21 jun. 2009

El Pitu Caleya voló pa tierres gallegues, pero'l de competición quedó n'Asturies


Esti domingu 21 de xunu en Piarnu, como ye vezu, vivióse otra xornada más de folixa y reivindicación del xuegu tradicional col liriu como protagonista, primero na "procesión", col I Tornéu "Pitu Caleya", y depués na "romería" col Open "Pitu de competición".


Darréu de comprobar l'estáu del tarrén de xuegu y d'armar el castru onde había aparar el liriu, los xueces del CNL realizaben el sortéu ente los 15 participantes, ente los que taben dellos representantes d'Asturliriu, Quirinal Liriu Espor y Espor[a], amás de la intrépida expedición de la LNB. Pa "la hora la procesión" arrincaba'l I Tornéu "Pitu Caleya". Na primer ronda los participantes avezaos a otros "pavimentos" menos abegosos y a metes más amplies entamaben a garrar maña pa llevantar el liriu y encastralu, mentanto'l pitu caleya pasiaba pel prau inconsciente del so destín en manes gallegues.


10 xugadores pasaben a la semifinal faciendo 3 grupos onde yá naide bromiaba, col son de la gaita de fondu, Carlos (Espor[a]) yera'l primeru en clasificase pa la gran final, depués sedría Daniel (Billardeiros Musicais) y, nuna dura semifinal, Eric (Billardeiros Musicais) y Xuacu (Espor[a]) llegaben a la fin con un empate técnicu, pa que yá, na carrera de desempate, fora Eric el terceru n'entrar na gran final del I Tornéu "Pitu Caleya".


Emprincipiaba la final col son de la tonada, Daniel amosó dende'l primer güelpe la so intención de ganar esti tornéu y Eric nun quería quedar atrás, asina entamaron a ponese prietes les coses pal únicu representante asturianu, viendo como'l pitu caleya entamaba a cruciar la ría l'Eo. Depués de 3 carreres Daniel (Billardeiros Musicais) proclamóse xustu vencedor d'esti I Tornéu "Pitu Caleya".


Yera la hora la xinta y Casa Orosia (Las Bárzanas) aguardaba la llegada'l famientu cortexu'l CNL. Fabes, berces, arroz asturiano, carne asao, adobu, rollu bonitu, tarta xelada, tarta d'almendra, natilles, gaita y dellos chupitos, calecieron les ansies de revancha. Asina, col banduyu bien llen treslladábemos otra vez machorres y lirios pa la pista selvática de Piarnu, a la gueta d'una victoria asturiana, depués de calecer con otres formes tradicionales de xugar col liriu y la machorra.


Pa complicalo un poco más decidimos mudar el castru pa onde l'herba taba más alto y asina col calor, la dixestión y l'altor del verde, pone-y difíciles les coses a los collacios de la LNB. Entamaba a la mesma hora que la romería, l'Open "Pitu de Competición" nel qu'otros 15 participantes lluchaben por una plaza na final. Quiciabes la fartura, quiciabes la mano técnica de los asturianos... el podium acabó siendo nacional y sólo'l gran Xermán pudo metese cuartu como representante gallegu, mentanto que los tres Billardeiros Musicais que brillaren durante la mañana, viéronse na metá baxa de la clasificación.


Tolo contrario que los Espor[a] Xuacu, Sergio y Carlos, que tuvieron na metá alta, consiguiendo amás el trunfu verspertín dende la machorra-micrófonu del director y locutor d'Acuto que yá fixera bronce pela mañana. Xuacu caltuvo la regularidá col so séptimu puestu -fuera quintu pela mañana- y Sergio facía una estrena de luxu con un honoríficu quintu puestu na verbena de Piarnu. El liriu astur garra rumbu nuevu y apuesta fuerte dende la mocedá de los recién llegaos. El Conceyu Nacional de Liriu yá caleya solu -y non en círculu- y bien ceo vais conocer el Campionatu que ta en camín. La independencia aportó al espor del paliyu y la machorra.


16 jun. 2009

I Tornéu "Pitu de caleya"


Depués de la gran actuación del Combináu Asturianu en tierras del país vecín nel IV Tornéu Parroquial "Año Preto", ye la hora de poner en xuegu el nuesu preciáu "Pitu de Caleya". El CNL entama esti I Tornéu Abiertu "Pitu de Caleya", onde amás de los anfitriones de Kirinal Liriu Espor, l'equipu d'Asturliriu y espor[a], vamos tener presencia de los collacios de la LNB y de tola xente qu'esti domingu 21 de xunu quiera arimase a Piarnu (Castrillón) onde a les 11'30 va emprincipiar la gran competición, segunda cita de la pretemporada pa los equipos del país, onde dir afinando los machorrazos, pal esperáu I Campionatu Nacional de Liriu, del que tendremos feches definitives la selmana qu'entra.

Pol compromisu colos xuegos y l'espor tradicional, porque va ser una xornada histórica de folixa y reivindicación y porque de xuru que vos prestará xintar un pitín de caleya, esperamos que vos animeis y atendáis la llamada del CNL.

