28 dic. 2010

Abiertu Navidá

La Plaza d'Europa de Piedrasblancas fue'l sitiu onde se disputó'l II Abiertu de Navidá de Liriu, el domingu 26 de payares.
Esti eventu, que cerraba la temporada de liriu 2010, axuntó a nueve machorradores, que se dividieron en tres grupos. Les carreres puntuábense con 3, 2 y 1 puntu, sigún foren primeru, segundu y terceru. El meyor dempués de tres carreres, pasaba a la final. Asina lo ficieron Sergio d'Espor[a], Toño de Sidrones y Juan de Quirinal (dempués de defacese del so compañeru Hevia nun desempate).
La final tuvo mui emocionante y la plaza enllonóse de xente curioseando sobre qué yera aquello que facíen aquello mozos.
Hevia, organizador del eventu, vestíu como un paisanu d'aldea, repartía piruletes ente los críos. Y los gaiteros y tamboriteros de la Camaretá poníen la nota musical nuna soleada pero fría mañana de domingu.


Sergio ganó la primer carrera, por delantre de Toño. La segunda, más igualada, finó col empate ente estos dos, dexando descolgáu a Juan, con dos puntos. Pero esti llevaría la tercer carrera y los nervios apoderáronse de Sergio y Toño, que tardaron los tres güelpes permitíos n'encastrar, empatando nuevamente, lo que-y dio'l triunfu al esporu por 7 puntos. Toño algamara 6 y Juan, 5.


D'esta miente, Sergio volvía a facese col títulu caberu del añu, como la temporada pasada, y con una bayurosa cesta de productos de Vallina, que de xuru va dar buena cuenta d'ellos estes fiestes.
Finó la temporada 2010. Na mirada, el futuru, col proyeutu de creación de la
FALA, la configuración del calendariu de pruebes pal 2011 y una nueva cita, yá pa xineru: el II Alcuentru de Liriu de Xixón, organizáu por Espor d'Asturies.
El
Conceyu Nacional de Liriu espera qu'esti 2011 sea tovía meyor qu'esti, col recuerdu pa toos aquellos que sofitaron el nuestru sueñu de facer del liriu un espor al alcance de toos.

¡BON AÑU 2011!

1 nov. 2010

Gran victoria de l'Auténtica. Asturies, a siguir medrando.


Asina foi: una gran victoria de la seleición de Galiza na IV Copa Cantábrica de Liriu/Billarda.

La mañana del sábadu 30 d'ochobre escomenzó cola amenaza d'un temporal de fríu y lluvia y airón del Nordés y Piedrasblancas presentaba un cielu gris. Y gris foi'l día pa la seleición asturiana, arrasada ensín paliativos por una Auténtica con tremendes ganes de revancha.

L'alcuentru disputábase a 60 carreres coles regles del CNL. La victoria daba un puntu; l'empate y la derrota, cero. Los seleiciones taben formaes por 15 xugadores caúna:

ASTURIES: Xosín y Abel (Camaretá); Toño, Dani y Lilian (Sidrones); Pepa, Xuacu y Sergio (Espor[a]); Hevia y Pravia (Quirinal); y Javier, Falo, Marisa, Enrique y Martínez (Asturliriu).

GALIZA: Daniel, Franco y Julio (Billardeiros Musicais); Reyes, Geni, Guille, Isa y Ana (Os Outros); Luis (Bateas de Porto Novo); Suso y Martiño (Remorulle Bulls); Xermán y Flores (Equipa Bíteres); y los independientes Michelle y Joaquín.

Yá dende l'aniciu la partida se punxo de manifiestu la contundencia del equipu gallegu: les sos billardas esnalaben direutes al castru, onde se les veíen y deseyaben pa encastrar. Mientres, los lirios asturianos diben despacín, p'averase nel intre cuando'l palanador gallegu encastraba. L'exemplu más granible diéronlu Sergio y Xermán na cuarta carrera: el gallegu de Quirinal necesitó dos güelpes pa llegar al castru, mientres que Sergio siguía na salida; cinco güelpes dempués, llegaba l'esporu al castru, momentu qu'aprovechaba'l palanador pa encastrar. Esta foi la llinia de tol alcuentru, onde rara vez los gallegos encastraben enantes de cinco güelpes, sofitando'l so xuego nel machorrazu de salida. Lo que nun fala mal de los xugadores de l'Auténtica; más bien del probe xuegu de los asturianos.

Asina, dempués de la primer ronda, el resultáu yera de 5-8, lo qu'índa daba posibilidaes a los machorradores convocaos pol CNL. Pero la dinámica nun ameyoraba y la segunda ronda finó col mesmu resultáu. Galiza alloñábase índa más, aprovechando un xuegu asturianu mui per embaxu de les posibilidaes de los sos xugadores. A la metá, Galiza dominaba con un contundente 10-16. Nes quince carreres siguientes, más de lo mesmo: un parcial de 5-8, que dexaba'l resultáu en 15-24. La gayola nel bandu gallegu fíxose patente. Asturies necesitaba ganar 10 carreres y dexar a Galiza ensín puntuar. Pero foi una misión imposible, porque los xugadores asturianos esbarrumbáronse nel caberu cuartu, faciendo solamente dos puntos, por nueve gallegos. El resultáu final foi de Asturies 17 – Galicia 34.

Pravia, Bernabé Peña, Hevia, Xermán y Flores, nel trespasu de la Copa.

El conceyal de Deportes del Conceyu de Castrillón, Bernabé Peña, presidió l'actu de trespasu de la Copa Cantábrica, del representante del CNL, Pepe Pravia, al seleicionador gallegu, Flores. La cellebración esti añu marchó, con toa xusticia, p'allende l'Eo y los palanadores de Galicia compartieron el so triunfu colos sos compatriotes al traviés de la tresmisión en direutu fecha por TELE VARAL Life, nuevu proxeutu de los collacios de la LNB.

Esti añu la xinta d'hemandá, en Casa Orosia de Las Bárzanas, tuvo amenizada nos postres pola gaita de Xosín (qu'incluso s'atrevió a tocar una versión llibre d'A Rianxeira), los chistes de Flores y les bromes pa con Hevia, organizador del eventu.

Xosín a la gaita, dempués de la xinta en Casa Orosia.

