarán 5 puntos; el siguiente xugador en nivel de cociente, llevará los 2 puntos correspondientes a la 7ª posición)

-Si’l númberu d’empataos por una mesma posición ye mayor que’l de puestos vacantes per detrás, recibirán tantos puntos como-y correspuendan a la so posición, pero’l siguiente xugador en nivel de cociente yá nun puntuará.

-Si l’empate se produz pela 8ª y cabera plaza, tolos xugadores involucraos tendrán 1 puntu.


Puntuación nos torneos abiertos


-Solo sedrán puntuables pa’l Campionatu aquellos abiertos homologaos polos criterios CNL.

-De la mesma forma que tolos machorradores apuntaos nos torneos abiertos pueden conseguir el troféu, tolos xugadores, seyan miembros d’equipos CNL o non, podrán facese colos puntos pal Campionatu Individual.

-La clasificación individual del abiertu coincidirá coles posiciones algamaes nel mesmu.

-La puntuación sedría la siguiente:

Posición Puntuación
1ª 5 ptos.
2ª 3 ptos.
3ª 2 ptos.
4ª 1 ptu.

-Pa que la puntuación seya válida, el tornéu abiertu ha organizase teniendo en cuenta qu’hai que facer dos semifinales de dos xugadores caúna.


Encastraos


-Comu premiu a los machorradores que llogren encastrar d’un güelpe el liriu, sumaráse a la so clasificación individual 1 puntu por ca xugada d’esti tipu, bien seya en xornada o n’abiertu ya independientemente de la posición final qu’algamara.


Clasificaciones

- La clasificación del Campionatu d’Asturies Individual de Liriu faise teniendo en cuenta la suma de puntos algamaos por cada xugador, sumando los puntos de les diferentes xornaes y de los abiertos, más los encastraos conseguíos.

- En casu d’empate, l’orde de circunstancies a midir va ser el siguiente:
1. Participación del xugador en xornaes y abiertos (sumando 1 puntu por cada eventu).
2. Númberu d’encastraos.
3. Númberu de primeres posiciones nes clasificaciones de les xornaes.
4. Númberu de primeros puestos nos abiertos.
5. El mayor cociente obteníu nuna xornada.
6. El númberu más altu de mayores cocientes obteníos nes xornaes del Campionatu.

Campionatu d'Asturies de Liriu

ALCUERDU PA LA CELEBRACIÓN DEL

II CAMPIONATU D’ASTURIES DE LIRIU



Sistema competitivu


-El Campionatu va tener tantes xornaes como equipos representaos (n), caúna d’elles organizada y encontada económicamente por un equipu, en meses diferentes dende marzu a xunetu de 2010.


-Encamiéntase que, empatando coles xornaes del Campionatu, s’entamen opens individuales qu’afalen la participación de xente non inscrito nos equipos del CNL, baxo fórmules lúdiques y abiertes.


-Les partides sedrán a 30 carreres con tantos participantes en caduna como equipos representaos (n).


-Cada equipu inscribe nel orde que quiera los sos xugadores, hasta cubrir les 30 participaciones, siempre que, polo menos, participen 4 xugadores estremaos por equipu.


-En cada carrera puntuarán los tres primeros xugadores en encastrar: 3, 2 y 1 puntu respeutivamente. En casu d’empate, otórguense los mesmos a tolos xugadores empataos, anque seyan más de tres, per enriba, dexando llibre el/los siguientes puestos.


- Establezse en 3 el númberu de rondes posteriores a que’l primer xugador encastre’l so liriu, pa que’l restu xugadores de la carrera encastren los de so. Solo puntuarán aquellos que lo faigan nesi intre, faciéndolo sigún la posición d’encastre, independientemente de la ronda cuando lo faigan.


- Otórgase 1 puntu de carrera extra al equipu del xugador qu’algame un “encastráu” (introducir el liriu del primer güelpe).


-Gana la partida l’equipu que sume más puntos de carrera. Asígnense n +1, n-1, n-2… y asina hasta n-(n-1) puntos de partida. En casu d’incomparecencia d’un equipu, nun sumará dengún puntu de partida.


-La clasificación del Campionatu faise siguiendo esta xerarquía: puntos de partida, puntos de carrera, historial de puestos nes partides y historial de puestos nes carreres.



Sistema de xuegu


-L’anotador noma a los n xugadores de la carrera. Éstos respeten a lo llargo de tola carrera l’orde de llanzamientu nel que fueron nomaos.


