18 dic. 2009

Alcuentru de Navidá

La familia'l liriu vuelve a reunise na mítica pista averada al Polideportivu de Piedrasblancas, en Castrillón, pa despedir esti bayurosu añu 2009 y felicitar a toos les fiestes y el nuevu añu faciendo daquello que-mos presta tanto: xugar al liriu.

La cita va ser a les 16 hores del domingu, día 20 d'avientu, nun eventu organizáu por Quirinal Liriu Sport. Los partes meteorolóxicos predicen muncho frío, asina que lo meyor ye ponese en marcha col liriu y la machorra y preparase pa pasar una bona tarde ente rises y alcordances.

¡Queremos atopavos a toos, anque nun pasemos llista!



26 nov. 2009

I Alcuentru Xixón de Liriu


El domingu 29 de payares, dende les 12 del mediudía hasta les 14 hores, nel tendayu del Muséu del Pueblu d’Asturies, el club Espor d’Asturies organizará’l I Alcuentru Xixón de Liriu.


Espor[a] ye un club esportivu de reciente creyación, pero yá en menos d'un añu de vida, tá averando los xuegos tradicionales asturianos a tola xente que-y preste pasar un momentu afayaízu al rodiu la nuestra cultura. Asina, fai dos selmanes marchó a Noreña a collaborar nel Amagüestu entamáu pola Escuela de Música y Danza Tradicional de la villa condal; en setiembre, organizaron unos xuegos pa los neños y los mayores de la Casa de Asturies en Valencia y foron recibidos por Ángel Gómez, direutor de la Escola de la Federació de Jocs Tradicionals de la Comunitat Valènciana, presentando'l modelu de liriu CNL nun alcuentru de "pic i pala" (como se conoz al nuestru xuegu ellí) en Beinfairó de la Valldigna; y, en xunetu, representó a Asturies nel "Encuentro Internacional de Juegos Tradicionales" d'Aranda de Duero, cola Asociación del Bolu Vaqueiru y la Peña Bolística Reculta.


Esta fin de selmana, Espor[a], club fundador del Conceyu Nacional de Liriu, quier llevar el liriu hasta Xixón. Esti I Alcuentru Xixón de Liriu permitirá a los asistentes más mozos descubrir el xuegu y, a los mayores, volver alcontrase con elli. Les actividaes de la cita consistirán nun taller práuticu de conocencia de les normes estandarizaes pol CNL y del manexu de los preseos del xuegu, la muestra d’otres variantes del mesmu y el desarrollu del Primer Tornéu Open “Bollu Preñáu” de Xixón, abiertu a la participación de tol mundu.


El Conceyu Nacional de Liriu tará ellí ufiertando tol sofitu que faiga falta pa qu'iniciatives comu esta faigan medrar el nuestru espor.


17 nov. 2009

Notes de prensa

A cuentes del fin del I Campionatu d'Asturies de Liriu y de la III Copa Cantábrica, pudimos atopar les siguientes notes de prensa al respeutu. Contamos con que-vos presten.


10 nov. 2009

Fiesta del liriu en Castrillón

El mal tiempu d’airón y lluvia que solmenó con fuercia’l Cantábricu, nun pudo col anticiclón de liriu qu’arrasó el conceyu de Castrillón esta fin de selmana cabera.

El sábadu de tarde, púnxose fin al I Campionatu d’Asturies de Liriu organizáu pol CNL cola disputa de la tercer xornada. Otra vuelta, solo dos equipos s’averaron a la pista de Piarnu, anque tamién en cuadru poles numberoses baxes. Asina, los machorradores de Quirinal Liriu Espor y Espor d’Asturies diéron-y la espalda al cutu que tarecía y llucharon por facese col alcuentru hasta la última carrera. Quirinal, con unos fantásticos Hevia y Xermán, queríen la primer victoria oficial de la temporada, mientres que Carlos, Xuacu, Luis Carlos y Sergio nun teníen en mente perder la imbatibilidá. A falta d’una carrera pa les 32 acordaes, un magníficu Hevia durante tola xornada dexó que fuxiera la victoria a pie de castru pa que Sergio, en tres güelpes, abocara’l liriu y los cuatro puntos pal equipu de so. El resultáu final foi 84 pa Espor[a] por 83 pa Quirinal.