De tarde, la comitiva aconceyóse de nuevo na pista averada al Polideportivu de Piedrasblancas pa cellebrar el II Abiertu del LLacón Internacionalista, qu'esti añu tenía como troféu una menos gastronómica reproducción de la Cueva de Cuadonga. L'abiertu disputóse coles regles de la Liga Nacional de Billarda, anque siguiendo'l formatu de los abiertos CNL, p'axilizar l'eventu. El rectángulu de salida huvo ponese a unos 45 metros del varado, porque parte de la pista taba acutada pol Club Deportivo de Tiro con Gomeru de Piedras Blancas, que taba faciendo una exhibición. Foi una esperiencia bien prestosa'l xunir dos deportes tradicionales nun mesmu sitiu y compartir impresiones.

La competición tamién tuvo color gallegu, porque los cuatro semifinalistes procedíen de la LNB. De los 22 machorradores, destacaron Geni (Os Outros) y Franco (Billardeiros Musicais), na primer semifinal, y Luis (Bateas de Porto Novo) y Daniel (Billardeiros Musicais), na segunda. Dambes finaron pela vía rápida (0-2), faciendo da la final un duelu cuñaos ente'l gallegu-italianu Franco y el xenial Daniel. Pero nesta ocasión nun hubo color y Franco volvió algamar un 2-0, con un par de varados espectaculares. Yera'l día de so, porque foi tamién el xugador más destacáu del alcuentru cantábricu, ganando los cuatro puntos que disputó. El primer asturianu, en quinta plaza, foi Sergio d'Espor[a] que perdió por un palmu nos cuartos col campión; Falo, octavu, tamién pasó a cuartos.

Daniel (finalista) y Franco (campión). De morao, Flores, seleicionador gallegu.

Pa finar la xornada, Hevia propuso un abiertu femenín, que ganó Marisa (Asturlirio) na final a Isa (Os Outros), nel únicu triunfu asturianu del día.

Marisa ya Isa, finalistes del abiertu femenín.

Na despedida ente dambes seleiciones escomenzaba a golese la posibilidá d'organizar un nuevu alcuentru anual ente Asturies y Galicia, pero en tierres galáiques. Tal vez una Copa del Eo, onde xugase la oriella del país correspondiente. Rises y bon humor yeren la nota. Un síntoma afayadizu pa siguir xugando xuntos gallegos y asturianos.

El balance pal CNL, pesie a la contundente y merecida derrota, tien de ser positivu porque supón un pasu más pal xuegu'l liriu n'Asturies: la consolidación d'un modelu de xuegu ya organizativu, la creación d'un modelu afayadizu de convocatories y el deprendizaxe que surde d'esperiencies d'esti tipu, solo nos fai sofitar esta idega d'espoxigue. Ganar ye prestoso, pero perder val pa facese más fuerte. L'exemplu tenemoslu nel alversariu gallegu que'l añu pasáu "marchara escocíu" y esti, tornara bien crecíu. L'añu que bien habrá facer lo posible por dexar la Copa en casa.


27 oct. 2010

Fiesta de Clausura de los Campionatos 2010

Foto de familia de la Fiesta.
Enriba: Sergio, Suari, Javier, Xosín, Falo, Lilian, Toño, Mer, Hevia y Dani;
embaxo: Tere, Marisa, Mara, Enrique, Evina, César y Martínez.

La tarde del sábadu 23 foi especial pal mundu'l liriu. Nel Centru de Deportes de LLamorgal, en LLanera, cellebróse la Fiesta de Clausura de los Campionatos d'Asturies de Liriu, tanto por equipos como individual, entragándose la machorra y los lirios al equipu y los xugadores ganadores, respeutivamente.
L'actu abrióse col aconceyamientu de los representantes de los cinco equipos que formen el Conceyu Nacional de Liriu anguaño, pa falar del futuru prósimu del espor, creyándose la Promotora de la Federación Asturiana de Liriu y Asemeyaos (FALA) qu'organizará y coordinará el pasu de los equipos a la forma llegal de clubes, estáu que yá presenta Espor[a]; Sidrones y Asturliriu ya tán en procesu, faltando la presentación de los estatutos nel rexistru; Quirinal y Noreña alcuéntrense nel primer pasu d'evaluación de la situación interna.
Amás tratóse la tema de la creación d'un calendariu d'actividaes pa la temporada 2011 que, ensín tar zarráu a nuevos eventos, dexe marcaes yá en xineru les feches de los abiertos que se disputaren nesta temporada. Respeuto al sistema d'organización, recalcóse la importancia de la puntualidá, con varies propuestes sancionadores.
Por último, aprobóse por unanimidá la propuesta d'Espor[a] pa formalizar la convocatoria de la Seleición Asturiana de Liriu, pola que'l CNL sedrá'l marcu onde s'organice esta seleición, convocando a xugadores que participaren na competición 2010 o que tengan ficha na temporada siguiente nun equipu del Conceyu. Envaloróse que dengún xugador de fuera'l CNL pues ser seleicionáu y que, pal siguiente alcuentru (la IV Copa Cantábrica) cada equipu presentará trés xugadores de so.
Dempués dióse pasu a la bayurosa merienda d'hermandá ente los xugadores aconceyaos ellí.

Suari, Campión Individual d'Asturies 2010, col Liriu d'Oru y el diploma acreditativu.

Al finala, pasóse a la entrega de premios: los diplomes del Cuadru d'Honor, pa tolos machorradores que puntuaron a lo llargo de la temporada nel Campionatu d'Asturies de Liriu Individual; los Lirios d'Oru, Plata y Bronce, pa los tres primeros clasificaos: Suari, Sergio y Toño, respeutivamente; los diplomes pa los equipos participantes nel Campionatu d'Asturies de Liriu 2010; y, finalmente, la Machorra d'Oru que, por segundu añu consecutivu, llevó Espor d'Asturies.

César Balvo, xugador d'Espor[a], cola Machorra d'Oru
y el diploma d'Equipu Primer Clasificáu.

Pero la temporada 2010 nun finó con esti emotivu actu. Son varios los eventos que se tán preparando enantes de que fine l'añu: l'Abiertu de Nadal, l'Alcuentru Xixón de Liriu y, por supuesto, la IV Copa Cantábrica, qu'enfrentará, na pista polideportiva de Piedrasblancas a partir de les 11 de la mañana del prósimu sábadu 30 d'ochobre, a la Seleición de Galiza (l'Auténtica) y a la Seleición Asturiana.
¡Índa mos queda munchu liriu qu'aventar!

