16 may. 2011

Lirios con muncha marcha

La mañana d'esti últimu domingu, el CNL averóse al tendayu del Muséu del Pueblu d'Asturies, en Xixón, con motivu de la tercer xornada del Campionatu d'Asturies de Liriu 2011. La organización corió a cargu del equipu de los Sidrones que tenía preparao too pa que la mañana saliera perfeuta ente lirios, sidre y empanaes y munchu sol.

Partida.

Los seis equipos competidores presentaron les sos credenciales enantes d'escomenzar la partida, que se retrasó unos minutos polos preparativos y el calentamientu de los machorradores.

Ensín embargu, esti tiempu de demora nun-y valió a Sergio, únicu representante d'Espor d'Asturies esta mañana, pa que llegara dalgún de los sos compañeros que, por unes causes o otres, nun apaecieron pel tendayu. Dempués llegaríen les llamentaciones énte'l resultáu algamáu pol compañeru. Espor[a], que yera líder de la xeneral enantes d'escomenzar la partida, quedaba yá ensin posibilidaes de puntuar na xornada, anque sí con plenu drechu pa llevar la victoria.

Sergio, d'Espora, nel iniciu d'una carrera.

Asturliriu Muyeres: Luisa, Ferrer, Tere y Joni.
Asturliriu Homes: Falo, Enrique y Javier.
Sidrones: Toño, Lili y María.
Quirinal: Arturo, Hevia y Juan.
Espora: Sergio.
Camaretá: Dani, Xosín y Aarón.

Asina les coses, los Sidrones, de la mano del so capitán, Toño, foron los primeros n'encastrar y algamar los dos puntos de carrera colos que s'escomenzaba la partida a 30 carreres. L'equipu anfitrión yera primeru dempués les siete carreres d'aniciu, momentu cuando Espora se fixo col primer puestu que nun soltaría.

Paez que la circunstancia de qu'un equipu tenga pocos xugadores facilíta-y l'algamar el triunfu. Yá se viera l'añu pasáu en La Villa cola Camaretá. Quiciás tenga que ver la continuidá nel llanzamientu del machorrador, que nun llega enfriar ente tirada y tirada. O quiciás seya qu'esti entra nuna dinámica de bonos resultaos que desmoralicen a los contrarios. Seya como seya, Sergio garró los dos puntos quince vegaes y solo dexó de puntuar n'ocho ocasiones, faciendo la puntuación récord esti añu: 36 puntos de carrera. Pero, ensin posibilidá de puntuar na xeneral, el so concursu yera más bien una torga pal restu los equipos, que sí lluchaben polos puntos y que víen, ñerviosos, que nun subíen pal marcador de so.

Nel ecuador de la partida diéronse dos momentos curiosos, que falen de la calidá de los dos xugadores protagonistes. Por una parte, na carrera 15, Toño conseguía encastrar dende'l puntu d'iniciu el liriu, pero la proeza vióse cortada poles desplicaciones de que nun se podía considerar encastráu pola mor de que nun yera esti el primer güelpe de la so carrera. Como diz el puntu 6 del "Sistema compatitivu" del alcuerdu reglamentariu del CNL "
Otórgase 1 puntu de carrera extra al equipu del xugador qu’algame un “encastráu” (introducir el liriu del primer güelpe)." Asina, tolos presentes entendimos que daquel machorrazu merecía un mayor premiu que los simples puntos de carrera algamaos, polo que sedrá una tema a tratar en siguientes conceyos. Enteráu de la regla Aarón, de la Camaretá, brindómos una curtia pero magnífica carrera 16, encastrando d'un primer güelpe maxistral y llevando trés puntos de carrera (los dos d'encastrar en primeru y l'extra).