Concluyía asina el Primer Campionatu d’Asturies de Liriu, cola siguiente clasificación:


A nivel individual, la clasificación de xugadores nel campionatu quedó de la siguiente forma:

La propuesta de creyar un campionatu individual oficial (Machorra Más Granible – MMG’10) y paralelu al d’Asturies por equipos ye una de les distintes temes que’l CNL tien de tratar pa que l’añu que vien la propuesta de rexurdimientu del liriu se sofite.

El domingu pela mañana, llegó la espedición gallega a Piedrasblancas pa disputar la III Copa Cantábrica de Liriu/Billarda a la seleición d’Asturies, compuesta básicamente por xugadores CNL y por dalgunos paisanos residentes en Galicia. Dempués d’interpretar los himnos d’A Auténtica –como se conoz a la selección gallega de billarda- y d’Asturies y conseguir que lloviera entovía más colos cancios, púnxose en xuegu la Copa, dos veces disputada y dos veces ganada pol combináu.



Galiza escomenzó con llanzamientos llargos qu’acercaben la billarda al castru d’una forma extraordinaria y la confianza en ganar como n’años anteriores foi espoxigando, pesie a que la competición regulábase coles normes CNL y los sos palanadores nun taben avezaos a los tiros a distancia curtia pa encastrar. Ensin embargu, Asturies calteníase bien ceo ya esperanzada de dar la sorpresa. A la fin de la primera vuelta de carreres, la ventaya gallega yera mínima y, tres la segunda, el xuegu taba empatáu. La moral asturiana subía y la gallega esmolecíase escontra’l castru, hasta que se llegó al resultáu final: Asturies 31 – Galiza 25.



El conceyal de deportes del Ayuntamientu de Castrillón, Bernabé Peña, fizo entrega de la Copa Cantábrica al seleicionador asturianu Pepe Pravia y un troféu en forma d’horru a Ginés Rodríguez, responsable del combináu gallegu. Pa completar l’actu, l’organizador del alcuentru, Hevia, fizo tamién entrega d’un presente pa Calvete, nun sintíu homenaxe pa ún de los mayores impulsores de la billarda nel país vecín, que compartimos dende’l CNL.



Dempués de la xinta d’hermandá en Casa Orisia de Las Bárzanas, enllena cancios dirixíos por Xuacu a la gaita asturiana y Carmiña a la voz gallega, y rises por dambes partes, volviese a la pista ateyada del Polideportivu de Piedrasblancas pala disputa del Abiertu del LLacón Internacionalista, esta vegada embaxo la normativa gallega de la LNB.



Casi mediu centenar de participantes y varies rondes, ficieron que’l llacón que colgaba d’una de les porteríes onde s’instaló el varado tardara n’atopar dueñu. Pa sorpresa de toos, ya incluso pa elli, el vencedor foi Sergio, d’Espor[a], que ganó la final al machorrador gallegu Marcos (Remourelle Bulls), Reyes (d'Os Outros) foi tercera y Xuacu (tamién d’Espor d’Asturies) foi l’otru semifinalista.



La organización del alcuentru, l’hermanamientu cola LNB y los collacios d’O Varal, los resultaos positivos p’Asturies y’l sofitu del modelu CNL ficieron d’estos dos díes una fiesta total pal xuegu del liriu y pal so procesu de rexurdimientu y esportificación. Ensin embargu, dende’l Conceyu Nacional de Liriu queremos quedamos con una imaxe: unos mozos que taben xugando al fútbol cuando llegó la espedición de la Copa Cantábrica dempués de la xinta, quedaron xugando al liriu a la nuestra marcha. Queremos munchos como Nacho y munchos como Pablo, munchos como estos rapaces de Piedrasblancas. Ensin dubia, esi ye’l camín.