2 sept. 2010

Toño ganó'l barreñón.

El carismáticu machorrador de los Sidrones, Toño, fízose col II Abiertu'l Barreñón de Liriu, disputáu esti sábadu pasáu en LLamorgal.
Pesie al reducíu númberu de participantes, miembros de cuatro de los cinco equipos
CNL presentáronse a les pistes del Centru Rexonal de Deportes, llegando dalgunos a pie de pista hasta motorizaos. Solo Quirinal, d'Avilés, faltó a la cita, cola buena excusa de ser ellí fiestes grandes esa fin de selmana. Ensín embargu, quedó claro que buscar una fecha afayaíza durante'l mes d'agostu ye tarea bien complexa, encarada por Espor d'Asturies col envís de que nun quedare paralizada la competición de liriu.
Nel aspeutu deportivu, l'Abiertu destacó pola so rapidez y, sobre too, pol eleváu númberu d'empates.
Pela parte alta del cuadru, llegaron dos semifinalistes del equipu anfitrión. El porcentaxe de posibilidaes pa qu'esa combinación se diera yera bien altu: de 7 xugadores encuadraos pa cuatro octavos de final, 6 yeren esporos.
Suari, que se desficiera de Xuacu y de Sergio pela vía rápida (con cuatro y dos machorrazos respeutivamente), venció a Pepa por dos carreres a cero.
Pela baxa, foi
Toño quien pasare a la final al ganar 2-0 a Falo, d'Asturlirio. Esti venciera en cuartos a la so compañera d'equipu, Marisa, dempués d'una tirada de desempate. Igualmente, Toño ganó a Xosín, de la Camaretá.
La final, ente'l segundu y tercer clasificáu del
Campionatu d'Asturies de Liriu Individual, prometía ser de lo más interesante, y nun defraudó. La primer carrera finó en empate y la segunda cayó del lláu del xixonés de los Sidrones. Suari dispúnxose a sacar el so meyor xuegu, pero un par de machorrazos al aire, fizo que Toño s'aventayara, pa encastrar de nuevu primero.


Col 3-1 final,
Toño facíase col so primer títulu individual y los cinco puntos respeutivos pal Campionatu Individual que lu consoliden nel tercer puestu y lu acerquen a les posiciones principales. Pela so parte, Suari, gracies a la so regularidá, algama'l primer puestu de la clasificación con 39 puntos, superando al so compañeru d'equipu Sergio, que lu sigue de cerca con 37.


Con esti abiertu, retomáu de la primer xornada del Campionatu del añu pasáu,
Espor d'Asturies manda avisu al restu d'equipos CNL pa que s'animen a organizar un nuevu abiertu pa la seronda, anque yá tien en mente dos abiertos pa payares (ún d'ellos, el II Alcuentru Xixón de Liriu) y, sobre too, la IV Copa Cantábrica, onde la seleición asturiana habrá defender el títulu conseguíu en Piedras Blancas el pasáu payares.
De xuru que nos vemos bien lluego.


22 ago. 2010

Continúa la temporada 2010.




El sábadu 28 d'agostu, a les 12 del mediudía, va disputase'l II Abiertu'l Barreñón de Liriu nes pistes del Centru Rexonal de Deportes de LLamorgal, en LLugo de LLanera.
La primer edición d'esti abiertu cellebróse va un añu dientro de les pruebes de la primer xornada del Campionatu d'Asturies de Liriu 2009, aniciu de les competencies muerganizaes pol Conceyu Nacional de Liriu. N'aquella fecha, amás, púnxose firma al cartafueyu pol que los tres equipos fundadores diben rexir daquel primer añu de liriu esportificáu.
Paez que yá queda bien lloñe aquel 18 de xunetu y el momentu cuando l'esporu Iyán algamaba'l barreñón azul de premiu, acompañáu de Marisa d'Asturlirio y de Xuacu de Espor[a].



Un añu dempués, y col envís de recordar aquel sucesu y cola vista puesta en continuar la temporada 2010, dempués de finalizáu'l II Campionatu d'Asturies de Liriu con victoria, Espor d'Asturies organiza esti II Abiertu'l Barreñón de Liriu.
Va ser buena prueba pa tomar el pulsu a esta segunda parte de la temporada, a puntu de pasar les vacaciones de branu, de cara a la cita nacional de la Copa Cantábrica de payares y, sobre too, pa aniciar les conversaciones que nos lleven dafechu escontra la Federación.

II Abiertu'l Barreñón de Liriu
20 d'agostu - 12:oo h

C.R.D. LLamorgal
(LLugo de LLanera)


29 jul. 2010

Fin de selmana enllenu lirios.

Esta última fin de selmana de xunetu, disputáronse tres eventos de liriu: la partida correspondiente a la 5ª xornada del Campionatu d'Asturies de Liriu, el I Abiertu de Piedras Blancas y el I Abiertu de la Fiesta de les Asociaciones – Fai!. En xuegu taba la clasificación definitiva del Campionatu por equipos, amás de la clasificación del Campionatu d'Asturies de Liriu Individual (a falta de la decisión de prolongalu o non hasta finales de la temporada 2010, tema a debatir na próxima asamblea del CNL).

5ª Xornada.

El sábadu 24, pasaes les 11 de la mañana, los cinco equipos del CNL, escomenzaben la última partida del Campionatu na pista pegada al Polideportivu de Piedras Blancas. El vultable retrasu fizo que se recortase'l númberu de carreres a disputar hasta 20.

El yá campión Espor d'Asturies nun quiso dexar escapar la última posibilidá de triunfu del añu, y el so quintetu de luxu (Xuacu, Suari, Sergio, Iyán y Pepa) yá se despegó dende les primeres cinco carreres, pa finar mui destacáu con 48 puntos de carrera.

Más disputada tuvo la segunda plaza, que se decidió por cuatro puntos de diferencia ente'l restu los equipos. Los dos xugadores de la Camaretá (Abel y Tino) consiguieron mantener la mínima distancia pa quedar nel segundu puestu con 29 puntos, anque nun-yos valío p'algamar los puntos de partida correspondientes, al nun presentar los cuatro machorradores reglamentarios. Asina, l'equipu organizador, Asturlirio, garró los 4 puntos de partida, colos 28 puntos que ganaron Tere, Falo, Javier, Martínez, Marisa y Enrique. Un puntu por embaxu quedaba cuartu'l cuartetu de Quirinal (Hevia, Xermán, Pravia y el lesionáu Guillermo). Y, n'ultimu puestu, zarraben los Sidrones de Toño, Dani, Portali y Paula.