ESTI DOMINGU 21 TOOS A COMPETIR POL I TORNÉU NACIONAL "PITU DE CALEYA"

14 jun. 2009

Asturies ruempe les machorres na llucha pol "Año Preto"


La Selección Asturiana de Liriu, formada por Pravia, Toño, Urbano, Luis, Carlos y Xuacu, ta acabante de llegar de Celeiro de Mariñaos, onde compitieron nel IV Tornéu Parroquial "Año Preto". El Combináu Nacional, que na llucha pol triunfu terminó rompiendo les machorres, quedó nun meritoriu cuartu puestu tan solo vencida pol gran equipu de Vilamar, ganador del tornéu.


Asturies acompañada pol orbayu gallegu entamó la so competición nuna primer partida escontra'l gran equipu de Vilamar que dominó dende la primer carrera. Na metada l'alcuentru l'esfuerzu fechu polos nuesos xugadores ganando delles carreres nun foi suficiente pa baltiar la diferencia algamada por Vilamar, que muncho más concentraos superaron al conxuntu asturianu, algamando la segunda victoria pa Vilamar, que yá ganara a Xove primero, dexando a Vilamar clasificáu pa la final.


Depues del descansu y les felicitaciones a los clasificaos, yera la hora del encuentru ente Xove y Asturies, nel que se definiríen les places de la cuarta a la duodécima. Dende les primeres carreres entamó a calecese l'ambiente calteniéndose cásique de contino un empate ente los dos equipos. A falta de 5 carreres Asturies ganaba por 3 al equipu de Xove. Nesti momentu los nuesos dalgo nerviosos fallaron nes tiraes finales, pero dexó d'orbayar na pista central de Celeiro y apareció'l seleccionador nacional, Pravia que con dellos machorrazos maestros dió un emburrión al equipu consiguiendo la victoria y la cuarta plaza na clasificación final, faciendo asina rescamplar el potencial de la nuesa selección, asitiándose como firme candidata a la Copa Cantabrico de Liriu.


Darréu del espectaculu esportivu yera la hora de la sesión vermú onde se presentaría el poemariu "Orbayu d'alfileres" de Carlos Suari y el tema Circu de Zimmer103, inspiráu nel poema de mesmo títulu. Y depués d'esti momentu artísticu-reivindicativu, llegó la "Guagua (Tropical) da LNB" que nos llevaría a Reinante pa la esperada xinta de xermandía con productos del país vecín y la "Callada coma resposta.....".


Na tarde de Celeiro apaeció'l sol faciendo que secara la pista pa qu'entamara la final a 3 d'esti IV Tornéu Parroquial "Año Preto". Asina emprincipió l'esperáu momentu, nel que los equipos de Furabolos, Vilamar y Billardeiros Musicais, compitieron pol "Año Preto", que depues de munches carreres nes que l'empate foi la tónica xeneral, el nuevu conxuntu de Vilamar algamo la victoria faciendose asina col codiciáu reciellu, esti añu blancu.

Pero esti tornéu nun termina equí, como ye tradición nes selmanes vinientes tendra de xugase'l tercer tiempu, folixa-xinta pa degustar el "Año Preto", nel chigre de Lola de Remourelle.

Amás l'espor tradicional va tener continuidá nel nuesu país esta mesma selmana. El domingu 21 de xunu en Piarnu (Castrillón) va xugase el I Tornéu "Pitu de Caleya", entamáu pol CNL (Conceyu Nacional de Liriu), que sirvirá de sofitu pa echar a andar l'ansiáu Campionatu del que vais tar informaos equí mesmo.

10 jun. 2009

Asturies compite pol "Año Preto"


Esti domingu 14 de xunu la Selección Asturiana de Liriu va participar nel IV Tornéu Parroquial "Año Preto" en Celeiro de Mariñaos (Ribadeo) convidaos pola LNB.

El Combináu Nacional formáu por Pravia, Toño, Urbano, Luis, Carlos y Xuacu va tar lluchando dende primer hora de la mañana por traer el "andoscu prietu" p'Asturies. A les 11:00 hores tendrá que medise al temible equipu de Vilamar, que cuenta con dellos de los estandartes de la selección gallega nes sos files. Y a les 12:00 tocará competir con Xove que de xuru nun van poner nada fáciles les coses pa los nuesos, que llucharán pa clasificase a la gran final que se xugará a les 16:30 na pista central de Celeiro.

El Equipu Asturianu formáu por xente de AsturLiriu, Kirinal Liriu Espor y espor[a] y capitaneáu por Pravia nun va renunciar a nada y lluchará por esti tornéu, que tamién tien traces de preparatoriu pa la Copa Cantábrico que se celebrará a finales de branu.

Amás de lo puramente esportivo, a les 13:00 na cantina de Celeiro podremos disfrutar d'una sesión vermú onde se presentará el poemariu "Orbayu d'alfileres" de Carlos Suari y el tema Circu de Zimmer103, inspiráu nel poema del mesmu títulu. Y depues d'esti momentu artísticu-reivindicativu, llegará la esperada xinta de xermandía con productos del país vecín.

Asina qu'esperamos la respuesta d'una marea azul qu`acuda a Celeiro de Mariñaos pa sofitar a Asturies nesti IV Tornéu Parroquial "Año Preto".