(Semeyes de Daniel Rodríguez)


5 nov. 2009

Fin de selmana de liriu












Esta fin de selmana prósima va enllenase d’actividaes relaicionaes col liriu en Piarnu, Castrillón.

El sábadu 7 payares, a les 16 hores, va disputase la tercera y cabera xornada del Campionatu d’Asturies de liriu 2009. Espor[a] -virtual campión-, Asturliriu y Quirinal Liriu Espor prometen un alcuentru de lo más igualao, dempués de les cites braniegues de LLamorgal y Avilés, que quedaren atrás cuantayá. Esta tarde’l sábadu va sirvir, amás, de preparación pa les actividades del día siguiente, ensin escaecer la importancia que tien de por sí'l fechu d’habese completao con ésitu la primer temporada d’esti intentu de rexurdimientu del xuegu del liriu, que ye’l CNL.

El domingu 8 payares, a les 11 de la mañana, será’l momentu del alcuentru ente les seleiciones d’Asturies y de Galicia na III Copa Cantábrica de liriu/billarda. Los hermanos de la Liga Nacional de Billarda viaxarán cola idega de facese de nuevu col títulu, faciendo valir la so esperiencia y pesie a disputase esti añu coles regles asturianes. Más avezada a elles, la seleición asturiana, con miembros de los tres equipos CNL, esperen dar la sorpresa y conquistar el primer títulu cantábricu de so.

Dempués de la xinta en Casa Orosia, disputarase el I Abiertu del “LLacón Internacionalista”, a les 16 hores, que pondrá fin a esta fiesta del liriu y del espor tradicional.

¡Esperámos-vos en Piarnu!


25 ago. 2009

Igualdá na II Xornada del Campionatu Asturianu de Liriu

La tarde’l sábadu 22 d’agostu celebróse’l segundu alcuentru del CNL, nes instalaciones polideportives avilesines de La Madalena. El día de sol y l’enfotu de Quirinal Liriu Espor na organización ficieron del eventu un éxitu de públicu.

Escomenzó la xornada cola disputa del I Abiertu Llonganiza d’Avilés, camudando l’horariu previstu a la espera de la llegada del equipu machorrador d’Asturliriu. Con casi 25 participantes, foi l’espora Luis Riaño’l que se fizo col embutíu de premiu al gana-y la final al gallegu Xermán Viluba, figura de la hermana Liga Nacional de Bilharda, y xugador del equipu del Quirinal.

Dio pasu l’abiertu a la 2ª xornada del Campionatu Nacional cola ausencia del equipu de Las Bárzanas, polo que se disputaron la victoria los dos primeros clasificaos del tornéu: Espor[a], después de facese colos cuatro puntos en Llamorgal, y Quirinal Liriu Espor, col puxu de xugar en casa y estrenar equipación colorada. Alcordóse disputar l’alcuentru faciendo dos carreres paraleles cada vez, p’axilizar la competencia.

Los machorradores foron por Quirinal: Mora, Pravia, Xermán, Julián y Hevia; y por Espor[a]: Pepa, Sergio, Luis, Carlos, Iyán y Xuacu.

Les primeres carreres dieron ventaya al equipu organizador, col plantel al completo dempués de les ausencies en Llanera, pero’l sestetu uvieín foi sele igualando un alcuentru non ensin polémica: la curvatura d’un liriu de rebollu presentáu pol equipu avilesín fizo que surdieren les protestes cuando, al ser encastráu, siguía tocando fuera, y poro la carrera nun se daba como finalizada.