Asina, la clasificación final del Campionatu d'Asturies de Liriu 2010 quedó col equipu d'Espor d'Asturies en primer llugar, destacáu con 28 puntos de partida sobre 30 posibles y 226 puntos de carrera d'un total de 345 disputaos. El decanu, Asturlirio, consiguió con comodidá'l segundu puestu, con 19 puntos de partida y 148 de carrera. L'equipu de los Sidrones, debutantes na competencia, algamaron el tercer puestu, con 12 puntos de partida y 109 de carrera, lo que demuestra que l'asistencia a toles xornaes d'al menos el númberu mínimu de partcipantes, dio los sos frutos. Quirinal, que faltó a una xornada, quedó na cuarta plaza, con 136 puntos de carrera, pero solamente 10 puntos de partida. Na cabera plaza, la Camaretá de Liriu de Noreña pagó les torgues p'acudir a toles xornaes, y quedó con 7 puntos de partida y 124 de carrera, con 30 menos dispustaos qu'el restu, pola incomparecencia n'Illas.

Ciérrase'l II Campionatu d'Asturies de Liriu con tres victories de xornada pa Espor[a] (na primera, segunda y cabera xornada), una pa la Camaretá (tercera xornada) y una p'Asturlirio (na cuarta partida).

A nivel individual, la partida dexó un altu gráu d'igualdá, con varies carreres con trés o más machorradores empatando na primer plaza. Poro nun se pue ver raro que cuatro xugadores empataren na primer plaza del resultáu individual: Xuacu, Iyán y Sergio d'Espor[a], y Javier d'Asturlirio, algamaron los 10 puntos con un cociente de 0.92 (11 puntos de 12 disputaos).

Esti cuádruple empate dio-y mayor valor a la emocionante carrera 19. Enfrentaos Javier d'Asturlirio, Pravia de Quirinal, Dani de los Sidrones, Abel de la Camaretá y Suari d'Espor[a], esti últimu presentábase con un plenu nes tres anteriores carreres. Si puntuaba otru 3, algamaba los 10 puntos individuales, que-y daben ventaya casi definitiva na clasificación xeneral, onde comenzó empatáu a puntos col so compañeru Sergio y con un penriba de Toño, de los Sidrones. Algamó una distancia granible nos dos primeros güelpes, pero nun encastró nel terceru y el restu de machorradores acercáronse. El cuatru güelpe foi'l definitivu y los lirios foron cayendo dientro'l castru, salvo'l de Suari, que rebotó dientro pero salió, cola mala fortuna de ver el cuádruple empate de los sos contrincantes.

La mala suerte fizo que'l xugador, ensin dubia, más regular de la competición, se viere relegáu por un solu güelpe a la sesta posición, pa ganar 3 puntos que nun-y ficieron xusticia al so bon facer.

En quinta posición, Dani de los Sidrones, col 0.80 de los puntos disputaos, ganó cuatro puntos. Los puestos caberos foron pa Pravia, de Quirinal, y Abel, de la Camaretá.


I Abiertu de Piedras Blancas.

Acabante la partida, y organizáu tamién por Asturlirio, disputóse'l I Abiertu de Piedras Blancas, valederu pal Campionatu d'Asturies de Liriu Individual.

Nes rondes d'octavos de final destacaron el duelu ente Suari y Toño (primer y tercer clasificaos individuales, respeutivamente), que ganó l'esporu; la sorpresa de Paula, que se desfizo con facilidá de Falo y Sergio, finalistes del anterior abiertu d'Illas; y la carrera ente los sidrones Paula (cuarta en La Caizuela) y l'especialista n'abiertos, Dani, que finó cola victoria del zurdu.

En cuartos, Suari desfízose de la so compañera Pepa, Tere de la tamién compañera Paula, Javier d'Asturlirio venció a Luis Carlos, d'Espor[a] y Dani d'Abel, de la Camaretá.

La primer semifinal foi resuelta pela vía rápida, con dos victories siguíes de Suari sobre Tere, demostrando'l primeru'l so meyor xuegu, como nel restu la xornada. Na segunda, Dani remontó la primer carrera vencida por Javier, y colóse na final.

Dani, vencedor en Noreña y finalista en La Villa adelantóse con tres manzorgazos espectaculares a Suari, que ganare nel primer tornéu del añu n'Illas y llegare a les finales d'El LLano. Pero dos carreres impecables del avilesín d'Espor[a] diéron-y la victoria final, algamando l'horru qu'Asturlirio apurrió como troféu y cinco puntos d'oru na clasificación individual.



I Abiertu de la Fiesta de les Asociaciones – Fai!

Respondiendo a la llamada de la asociación soberanista d'esquierdes Fai!, Espor d'Asturies organizó, en representación del Conceyu Nacional de Liriu, el I Abiertu de la Fiesta de les Asociaciones – Fai!. Al pie de la torre de vixilancia de la playa de Poniente de Xixón, onde se celebraba l'alcuentru anual d'asociaciones miembres del Conceyu de la Mocedá de Xixón, asitióse'l tarrén de xuegu facilitáu pela organización.

Los lirios foron esnalando dende les 12 de la mañana del domingu 25, al empar de los aviones del exércitu español, que facíen del despliegue bélicu un espectáculo de duldosu gustu, retoricáu pelos xuegos tradicionales, la sidra y los bollinos preñaos. Énte'l ruíu de los reactores, un xuegu de cai sorprendía a los paseantes.

23 foron los machorradores que ficieron frente a la solana amburante del mediudía xixonés. Al equipu organizador, xuntáronse los miembros del equipu decanu Asturliriu y Hevia, de Quirinal, colo que l'abiertu quedaba homologáu pal Campionatu d'Asturies de Liriu Individual. El restu de machorradores yeren debutantes, dende miembros de la organización de la Fiesta de les Asociaciones, hasta integrantes d'asociaciones como COCEMFE, Fai! y la lleonesa Agora, amás d'algún neñu enfotáu n'aprender esti prestosu xuegu, como Jony y Musa.