-Depués de llanzar, el xugador espera que pare’l liriu cola fin de conservar la posición si fuera preciso volver a ella.


-Nun se considera acabáu’l llanzamientu hasta que nun para’l liriu por sí solu, ensin que’l xugador puea tocalu una vez que caiga al suelu. La posición válida ye na que para’l so movimientu, independientemente de lo que fixera na so trayectoria.


-Nun hai avance válidu si nun hai los dos golpeos (suelu y aire). En casu de fallu, vuélvese al llugar d’orixe.


-Ye fallu que’l liriu pose fuera dafechu del tarrén acotau.


-Mentanto tea nel aire, el liriu pue ser golpeáu infinites vegaes.


-La carrera acaba pa un xugador cuando’l so liriu, paráu, dexa de tener contactu col área qu’arrodia’l castru.


-El liriu puede orientase como quier el xugador siempre que nun conlleve avance.



Tarrén y ferramienta


-El liriu tendrá, tolo más, 22 centímetros de llargor y 3 centímetros de diámetru máximu. Ha ser de madera y nun tener elementos artificiales, a nun ser una pegatina o una rotulación.


-La machorra tendrá, tolo más, 4 centímetros de diámetru mayor y ha ser de madera. El cau de golpéu nun pue tener elementu artificial nengún.


-El tarrén ha tener un llargor d’ente 30 y 50 m. y un anchor d’ente 15 y 25 m. Tará bien marcáu con cinta al ras, pintura o cambiu de material.


-En casu de xugar nun tarrén irregular o d’herba, y siempre que tolos equipos tean d’alcuerdu, pueden usase dos lirios. Unu d’ellos val d’encontu pal principal.


-El castru ye una estaya circular de 0,80 a 1,20 metros de diámetru (la lonxitú de una a dos machorres). Puede pintase en suelu, ser un círculu de lona o, inclusive, tener unos

centímetros d’elevación. Tará colocáu na llinia medular de la pista a una distancia de salida equivalente al 75% del so llargor.




ACUERDO PARA LA CELEBRACIÓN DEL

II CAMPIONATU D’ASTURIES DE LIRIU



Sistema competitivo


-El Campionatu tendrá tantas jornadas como equipos representados (n), cada una de ellas organizada y soportada económicamente por un equipo, en meses diferentes desde marzo a julio de 2010.


-Se aconseja que, coincidiendo con las jornadas del Campionatu, se organicen opens individuales que fomenten la participación de gente no inscrita en los equipos del CNL, bajo fórmulas lúdicas y abiertas.


-Las partidas son a 30 carreras con tantos participantes en cada una como equipos representados (n).


-En cada carrera puntuarán los tres primeros jugadores en encastrar: 3, 2 y 1 punto respectivamente. En caso de empate, otórguense los mismos a tolos jugadores empataos, aunque sean más de tres, por arriba, dejando libre el/los siguientes puestos.


- Se establece en 3 el número de rondes posteriores a que el primer jugador encastre el so liriu, para que el resto jugadores de la carrera encastren los de so. Solo puntuarán aquellos que lo hagan en ese período, haciéndolo según la posición de encastre, independientemente de la ronda cuando lo hagan.


- Se otorga 1 punto de carrera extra al equipo del jugador que consiga un “encastráu” (introducir el liriu del primer golpe).


-Gana la partida el equipo que sume más puntos de carrera. Asígnense n +1, n-1, n-2… y así hasta n-(n-1) puntos de partida. En caso de incomparecencia de un equipo, no sumará ningún punto de partida.


-La clasificación del Campionatu se hace siguiendo esta jerarquía: puntos de partida, puntos de carrera, historial de puestos en las partidas e historial de puestos en las carreras.



Sistema de juego


-El anotador nombra a los n jugadores de la carrera. Éstos respetan a lo largo de toda la carrera el orden de lanzamiento nombrado.


-Después de lanzar, el jugador espera a que pare el liriu para conservar la posición si fuera necesario retomarla.


-No se considera finalizado el lanzamiento hasta que no para el liriu. La posición válida es en la que cesa su movimiento, independientemente de lo que hiciera en su trayectoria.


-No hay avance válido si no se dan los dos golpeos (suelo y aire). En caso de fallo, se vuelve al lugar de origen.