El tantéu yera mui altu al contase la victoria y l’empate con 3 puntos y la derrota con 2 y les distancies nun fueron destacables hasta que los machorradores d’Espor[a] sacaron el so meyor xuegu na segunda ronda de carreres de so, faciendo Iyán el primer “encastráu” de la competición, al meter el liriu nel castru del güelpe de salida. Quirinal sólo pudo mantener la distancia pa que’l tantéu final quedara en 74 pa los avilesinos y 80 pa los capitalinos.

Con esta victoria, Espor[a] algamará’l Campionatu Asturianu de Liriu con sólo presentase a la siguiente cita, al siguir al frente de la clasificación con 8 puntos, por 4 de Quirinal y 1 d’Asturliriu.

Depués, y a lo llargo, la espicha isotónica cortesía de Quirinal, disputóse un partíu amistosu ente los equipos CNL y el combináu “Sidrones”, formáu nos cursos de branu de l’Academia de la Llingua, ente Candás y Santantolín d’Ibias, que punxo la nota de color col so bon humor a la hora d’animar a los de so y a los contrarios. Dende’l Conceyu Nacional de Liriu esperamos que s’animen a formar un equipu pal añu que vien y asina poder contar coles sos sorises y la so afición pol liriu per munchu tiempu más.

La victoria del partíu quedare en casa y l’equipu coloráu punxo asina broche d’oru a la xornada de liriu qu’organizó.

13 ago. 2009

Cuenta atrás pa la 2ª xornada


Gracies a la organización de Quirinal Liriuespor, la segunda xornada del Campionatu Asturianu de Liriu yá ta en camín. El centriquísimu Poliesportivu de La Madalena va llevar al corazón d'Avilés esti espor que yá caleya con pasu firme escontra l'ésitu social más rescamplante. Espor[a] ha defender el so lideralgu mentanto que los locales, y los per agora caberos na clasificación, Asturliriu, fadrán tolo posible por esborrar a los carbayones del so puestu. Too ello nel ambiente más lúdico-isotónicu na defensa de la cultura asturiana, dende les cuatro y media la tarde na instalación avilesina, y con espaciu, nel Abiertu Llonganiza, pa que cualesquier machorrador espontaneu gane la riestra d'embutíu autóctonu.

¡Puxa'l liriu! ¡Puxa'l CNL!

18 jul. 2009

Espor[a] algama la victoria na primer xornada del Campionatu Asturianu de Liriu


L'españíu de les machorres atapó'l soníu de les avionetes na mañana d'ayeri en Llamorgal. Asturliriu, Quirinal y Espor[a], aportaben a la primer xornada del Campionatu d'Asturies de Liriu cola enerxía concentrao de munchos meses de preparación. Cola organización del Conceyu Nacional de Liriu y con Espor[a] como anfitrión entamaba un camín nuevu pa esti vieyísimu xuegu asturianu, agora espor.


Depués de la firma del Acuerdu pa la Celebración del I Campionatu d'Asturies de Liriu por parte de los tres representantes de los equipos participantes, arrincaba la xornada.


Durante les primeres tiraes de la mañana, l'empate foi la tónica xeneral, l'equipu de Quirinal, capitanéau pol seleccionador nacional, Pepe Pravia, y col fichaxe extracomunitario d'ultima hora Xermán Viluba, amosaba les sos ganes de victoria, asina mesmo la marea azul venida de Las Barzanas sofitaba incondicionalmente al equipu d'Asturliriu, capitaneáu por Javier.


Mentanto enfriaba la sidra isotónica l'equipu d'Asturliriu diba quedando atrás pesie a los güelpes de calidá de Falo con un 83% d'aciertu, asina nun yeren a acercase a Quirinal que ganaren 6 carreres siguies, nin a Espor[a] que tenien en Sergio Buelga y Xuacu Rodríguez con un 94% y un 89% d'aciertu respectivamente, a los sos meyores machoradores.


Tres les trenta carreres de la tirada oficial, Espor[a] resultaba vencedor con 73 puntos, siguío por Quirinal con 65 y en tercer llugar por Asturliriu que llograba 51.