La diferencia ente expertos y novatos yera granible, pero nun quitó pa qu'hubiera sorpreses, como la protagonizada por Rocío, que ganó a Hevia nun mano a mano bien emocionante. Los cuartos de final tuvieron integraos por tres esporos, tres d'Asturlirio y dos independientes (Rocío y Musa), que llevaron l'apoyu de tolos asistentes pola so tenacidá.

Pero les semifinales acabaron cayendo pal campu de los equipos CNL. La primera, con un enfrentamientu entre Xuacu y Suari, d'Espor[a], que venciera'l primeru por 2 carreres a 1. Na segunda, el duelu fraticida yere ente miembros d'Asturlirio, Marisa y Enrique venciendo ella por 3-1.

La final foi bien disputada. Adelantóse Marisa, quitándo-y la mano de salida a Xuacu y empatóse la segunda. Xuacu había ganar la carrera, pa forzar el desempate, pero Marisa volvió a adelantase, el liriu del esporu ñegóse a quedar dientro'l castru y la machorradora d'Asturliriu facíase col abiertu con toa xusticia.

Futuru.

Finada la competencia por equipos del añu 2010 y con vistes a mantener el contautu ente equipos CNL y posibles nuevos aspirantes, amás d'organizar nuevos abiertos durante estos meses caberos del añu, el Conceyu Nacional de Liriu acordó en Piedras Blancas aconceyase de nuevo n'agostu, con motivu del II Abiertu'l Barreñón que va organizar Espor d'Asturies.

Son munches les temes a tratar: dende'l caltenimientu del Campionatu Individual pa los siguientes abiertos (tema nun zarráu n'Avilés nin n'Illas a principios de la temporada), hasta'l pasu pa convertise en Federación, pasando polos posibles camudamientos nos reglamentos de xuegu y organización de les actividaes.

Asina que nun fina la temporada, nin muncho menos. Hai varios abiertos nel horizonte, la Copa Cantábrica y un par de reuniones en mente, que darán muncho que falar.


21 jul. 2010

Última xornada del Campionatu.


Esti sábadu día 24 de xunetu, ponse fin al II Campionatu d'Asturies de Liriu na mítica pista del polideportivu de Piedras Blancas, en Castrillón.
L'eventu, organizáu pol equipu decanu del xuegu n'Asturies, Astur Lirio de Las Bárzanas, va consistir, como les anteriores xornades, d'una partida oficial colos cinco equipos del CNL y un tornéu abiertu a la participación de toos aquellos asistentes que asina-yos pruya, valederu pal Campionau d'Asturies de Liriu Individual, en casu de dase los criterios d'hologación.
La cita va ser a partir de les 11 de la mañana, escomenzando l'abiertu en cuantes fine la partida por equipos.
Amás, esta fin de selmana, el Conceyu Nacional de Liriu tá invitáu a la Fiesta de les Asociaciones de Xixón, inciativa entamada tolos años pol Conceyu la Mocedá de Xixón. Yá l'añu pasáu'l liriu tuvo representáu pol equipu Espor d'Asturies, nuna pequeña demostración. Pero esti añu, el compromisu va ser mayor, pasando a organizase un abiertu, a partie de les 12 hores de la mañana del domingu 25, nel paséu de la Playa de Poniente de Xixón.
¡Nun podéis faltar! Pasamos llista.

28 jun. 2010

Campionatu pa Espor[a] y doblete p'Asturlirio


La Caizuela foi l'escenariu perfeutu pa la cuarta xornada del Campionatu d'Asturies de Liriu, organizada pol equipu avilesín Quirinal y el sofitu del Conceyu d'Illas.
La partida por equipos contó esta vegada con solo cuatro, porque la Camaretá de Liriu de Noreña nun pudiere asistir al alcontrase los sos miembros, toos ellos pertenecientes a la Escuela de Música Tradicional de Noreña, cola obligación d'acudir al Alcuentru de música na cai que s'organizare pa esta fin de selmana na villa condal. Ensin embargu, los vencedores de la xornada tercera yá glayaben venganza pa la quinta y última a disputar en xunetu.
Con cuatro equipos, la partida discurría con muncha más celeridá y dio tiempu pa disputar les 30 carreres en menos de dos hores.
Yá de mano vióse como Asturlirio quería imponese y aportábase a la primer plaza na carrera 9, sitiu que nun diba abandonar yá, pesie a los intentos d'un irregular Espor[a], qu'algamara'l segundu puestu, que-y daba de sobra pa ganar el Campionatu. Los Sidrones, nesi procesu d'ameyoramientu qu'alcontraren en na Villa, ficiéronse col tercer puestu, a mediu camín d'acanzar a los dos primeros y de cayer al últimu, llugar onde quedó Quirinal.
Solo na última carrera se vio Espor d'Asturies na posibilidá d'empatar col equipu de Las Bárzanas, col marcador 50 a 53 a favor de los últimos. Pero l'espléndidu machorrador de los Sidrones Toño llevó al so tanteador los tres puntos, dexando a cero al restu los equipos.