-Es fallo que el liriu se detenga totalmente fuera del terreno acotado.


-Mientras está en el aire, el liriu puede ser golpeado infinitas veces.


-La carrera finaliza para un jugador cuando su liriu, parado, deja de tener contacto con el área que rodea al castru.


-El liriu puede orientarse como quiera el jugador siempre que no conlleve avance.



Terreno y herramientas


-El liriu tendrá, como máximo, 22 centímetros de largo y 3 centímetros de diámetro máximo. Tiene que ser de madera sin elementos artificiales, salvo una pegatina o rotulación.


-La machorra tendrá, como máximo, 4 centímetros de diámetro mayor y ha de ser de madera. La punta de golpeo no tendrá elementos artificiales.


-El terreno tendrá una longitud de entre 30 y 50 m. y un ancho de entre 15 y 25 m. Estará bien marcado con cinta al ras, pintura o cambio de material.


-En caso de jugar en un terreno irregular o de hierba, y siempre que todos los equipos estén de acuerdo, pueden usarse dos lirios. Uno de ellos valdrá de apoyo para el principal.


-El castru es una zona circular de 0.80 a 1,20 metros de diámetro (la longitud de una a dos machorras). Puede pintarse en el suelo, ser un círculo de lona o, inclusive, tener unos centímetros de elevación. Estará colocado en la línea medular de la pista a una distancia de salida equivalente al 75% de su longitud.




17 mar. 2010

1ª Xornada del Campionatu


Equí tenemos el cartel de la primer xornada del Campionatu d'Asturies de Liriu 2010.

El CNL allugaráse esta ocasión al barriu de El LLano de Xixón, onde'l Colexu Públicu "El LLano" y l'Asociación de Vecinos "El Fumeru"-y ceden les instalaciones al club Espor d'Asturies, organizador del eventu.

Los cinco equipos CNL tán yá afilando los lirios naguando por facelos esnalar pel cielu xixonés y algamar los 6 primeros puntos de la competición, qu'escomenzará a les 11 en puntu de la mañana cola primera carrera.

Siguiendo'l sistema del añu pasáu de xuntar la xornada'l Campionatu con un tornéu de llibre accesu pa tol mundu que s'avere -como foi aprobao nel aconceyamientu d'Avilés-, Espor[a] organiza el I Abiertu de Liriu d'El LLano, qu'escomenzará xusto dempués de la partida. Per primer vez, un abiertu preséntase como valederu pal I Campionau d'Asturies de Liriu Individual, a la espera de que se cumplan los requisitos d'homologación CNL.

Pónse en marcha, asina, el tan esperáu segundu campionatu d'Asturies d'esti xuegu convertíu yá, ensin marcha atrás posible, en espor de plenu drechu, con una estructutra muerganizativa, normativa, d'equipos y, sobre too, de persones bien bayurosa qu'habrá rematar a la fin de la temporada colos primeros pasos de la federación.

Pero, hasta entós, quédamos muncho por xugar y disfrutar del liriu.


Domingu 28 de marzu
1ª Xornada del Campionatu d'Asturies de Liriu
A partir de les 11 de la mañana.
I Abiertu d'El LLano de Liriu (Validu pal Campionatu Individual)
A partir de les 13:15. (Inscripciones a lo llargo de la mañana)
Pista del Colexu Públicu "El LLano"
C/ Ríu d'Oro, 33. Xixón.

8 mar. 2010

El liriu esnaló per primer vez esti añu n’Illas.

El I Abiertu d’Illas de Liriu disputóse la mañana del domingu con un éxtiu de participación gracies a la rempuesta de los equipos CNL, que s’aconceyaron dempués del tornéu pa decidir les nueves normes del sistema de xuegu y de puntuación del Campionatu d’Asturies de Liriu.


Imaxe del tarrén de xuegu, con Toño (Sidrones) y Xuacu (Espor[a])
atendiendo'l güelpe de Luisa (Asturlirio).

24 machorradores escomencipiaron l’abiertu ensin esmolecer pol fríu d’una mañana ñublada y de vientu. Esti aire, amás de les condiciones pindies de la pista de xuegu, fizo que los xugadores alcordaren la posibilidá de parar el liriu cola machorra dempués de los güelpes de rigor, pa evitar que marchare peles llindes del tarrén. Asina, pudieron vese unes cuentaes carreres bien prestoses que foron coreaes pol públicu.