Depués de la espicha isotónica y de xermandía y yá nun ambiente entá más lúdicu, los Espor[a] Iyán González y Xuacu Rodríguez tuvieron nel primer y segundu puestu del Abiertu Barreñón, acompañaos por Luisa (d'Avilés), inesperada finalista que sorprendió nel dominiu de la machorra nesti tornéu disputáu a eliminatories directes. Cola entrega de premios cortesía de l'Academia de la Llingua Asturiana y la correspondiente semeya de familia, pesllóse una xornada histórica pal espor tradicional asturianu.

Nel próximu més d'Agostu tendra llugar la II Xornada de Campionatu n'Avilés, con Quirinal Liriu Espor como anfitriones, y de la que bien ceo vais tener más información equí.

13 jul. 2009

¡¡Arrincaaaaamos!!


Como adelantaramos delles hores primero, esti sabadu 18 de Xunetu, nu Centru Deportivu de Llamorgal, va cellebrase la primer Xornada d'esti Campionatu Asturianu de Liriu, que ya yé una realidá.

A les 10:00 tendrá llugar la llegada de los equipos participantes, Asturliriu, Quirinal Liriu Espor y Espor[a], toos ellos fundadores del Conceyu Nacional de Liriu, y nun primer actu procederan a roblar los principios que van rexir esta competición.

Depúes de los actos protocolarios, llega'l momentu de amenar los lirios escontra'l castru del CNL. Los participantes disputarán un total de 30 carreres, tres les cuales conoceremos al vencedor d'esta primer Xornada, fechu historicu pal espor d'esti país.

Darréu de la competición oficial, ye hora de apurri-y el liriu a tou aquel que quiera participar nel I Abiertu Barreñón, que tará en xuegu dende les 12:00 hasta les 13'30, coincidiendo col avituallamientu, preparáu pol CNL pa tolos participantes.

Pa tolos que naguabeis por esti momentu, equí ta, ya llega, el Campionatu Asturianu de Liriu ye una realidá, entama la revolución de l'activida física tradicional.

12 jul. 2009

El Liriu encastra con Pierre Parlebas


Últimes noticies dende l'hotel Julia, el búnquer asturianu na Ribera del Duero.

Na xornada de güei el CNL representáu equí pola delegación d'Espor[a], escribió una de les primeres páxines doraes de la so historia. Pierre Parlebas, sociólogu, matemáticu, llingüista, psicólogu, profesor eméritu de la Sorbona y fundador de la praxeoloxía motora (ciencia central de l'actividá física) esllumó güei na cancha central del C.D. Michelín d'Aranda de Duero. En breve daremos testimoniu gráficu del manexu de la machorra del qu'anguaño ye consideráu padre de la motricidá moderna, mesmo que Newton inaugurara la Física de güei.

21 jun. 2009

El Pitu Caleya voló pa tierres gallegues, pero'l de competición quedó n'Asturies


Esti domingu 21 de xunu en Piarnu, como ye vezu, vivióse otra xornada más de folixa y reivindicación del xuegu tradicional col liriu como protagonista, primero na "procesión", col I Tornéu "Pitu Caleya", y depués na "romería" col Open "Pitu de competición".


Darréu de comprobar l'estáu del tarrén de xuegu y d'armar el castru onde había aparar el liriu, los xueces del CNL realizaben el sortéu ente los 15 participantes, ente los que taben dellos representantes d'Asturliriu, Quirinal Liriu Espor y Espor[a], amás de la intrépida expedición de la LNB. Pa "la hora la procesión" arrincaba'l I Tornéu "Pitu Caleya". Na primer ronda los participantes avezaos a otros "pavimentos" menos abegosos y a metes más amplies entamaben a garrar maña pa llevantar el liriu y encastralu, mentanto'l pitu caleya pasiaba pel prau inconsciente del so destín en manes gallegues.


