El sábadu 29 de payares, disputóse nel polideportivu de Piedrasblancas, la Copa Cantábrica de Liriu/Billarda, qu'acara a les seleiciones d'estos deportes hermanos d'Asturies y Galicia dende va ocho temporaes.
La partida
Otra vuelta, la partida tuvo mui abierta y nun se supo de qué parte de la ría del Eo diba quedar la Copa.
Xugóse, cuidando de les regles asturianes, al meyor de sesenta carreres, onde ún representante asturianu xugaba contra un gallegu. La victoria facía que'l so equipu sumara un puntu, dexando al otru ensin ná; en casu d'empate, dambos xugadores dexaben el casilleru vacíu. P'axilizar la partía, dixebróse'l tarrén del polideportivu en dos pistes: nuna escomenzaba Asturies y na otra, Galicia. Amás, y pa que'l tiempu de duración fuere menor, en dambes pistes se xugaben dos carreres a l'empar.
Por Asturies dispuatron l'alcuentru Lili, Xosín, Pepa, Arturo, Javi, Iyán, Xurde, Sergio y Muriego. El tapiegu, que xuega na Liga Nacional de Bilharda fue'l meyor de los asturianos, dexando namái una carrera empatada y algamando 6 puntos de 7 posibles.
Por Galicia, A Auténtica tuvo representada por Flores, el capitán, Geni, Franco, Manolo, Miguel, Daniel, Suso Villariño, Lucía, Xermán, Tonho, Jorge Galdo, Jorge, Sandra, Cortón y Outeiro.
 |
| Geni, de la seleición gallega |
El xuegu fue siempres equilibráu, tantu nel marcador como nes carreres, anque se notó la falta de competición d'esti añu por parte de los asturianos. Como suel ser normal, poles carauterístiques de dambos xuegos, los gallegos xugaben mui bien en llargo, pero costába-yos encastrar, dalgo qu'aprovechaben los asturianos, meyores nel xuegu curtiu.
Terminada la competencia na pista 1 y a falta de dos carreres na pista 2, el tantéu dexaba por delantre a Galicia con 2 puntos de ventaya. Los asturianos Lili y Muriego xugáronsela escontra Flores y Lucía, pero los nervios fueron quien pa con ellos y la victoria decantóse pal llau gallegu por un 27 a 29.
 |
| Lili, de la seleición asturiana |
La Copa Cantábrica, por sesta vegada (Asturies ganara dos veces), viaxaba na guagua galega a les vitrines de Ribadeo.
 |
| Foto d'hermandá, con Flores suxetando la Copa Cantábrica |
Abiertu'l Llacón Internacionalista
Dempués de la xinta d'hermandá, colos tradicionales chistes de Flores, vente participantes s'animaron a xugar l'abiertu. Cuatro grupos de cinco machorradores, pasando a la final el campeón de caún y el meyor de los segundos d'ente tolos grupos.
Nel grupu 1, Daniel impúsose con una autoridá ablucante nes cinco carreres, consiguiendo 10 punto y un varado (meter la bilharda na meta, o varal dende la salida).
Nel grupu 2, Flores impúsose con soberbia paecía, anotando 9 puntos de 10 posibles y dexando a Miguel segundu, con 7 puntos.
El grupu 3, fue'l más reñíu de toos, ganando'l tapigu Muriego con 6 puntos y un varado.
Por últimu, del grupu 4 clasificóse direutamente Suso Vllarino con 8 puntos y qedando segundu Pepe Outeiro con 7.
Un xuegu de desempate ente Miguel y Outeiro dio'l pase a la final al segundu que garró confianza y naide nun fue quien a paralu.
Na final a cinco, Muriego escomenzó con fuercia, garrando les victories nes dos primeres carreres y, anque pinchó, garró puntos nes otres tres, pa sumar 7. Outeiro, empató col tapiegu na segunda y con Daniel na cabera y sumó 7 puntos tamién. Daniel, nun fue quien a puntuar na segunda y, pesie a ganar dos carreres y faer un varado na tercera, nun consiguió garrar a los otros dos, quedando con 6 puntos. Suso Vilariño y Flores quedaron descolgaos de la llucha pola victoria, garrando 3 y 2 puntos, respeutivamente.
Asina les coses, hubo disputase un empate a tres carreres ente Muriego y Outeiro. Les dos primeres fueron repartíes y, na tercera, impúsose con claridá'l gallegu, que de dos machorrazos acabó coles aspiraciones del asturianu y con una bolsa d'embutíos como premiu.
Conclusiones
Pesie a los resultaos tan valeros nel xuegu, el realcuentru del Conceyu Nacional de Liriu dexa munches ganes de siguir p'alantre ente los machorradores qu'ellí s'aconceyaron. Y una idega bien interesante pa caltener l'enfotu por salvar esti xuegu: creyar una asociación deportivo-cultural qu'ufra una cadarma onde sofitase. Esperemos que, pal añu qu'entra, esti blogue vuelva a vese enllenu d'entraes, de semeyes y de xuegu.