Mar y Aarón, xugadores de los Sidrones y la Camaretá de Liriu de Noreña,
los dos nuevos equipos de la temporada.

Utilizóse’l sistema de xuegu propuestu dende Espor[a] pa homologar los abiertos CNL, de cara al Campionatu d’Asturies de Liriu Individual qu’escomienza esti añu al empar que’l Campionatu por equipos. Consiste nel establecimientu d’un sistema d’eliminatories unificáu, con 4 rondes y un máximu de 21 carreres, ensin contar los desempates, que consigue axilizar los torneos tanto na dinámica como nel tiempu. Esti I Abiertu d’Illas malpenes superó la hora de duración.

Daniel, el más xoven del tornéu, esperando'l machorrazu
de salida del campión del abiertu, Carlos d'Espor[a].

Ente ida y venida a la mesa d’almacenamientu de los productos isotónicos (bollos preñaos, empanada y sidre), les diferentes eliminatories foron desendolcándose, hasta que solo quedaron los cuatro semifinalistas. Na primer eliminatoria, Sergio (Espor[a]) impúsose en dos carreres a Javier (Asturlirio). Na segunda, el duelu ente otros dos miembros de Espor d’Asturies, Xuacu y Carlos, acabó col triunfu del segundu por dos carreres ganaes y un empate. La final monocolor decantóse pal lláu del avilesín Carlos, que venció na segunda carrera, mientres que Sergio nun pudo algamar denguna victoria. D’esta miente, atopaba el club carbayón los tres primeros puestos del abiertu.


Fináu’l tornéu, dióse pasu, a pie de pista, al conceyu estipuláu n’Avilés va un mes, pa tomar les decisiones terminantes pal proceder de la temporada 2010. Asina, aprobáronse les siguientes propuestes:


PUNTUACIÓN DE LES CARRERES

P’acortar la duración de los alcuentros, víase el CNL na necesidá d’atopar un sistema de puntuación nes carreres que axilizara la dinámica del xuegu respeutu a la del añu caberu. Alcordose la siguiente forma:

. Puntuarán los tres primeros xugadores: 3, 2 y 1 puntu respeutivamente.

. En casu d’empate, otórguense los mesmos a tolos xugadores empataos per enriba, dexando llibre el/los siguientes puestos.

. Establezse en 3 el númberu de rondes posteriores a que’l primer xugador encastre el so liriu.

. Otórgase 1 puntu extra al equipu del xugador qu’algame un encastráu (introducir el liriu del primer güelpe).

Asina, les posibles combinaciones son les siguientes (ensin contar los puntos por encastráu):

1 ganador: 3,0,0,0,0.

1 ganador y 1 segundu: 3,2,0,0,0.

1 ganador, 1 segundu y 1 terceru: 3,2,1,0,0.

1 ganador, 1 segundu y 2 terceros: 3,2,1,1,0.

1 ganador, 1 segundu y 3 terceros: 3,2,1,1,1.

1 ganador y 2 segundos: 3,2,2,0,0.

1 ganador y 3 segundos: 3,2,2,2,0.

1 ganador y 4 segundos: 3,2,2,2,2.

2 ganadores: 3,3,0,0,0

2 ganadores y 1 terceru: 3,3,1,0,0.

2 ganadores y 2 terceros: 3,3,1,1,0.

2 ganadores y 3 terceros: 3,3,1,1,1.

3 ganadores: 3,3,3,0,0.

4 ganadores: 3,3,3,3,0.

5 ganadores: 3,3,3,3,3.


PUNTUACIÓN DE LA XORNADA
Aplícase
el sistema competitivu del añu anterior, obteniendo el equipu ganador n+1 puntos, el segundu n-1, el terceru n-2, el cuartu n-3 y el quintu n-4, siendo n el númerbu d’equipos de la competición. Ye dicir, valorarase en 6 puntos la victoria y 4, 3, 2 y 1 puntos los otros puestos.

En casu d’incomparecencia d’un equipu, llevará cero puntos.

NÚMBERU MÍNIMU DE XUGADORES POR EQUIPU
Establecióse como 4 el númberu mínimu de xugadores por equipu nuna xornada pa que esti puea participar na mesma.

El siguiente alcuentru CNL va ser la primer xornada del Campionatu d’Asturies de Liriu, qu’arrancará embaxo la organización del club Espor d’Asturies na cabera fin de selmana d’esti mesmu mes de marzu.