Asina, con bastante claridá, Asturlirio atopaba por primer vez el triunfu nuna xoranda del Campionatu d'Asturies de Liriu y estrenar el so casilleru de victories. Pela so parte, Espor d'Asturies algamaba el triunfu na xeneral, a falta d'una xornada por disputase, al sumar los cuatro puntos de partida del segundu puestu. L'equipu uvieín yá ye bicampeón.
A nivel individual, la partida destacó polos númberos de Sergio, d'Espor[a], que consiguió 20 de los 21 puntos que disputó, esto ye un 95%. Por detrás, nun podía ser d'otra manera, alcontróse un xugador d'Asturlirio, Javier, con un cociente de 0.87 y zarrándo'l podiu, Toño, de los Sidrones, y Xermán, de Quirinal, qu'algamaben los 6 puntos na clasificación individual con un 83% de los puntos algamaos. Xuacu, d'Espor[a], tercer meyor machorrador del añu pasáu na clasificación oficiosa, allugábase por primer vez al Campionatu y quedaba quintu, rayando'l 80%. Luisa y Falo, d'Asturlirio, foron sesta y sétimu respeutivamente. Y na cabera plaza pa los puntos, empataron Dani (Sidrones) y Suari (Espor[a]), primer clasificáu de la xeneral y que pinchaba nesta xornada después de les actuaciones espectaculares de Villaviciosa y Noreña.
Acabante la partida, escomenzó'l I Abiertu'l Coneyu de La Caizuela, valederu tamién pa la clasificación del Campionatu d'Asturies de Liriu Individual. Pesie a que'l númberu d'inscritos foi más baxu que'l del restu de xornaes, solo 14, poles condiciones pindies de la pista pudieron vese unes carreres espléndides detrás d'unos lirios qu'esnalaben pol aire y esnidiaben pola pista d'una forma estraordinaria. A les semifinales llegaron, pela parte alta del cuadru, Sergio d'Espora y Paula de los Sidrones y, pela baxa, Luisa y Falo, d'Asturlirio. L'esporu llegó a la final tras dos carreres mui disputaes con Paula, que sacó'l meyor xuegu que se viere hasta'l momentu, y Falo venció 3-1 a Luisa, nun duelu que diba más allá de la competencia de ser del mesmu equipu. La final, con Sergio llanzáu tras la so contundencia na partida por equipos, escomenzó con un machorrazu que casi acaba n'encastráu, pero'l postrer esmuciamientu del liriu pela pendiente, fizo que'l xugador xixonés tuviera que correr al sprint los 30 metros, que lu separaben del liriu, pa que nun saliera. Anque lo consiguió, foi l'ultimu güelpe buenu qu'algamó na competencia y Falo, con un xuegu más regular y efeutivu, fízose col quesu La Peral de premiu al vencedor del abiertu. D'esta mena, Asturlirio atopaba los dos galardones en xuegu na xornada, lo que-yos da munches fuercies pa la última xornada, qu'organizará esti equipu, posiblemente pal sábadu 24.


Los puntos algamaos por Sergio, el que Toño nun disputara l'abiertu y la irregularidá de Suari esta xornada ficieron que la parte d'arriba de la clasificación provisional del Campionatu d'Asturies de Liriu Individual s'apertara muncho, colos tres machorrados empataos a 27 puntos (Toño ye terceru por haber disputao menos eventos). Índa con posibilidaes matemátiques tán Xermán de Quirinal, Iyán d'Espor[a], Javier d'Asturlirio y Aarón de la Camaretá pa facese col triunfu na xornada que vien, que tará por tolo alto n'emoción.
El Conceyu Nacional de Liriu encara yá'l mes de xunetu, con varios eventos por delantre: la xornada del Campionatu, organizada por Asturiliriu, y un abiertu dientro de les actividaes de la Fiesta de les asociaciones del Conceyu de la Mocedá de Xixón. Pero sobre too, col envís de cellebrar un nuevu aconceyamientu pa organizar la otra metá del añu y la preparación del camín pa la futura federación d'esti espor que cada vez se va consolidando más n'Asturies.

20 jun. 2010

4ª Xornada


Dempués de la serie de problemes que sufrió Quirinal Lirio Sport pa zarrar les feches de los eventos que tenía intención d'organizar nesti mes de xunu, con diluvios ente medies, al fin fueron quien a proponer día y hora pa la 4ª xornada del Campionatu d'Asturies de Liriu.
Va dispustase'l domingu 27 de xunu, a partir de les 11 de la mañana, nes Escueles de La Caizuela, nel conceyu d'Illas, que collabora cola organización. Acabante la partida, escomenzará'l I Abiertu'l Coneyu de La Caizuela, premiu col qu'Hevia, incansable estos últimos díes, quier compensar a los machorradores que s'averen al llugar, poles molesties de tantu cambiu.
Esta xornada pue ser decisiva con vistes a la clasificación: si Espor[a] quedare segundu atoparíse matemáticamente cola victoria del Campionatu, fechu que solo pue arrebata-y Asturlirio, que va segundu. Ensin embargu, l'ameyoramientu plasmante de los Sidrones na xornada pasada, la pírrica victoria de la Camaretá y el puxu que va recibir Quirinal por organizar la partida, faen d'esta cuarta xornada la más abierta de toles disputaes hasta'l momentu.
Pela so parte, Suari (Espor[a]) y Toño (Sidrones) parten con tremenda ventaya na clasificación del Campionatu d'Asturies de Liriu Individual (26 y 21 puntos, respeutivamente) en comparanza colos sos inmediatos perseguirdores, los tamién esporos, Iyán (15) y Sergio (14). En disputa tarán 15 puntos bien xugosos.
Asina que, dende'l Conceyu Nacional de Liriu, ¡esperámosvos a toos!

Domingu 27 de xunu
4ª xornada del Campionatu d'Asturies de Liriu.
A partir de les 11 hores,
Partida por equipos
Acabante la partida,
I Abiertu'l Coneyu de La Caizuela
Escueles de La Caizuela, Illas

16 jun. 2010

Munches nueves

Pesie a nun haber competición del CNL esta selmana y dempués de que l'Abiertu'l "Pitu Caleya" de Piarnu hubiera suspendese pol temporalón que frayó buena parte d'Asturies, estos díes vienen enllenos de noticies pa la familia del liriu.

Escomenzamos falando del taller de liriu pa guah.es que sí se pudo facer na parroquia castrillonense, dientro de los actos de les Fiestes Sacramentales del pueblu. Quirinal esfuercióse abondo por caltener esti eventu bien prestosu pa les neñes y los neñes de Piarnu, onde se-yos desplicó qué yera aquello a lo que xugaben esos paisanos mayores como si fueren rapacinos, con una exposición de los trebeyos del xuegu.



Nun tuvieron tanta suerte col abiertu y tuvieron que suspendelu. Ensin embargu, la nueva ye que yá hai fecha pa retomar el tornéu decanu n'Asturies: la popular xira a Pulide, tradicional na comarca avilesina, va ser el momentu escoyíu. Tenemos cita col liriu el domingu día 27 pola mañana y sobre herba.


Pero nun sedrán los únicos actos que Quirinal muerganice pa esa fin de selmana. El día anterior, sábadu 26, pela mañana a les 11 hores y nel conceyu d'Illas, va cellebrase la xornada del Campionatu d'Asturies de Liriu y l'abiertu valederu pal Campionatu d'Asturies de Liriu Individual. Índa falten unes colgadielles por quitar (el nome del abiertu o'l sitiu precisu onde se disputará l'alcuentru), poro nun vamos poder dar los datos zarraos del too hasta la fin de selmana.