10 xugadores pasaben a la semifinal faciendo 3 grupos onde yá naide bromiaba, col son de la gaita de fondu, Carlos (Espor[a]) yera'l primeru en clasificase pa la gran final, depués sedría Daniel (Billardeiros Musicais) y, nuna dura semifinal, Eric (Billardeiros Musicais) y Xuacu (Espor[a]) llegaben a la fin con un empate técnicu, pa que yá, na carrera de desempate, fora Eric el terceru n'entrar na gran final del I Tornéu "Pitu Caleya".


Emprincipiaba la final col son de la tonada, Daniel amosó dende'l primer güelpe la so intención de ganar esti tornéu y Eric nun quería quedar atrás, asina entamaron a ponese prietes les coses pal únicu representante asturianu, viendo como'l pitu caleya entamaba a cruciar la ría l'Eo. Depués de 3 carreres Daniel (Billardeiros Musicais) proclamóse xustu vencedor d'esti I Tornéu "Pitu Caleya".


Yera la hora la xinta y Casa Orosia (Las Bárzanas) aguardaba la llegada'l famientu cortexu'l CNL. Fabes, berces, arroz asturiano, carne asao, adobu, rollu bonitu, tarta xelada, tarta d'almendra, natilles, gaita y dellos chupitos, calecieron les ansies de revancha. Asina, col banduyu bien llen treslladábemos otra vez machorres y lirios pa la pista selvática de Piarnu, a la gueta d'una victoria asturiana, depués de calecer con otres formes tradicionales de xugar col liriu y la machorra.


Pa complicalo un poco más decidimos mudar el castru pa onde l'herba taba más alto y asina col calor, la dixestión y l'altor del verde, pone-y difíciles les coses a los collacios de la LNB. Entamaba a la mesma hora que la romería, l'Open "Pitu de Competición" nel qu'otros 15 participantes lluchaben por una plaza na final. Quiciabes la fartura, quiciabes la mano técnica de los asturianos... el podium acabó siendo nacional y sólo'l gran Xermán pudo metese cuartu como representante gallegu, mentanto que los tres Billardeiros Musicais que brillaren durante la mañana, viéronse na metá baxa de la clasificación.


Tolo contrario que los Espor[a] Xuacu, Sergio y Carlos, que tuvieron na metá alta, consiguiendo amás el trunfu verspertín dende la machorra-micrófonu del director y locutor d'Acuto que yá fixera bronce pela mañana. Xuacu caltuvo la regularidá col so séptimu puestu -fuera quintu pela mañana- y Sergio facía una estrena de luxu con un honoríficu quintu puestu na verbena de Piarnu. El liriu astur garra rumbu nuevu y apuesta fuerte dende la mocedá de los recién llegaos. El Conceyu Nacional de Liriu yá caleya solu -y non en círculu- y bien ceo vais conocer el Campionatu que ta en camín. La independencia aportó al espor del paliyu y la machorra.


16 jun. 2009

I Tornéu "Pitu de caleya"


Depués de la gran actuación del Combináu Asturianu en tierras del país vecín nel IV Tornéu Parroquial "Año Preto", ye la hora de poner en xuegu el nuesu preciáu "Pitu de Caleya". El CNL entama esti I Tornéu Abiertu "Pitu de Caleya", onde amás de los anfitriones de Kirinal Liriu Espor, l'equipu d'Asturliriu y espor[a], vamos tener presencia de los collacios de la LNB y de tola xente qu'esti domingu 21 de xunu quiera arimase a Piarnu (Castrillón) onde a les 11'30 va emprincipiar la gran competición, segunda cita de la pretemporada pa los equipos del país, onde dir afinando los machorrazos, pal esperáu I Campionatu Nacional de Liriu, del que tendremos feches definitives la selmana qu'entra.

Pol compromisu colos xuegos y l'espor tradicional, porque va ser una xornada histórica de folixa y reivindicación y porque de xuru que vos prestará xintar un pitín de caleya, esperamos que vos animeis y atendáis la llamada del CNL.

ESTI DOMINGU 21 TOOS A COMPETIR POL I TORNÉU NACIONAL "PITU DE CALEYA"

14 jun. 2009

Asturies ruempe les machorres na llucha pol "Año Preto"


La Selección Asturiana de Liriu, formada por Pravia, Toño, Urbano, Luis, Carlos y Xuacu, ta acabante de llegar de Celeiro de Mariñaos, onde compitieron nel IV Tornéu Parroquial "Año Preto". El Combináu Nacional, que na llucha pol triunfu terminó rompiendo les machorres, quedó nun meritoriu cuartu puestu tan solo vencida pol gran equipu de Vilamar, ganador del tornéu.


Asturies acompañada pol orbayu gallegu entamó la so competición nuna primer partida escontra'l gran equipu de Vilamar que dominó dende la primer carrera. Na metada l'alcuentru l'esfuerzu fechu polos nuesos xugadores ganando delles carreres nun foi suficiente pa baltiar la diferencia algamada por Vilamar, que muncho más concentraos superaron al conxuntu asturianu, algamando la segunda victoria pa Vilamar, que yá ganara a Xove primero, dexando a Vilamar clasificáu pa la final.


Depues del descansu y les felicitaciones a los clasificaos, yera la hora del encuentru ente Xove y Asturies, nel que se definiríen les places de la cuarta a la duodécima. Dende les primeres carreres entamó a calecese l'ambiente calteniéndose cásique de contino un empate ente los dos equipos. A falta de 5 carreres Asturies ganaba por 3 al equipu de Xove. Nesti momentu los nuesos dalgo nerviosos fallaron nes tiraes finales, pero dexó d'orbayar na pista central de Celeiro y apareció'l seleccionador nacional, Pravia que con dellos machorrazos maestros dió un emburrión al equipu consiguiendo la victoria y la cuarta plaza na clasificación final, faciendo asina rescamplar el potencial de la nuesa selección, asitiándose como firme candidata a la Copa Cantabrico de Liriu.


Darréu del espectaculu esportivu yera la hora de la sesión vermú onde se presentaría el poemariu "Orbayu d'alfileres" de Carlos Suari y el tema Circu de Zimmer103, inspiráu nel poema de mesmo títulu. Y depués d'esti momentu artísticu-reivindicativu, llegó la "Guagua (Tropical) da LNB" que nos llevaría a Reinante pa la esperada xinta de xermandía con productos del país vecín y la "Callada coma resposta.....".


Na tarde de Celeiro apaeció'l sol faciendo que secara la pista pa qu'entamara la final a 3 d'esti IV Tornéu Parroquial "Año Preto". Asina emprincipió l'esperáu momentu, nel que los equipos de Furabolos, Vilamar y Billardeiros Musicais, compitieron pol "Año Preto", que depues de munches carreres nes que l'empate foi la tónica xeneral, el nuevu conxuntu de Vilamar algamo la victoria faciendose asina col codiciáu reciellu, esti añu blancu.

Pero esti tornéu nun termina equí, como ye tradición nes selmanes vinientes tendra de xugase'l tercer tiempu, folixa-xinta pa degustar el "Año Preto", nel chigre de Lola de Remourelle.

Amás l'espor tradicional va tener continuidá nel nuesu país esta mesma selmana. El domingu 21 de xunu en Piarnu (Castrillón) va xugase el I Tornéu "Pitu de Caleya", entamáu pol CNL (Conceyu Nacional de Liriu), que sirvirá de sofitu pa echar a andar l'ansiáu Campionatu del que vais tar informaos equí mesmo.

10 jun. 2009

Asturies compite pol "Año Preto"


Esti domingu 14 de xunu la Selección Asturiana de Liriu va participar nel IV Tornéu Parroquial "Año Preto" en Celeiro de Mariñaos (Ribadeo) convidaos pola LNB.