Ensin embargu, sí podemos facemos ecu de la invitación que a los machorradores asturianos se-yos fae dende los collacios de la Liga Nacional de Billarda pa esti domingu 20 de xunu. Dende O Varal ufiértasenos la posibilidá d'acudir al Torneo Interparroquial de Billarda de Ribadeo, nomáu "Año preto", por ser el premiu un corderu añal negru. Ye particular porque se disputa por equipos de 3 a 6 xugadores, con un sistema de liguilla a doble vuelta. Escomenzará cola serie de mañana a les 12 del mediudía y finará acabante la de la tarde de les 16:30. La xinta sedrá una churrascada de les del país, con un preciu de 10 euros. La inscripción costará dos euros por xugador, independientemente del númberu de machorradores que tenga'l so equipu. Asina que ye una mui bona forma de pasar un domingu de liriu/billarda. Los interesaos en dir hasta'l aparcamientu del Eroski de Ribadeo podeís inscribiros nel e-mail siguiente ovaral@hotmail.com



3 jun. 2010

III Troféu "Pitu Caleya"


El sábadu 12 de xunu vuelve'l más antiguu de los abiertos de liriu n'Asturies, el del "Pitu Caleya" de Piarnu, Castrillón. L'equipu Quirinal, de la mano del residente na parroquia Hevia, organiza esti tornéu abiertu que, nel casu de cumplimetar los requisitos de participación, sedrá valederu pal Campionatu d'Asturies de Liriu Individual.
A partir de les 18:30 hores daráse comienzu a la xornada de liriu con un taller d'espardimientu pa guah.es y mayores, col oxetu d'animar a la xente a apuntase a esti clásicu del CNL.
L'eventu intégrase nes actividaes de les Fiestes Sacramentales de Piarnu, que van cellebrase durante tola fin de selmana, con mercáu, xuegos infantiles, cuentacuentos, teatru, paellaes, vermús y verbena. Una bona oportunidá d'escomenzar cola temporada de fiestes de prau.
Dexámosvos el reportaxe del tornéu del añu pasáu, nun vidiu realizáu polos hermanos d'O Varal.



III Troféu "Pitu Caleya"
Parroquia de Piarnu, Castrillón
Sábadu 12 de xunu, 18:30 h.

28 may. 2010

Vidios y Youtube

La fin de selmana pasada de liriu finó col espectacular encastráu de Fran, que-y diera la victoria nel I Abiertu maliayu de Liriu énte Dani, de los Sidrones. Por suerte, una cámara grababa'l desenllaz de la partida y, poro, l'encastráu tamién. Dende'l CNL editámoslu y espublizámoslu al traviés del youtubepa que tol mundiu lu pudiere ver.
Aprovechando'l momentu, y que yá había otros vidios del liriu (y del xuegu fora d'Asturies) subíos a esta páxina güeb, creyamos un canal propiu nomáu CNLiriu, qu'está a la disposición de toos, pa la collaboración y l'usu. Ye la nuestra obligación siguir col llabor d'espardimientu del nuesu xuegu de los dos palos.



24 may. 2010

Sorpreses asgaya en La Villa.

La tarde del sábadu 22 enllenóse de sorpreses pal mundiu del liriu.
L'equipu de los Sidrones escoyó la cancha polideportiva del Colexu Públicu "Maliayo" de Villaviciosa pa protexer a los machorradores y al públicu del sol y el calor intensos qu'escomiecen a agostar los campos yá dende bien ceo esti añu. Ellí yá taba too preparao dence les 4 de la tarde pa escomenzar la partida oficial y, dempués, l'abiertu. Ensin embargo, l'escomienzu retrasóse hasta la llegada de buena parte de los xugadores, pa completar los equipos, polo que los equipos decidieron acortiar a 20 el númberu de carreres de la partida. Solo l'equipu organizador y Asturliriu s'alcontraben en puntu. Pela so parte, Espor[a] y Quirinal apaecieron en cuadru. Y los gaiteros de Camaretá, sufriendo la inconveniencia de que l'horariu de la xornada coincidía colos ensayos musicales de la escuela de música llar del equipu, solo pudieron contar con trés xugadores, polo que diben quedar ensin puntuar ficieren lo que ficieren. LLamentábense dempués, porque lo que ficieron nun foi poco.

Escomenzaron con fuercia la partida los xugadores del equipu llocal. La irregularidá de les anteriores xornaes paecía emborrinase y, de les machorres de Toño, Xandru -la nueva incorporación-, Paula, María y Portali ficieron una espléndida primer parte de la partida, que los allugaba al primer puestu, con 20 puntos, por delantre d'Espor[a] (18), Asturliriu (15) y Camaretá (17), quedando descolgáu Quirinal (9).

Pravia encastrando y Xermán, de fondu, pilares de Quirinal.

Nesti momentu asocedieron cinco carreres qu'igualaron al máximu posible la competición. Pacheco y Abel desendolcaron el meyor xuegu de so y algamaron ná menos que 14 de los 15 puntos posibles, llevando a la Camaretá a la tiesta de la partida. Por detrás, Asturlirio, Espor[a] y Sidrones empataben a 22 puntos y quirinal casi se doblaba pa llegar a los 17.

La emoción taba por tolo alto. Por un lláu, porque la Camaretá podía acabar col monopoliu de victories d'Espor d'Asturies. Por otru, porque la incomparecencia del grupu de 4 de los noreñenses facía tremendamente valiosu'l segundu puestu, con vistes a la xeneral del Campionatu.

Les cinco carreres diben pasando y el trescursu de la partida diba aclariando poco a poco les coses: Quirinal nun yera quien a llegar a los primeros puestos y la Camaretá distanciábase per enriba. LLegábase a la última carrera cola incertidumbre de quién se fadría colos 6 puntos de partida: Sidrones y Espor[a] teníen 27 puntos de carrera, por 25 d'Asturlirio. Sedría l'esporu César quien s'apuntara los 3 puntos, por delantre de María, de los Sidrones, que se fizo con 2.

El recuentu final ya oficial fízose esperar, anque quedaba claro que la Camaretá de Liriu de Noreña ganaba la partida con ná menos que 36 puntos de carrera. Magnífica foi l'actuación de los tres machorradores que, ensin los ñervios de tener que faer un bon papel pa puntuar, ficieron volar los lirios como naide nel pabellón del colexu maliayu. Yera la primer sorpresa de la tarde.

Los representantes de la Camaretá el sábadu, que ganaron la partida: Abel, Fran y Pacheco.