El Combináu Nacional formáu por Pravia, Toño, Urbano, Luis, Carlos y Xuacu va tar lluchando dende primer hora de la mañana por traer el "andoscu prietu" p'Asturies. A les 11:00 hores tendrá que medise al temible equipu de Vilamar, que cuenta con dellos de los estandartes de la selección gallega nes sos files. Y a les 12:00 tocará competir con Xove que de xuru nun van poner nada fáciles les coses pa los nuesos, que llucharán pa clasificase a la gran final que se xugará a les 16:30 na pista central de Celeiro.

El Equipu Asturianu formáu por xente de AsturLiriu, Kirinal Liriu Espor y espor[a] y capitaneáu por Pravia nun va renunciar a nada y lluchará por esti tornéu, que tamién tien traces de preparatoriu pa la Copa Cantábrico que se celebrará a finales de branu.

Amás de lo puramente esportivo, a les 13:00 na cantina de Celeiro podremos disfrutar d'una sesión vermú onde se presentará el poemariu "Orbayu d'alfileres" de Carlos Suari y el tema Circu de Zimmer103, inspiráu nel poema del mesmu títulu. Y depues d'esti momentu artísticu-reivindicativu, llegará la esperada xinta de xermandía con productos del país vecín.

Asina qu'esperamos la respuesta d'una marea azul qu`acuda a Celeiro de Mariñaos pa sofitar a Asturies nesti IV Tornéu Parroquial "Año Preto".

12 may. 2009

CONCEYU NACIONAL DE LIRIU

El Conceyu Nacional de Liriu (CNL) ye un proyectu d'esportificación del xuegu del liriu, cola fin de dotalu d'una reglamentación estándar y d'un calendariu d'actividaes lúdiques, competitives ya educatives que permitan el so espardimientu y lu saquen del escaezu que'l xuegu, como buena parte del padremoñu cultural asturianu, sufre ente les nueves xeneraciones.

El CNL ta formáu por un grupu de persones, equipos y clubes esportivos dedicaos al llabor d'espardimientu del liriu, ensin ánimu de lucru.

EL LIRIU

Col nome de liriu conózse n’Asturies un refileru de xuegos que tienen como puntu en común l’usu de dos pieces de madera: una allargada, la “machorra”, y otra más pequeña y afilada pelos estremos, nomada “liriu”.

L’aición motriz común d’estos xuegos ye la siguiente: el xugador tendrá que llevantar el liriu del suelu golpiándolu cola machorra y, una vegada tea nel aire, aventa-y otra vuelta, bien p’alloñalu lo más que se puea, bien pa empobinalu a un sitiu determináu.

Tradicionalmente, yera un xuegu de cai practicáu por neños, anque nun privativamente varones. Anguaño, cola fin de recuperar el xuegu del escaezu, tá produciéndose un procesu d'esportificación, abanderáu polos miembros del Conceyu Nacional de Liriu.

Amás, anque esti xuegu seya tradicional asturianu, nun ye privativu d’Asturies: la mesma aición motriz espárdese dende la India hasta Cuba.


26 ene. 2009

Arrinca'l Campionatu Nacional de Liriu


Nesti friu hibiernu entama a dibuxase la forma de lo que va mudar nun referente internacional bien llueu, el Conceyu Nacional de Liriu.
Gracies a los esfuerzos d'Astur Liriu y Kirinal Liriu Espor padres del alitar y de la esportificación del liriu nesti país, el CNL ta a piques d'entamar el I Campionatu Nacional de Liriu.

espor[a] con sede n'Uviéu va ser la encargada d'abellugar esti fechu históricu pal espor del paliyu/liriu.

Nes selmanes vinientes tendréis más información, mentanto, dir afilando los lirios porque el I Campionatu Nacional de Liriu yá ta en xuegu!!!!