Espor[a] facíase col segundu puestu por un solo puntu de carrera (30) de distancia respeutu a los anfitriones (29), que desmotraron un ameyoramientu tremendu en comparanza coles anteriores xornaes. Asturlirio (25) quedó cuartu y Quirinal (22) coló p'Aviles cola cabera plaza.

La clasificación xeneral del Campionatu d'Asturies de Liriu 2010 dexa nun cómodu primer puestu al equipu uvieín d'Espor[a] con 18 puntos de partida, siguíu d'Asturlirio con 9, la Camaretá y los Sidrones con 7 y Quirinal con 5. Bien diferente taría l'asuntu de nun incomparecer la Camaretá: a estes altures taría segundu con 13 puntos a solo 3 d'Espor[a].

De secute, y colos congregaos dando buena cuenta de les viandes ufiertaes pola organización –a destacar la carne empanada de Portali, alimentu de campeones- dióse escomienzu al I Abiertu maliayu de liriu con 21 machorradores inscritos. Foi esti un tornéu rápidu, con carreres emocionantes y güelpes tremendos.

Pela parte alta del cuadru, Pepa alcanzó les semifinales dempués de desfacese del so compañeru d'Espor[a], Carlos Suari. El debutante de la Camaretá, Fran esnaló per enriba de Enrique (Asturlirio) y venció a Pepa en dos carreres.

Fran, de la Camaretá, pa encastrar dende lloñe.

La parte baxa foi más pareya. Igualáu foi l'alcuentru n'octavos ente Pravia (Quirinal) y Pacheco (Camaretá), que se les vieron con Sergio (Espor[a]) en cuartos de final, carrera que finó con un nuevu empate, esta vez a trés xugadores, que se desondolcó con una apretada victoria de Sergio, que pasó a semifinales. Ya igualáu foron los otros cuartos, anque Dani (Sidrones) ganó'l desempate a Xermán (Quirinal), dempués del encastre imposible del gallegu, que dio muestres, una vegada más de la so calidá téunica. Como en Noreña, Sergio y Dani volvíen a chocar y, otra vuelta, volvía a ser el de los Sidrones quien llegaría a la final por 3-2.

Dani algamó la primer carrera, dexando claro la so capacidá competitiva nos torneos eliminatorios, pero Fran sumó'l puntu de la segunda. Y llegó entós la sorpresa doble de la xornada, cuando Fran dio los güelpes d'aniciu de la carrera y encastraba el liriu n'ún. Dani baxo los brazos y nun pudo conseguir el so segundu títulu consecutivu.

Podiu del I Abiertu maliayu de liriu: 3. Pepa (Espor[a]), 1. Fran (Camaretá), 2. Dani (Sidrones)

La clasificación del Campionatu d'Asturies de Liriu Individual reflexa la regularidá nes partides oficiales de Carlos Suari (Espor[a]) y de Toño (Sidrones), con 26 y 21 puntos respeutivamente. Carlos volvió a ser el machorrador más granible de la partida con 10 puntos algamaos de 12 posible y un cociente de 0.83. Pela so parte, Toño roblaba el 77% de los puntos que xugó. La gran actuación de Pacheco, de la Camaretá, vióse reflexada con los 6 puntos del tercer puestu. Exaequo, los 6 puntos nes tres carreres de Xandru, de los Sidrones, y Tere, d'Asturlirio, dáben-yos los 5 puntos de la cuarta plaza. Y, entrando na clasificación, el chilenu d'Espor d'Asturies César, con dos puntos, y les Sidrones Paula, Portali y María. Dende l'abiertu, el maliayu de la Camaretá, Fran algamó 6 puntos, 5 por ganar y 1 del plus por encastrar. Dani, finalista, sumó 3 a los consiguíos en Noreña, Pepa estrenóse con 2 y Sergio añadió el del so cuartu puestu a los 3 del so sextu puestu de partida, subiendo na xeneral a la cuarta posición.

La Camaretá fizo un espléndidu doblete na villa de Maliayo, nuna xornada onde los Sidrones dexaron claro que yá-y tomaron el pulsu a la competición. Grandes incorporaciones estos equipos al Conceyu Nacional de Liriu esti añu. Yá nun pregunten, apunten los triunfos. Felidaes a dambos.

La siguiente xornada, en xunu, tará muerganizada pol equipu avilesín del Quirinal. Habremos viaxar, de xuru, a la mítica plaza castrilloniega de Piarnu, teniendo como abiertu'l del míticu "Pitu Caleya". Tovía tá too nel aire, menos el seguru buen momentu de convivencia. Informaremos en detalle de too, equí, na páxina del liriu.


17 may. 2010

3ª Xornada del Campionatu.


L'equipu de los Sidrones organiza esti sábadu la 3ª Xornada del Campionatu d'Asturies de Liriu y escueye Villaviciosa como escenariu pa la disputa de la partida por equipos y del I Abiertu maliayu de liriu.
Los
Sidrones, equipu residente en básicamente en Xixón, ye nuevu esti añu nel Campionatu CNL y, pesie a la so irregularidá dientro del tornéu por equipos, destaquen con ciertes individualidaes, como Toño, tercer clasificáu na xeneral provisional del Campionatu Individual, o Dani, que s'estrenó en Noreña col triunfu nel Abiertu del Picadillu.
Ye esta bona ocasión pa algamar unos bonos puntos que alloñen al equipu de la última posición que comparte con
Quirinal, dempués de los problemes del equipu avilesín pa componer una alliniación completa. Por enriba, Espor d'Asturies busca mantener la imbatibilidá qu'algama dende l'añu pasáu, pero la sorprendente debutante Camaretá y el decanu Asturilirio de xuru que se sumen a la xera d'igualar la clasificación.
Dempués de la partida por equipos, va disputase'l
I Abiertu maliayu de liriu, valederu pal Campionatu d'Asturies de Liriu Individual. Nuevamente, sedrá un tornéu de llibre participación pa tou aquel que quiera.
¡Vémonos na villa de Maliayo!

Sábadu, 22 de mayu
3ª Xornada del Campionatu d'Asturies de Liriu

A partir de les 16 hores.
I Abiertu maliayu de liriu
(Válidu pal Campionatu Individual)
Acabante la partida por equipos
(Inscripciones mientres de la partida)
Colexu Públicu "Maliayo"
Cai de Máximino Miyar, s/n
Villaviciosa