La igualdá caltúvose hasta la última entrada, camudando nos parciales l'equipu que diba en frente de la llucha polos puntos. A falta de diez carreres, la Camaretá diba a la tiesta con un puntu sobre Sidrones. Cinco carreres dempués, la situación yera xusto la contraria. Por embaxo, a un par de victories, Quirinal y Asturliriu Homes. Descolgáu quedaba l'equipu d'Asturliriu Muyeres, que paecía reservase pa la competición qu'habría llegar dempués.

Asina, a la última carrera, la Camaretá y los Sidrones llegaben con 15 puntos, por 14 de Quirinal y 12 de Asturliriu Homes. Una victoria nella, diba suponer un cambiu na clasificación definitiva. Pero volvió a encastrar primero Espora, qu'amás yera últimu turnu de la ronda. A falta d'una ronda, el resultáu taba en manes de Aarón y de Lili de Sidrones y, n'ultimu casu, d'Arturo de Quirinal. Aarón algamó'l puntu que, xunto al extra del encastráu, dába-y los 16 de carrera y el segundu puestu na partida (pero los sietes puntos de partida). Lili nun yera quien a meter el so liriu y dexaba al so equipu con 15. Arturo, debutante na competición, pero con una ganes de deprender y pasalo bien tremendes, estrelló'l liriu escontra'l castru y esti rebotó, quedando montáu na estructura, pero tocando por fuera. Asina, Quirinal quedaba na cuarta posición con 14. Les seiciones d'Asturliriu quedaron quinta, los homes, y sesta, les muyeres.

Esti resultáu daba un vuelcu trescendental na clasificación, subiendo l'equipu de Noreña del tercer al primer puestu. Segundu, Asturliriu Homes, empatáu a puntos con Quirinal Liriu Sport, pero con mayor númberu de puntos de carrera. Cuartu, el desaniciáu Espora. Sidrones, ye quintu. Y zarra la clasificación Asturliriu Muyeres. Pero índa queden trés partides, polo que la competencia ta por decidir y, viendo lo igualao de les fuercies, promete solucianase mui tarde.

L'abiertu.

Los Sidrones propunxéronmos un nuevu abiertu, el de la botella, que tenía por recompensa dos prestoses botelles de sidra decoraes a mano por Lili, machorradora del equipu.

21 xugadores se decidieron a xugar pero, otra vuelta Javi d'Asturliriu se fizo col primer puestu, no que vien siendo un vezu esta temporada 2011, que nun conoz otru ganador d'abiertos diferentes. La capacidá de competición del castrillonés nesti tipu de trofeos ye almirable y lo que n'otros pue calificase de bona suerte, n'elli hai que reconocer que se trata de saber facer.

Esti abiertu desfízose en semifinales de Sergio d'Espora, que sobresaliere na partida. Y na final, nun duelu a cara perru, de la so muyer, Tere d'Asturliriu Muyeres (que venciere a la so compañera d'equipu Luisa, desendolcando dambes un xuegu bien granible, que paecieren escaecer na partida por equipos), resolviéndola por 2-1.

Javi y Tere (a los llaos) colos trofeos diseñaos por Lili (en mediu).

Clasificación individual.

Los 10 puntos individuales de la partida volvió a llevalos Sergio d'Espora. con un prmediu un pocoñín más baxu que los anteriores, pero tamién ye cierto que la dificultá yerá entá mayor, pasando de xugar siete y once carreres, respeutivamente, a treinta. Caltener los númberos falen de la regularidá del xixonés. Pero lo mesmo falen de Toño de los Sidrones y d'Aarón de la Camaretá, segundu y terceru de la competencia del tendayu. El veteranu Javi d'Asturliriu algamaba'l mesmu resultáu que'l debutante Arturo de Quirinal, cuatros. Y zarráronse los puestos que puntuaben col cuádruple empate nos trés puntos de la sesta posición ente Hevia de Quirinal, Falo d'Asturliriu Homes, Xosín de la Camaretá y Luisa, d'Asturliriu Muyeres.

L'abiertu apurría-y a Javi cinco valiosos puntos; a Tere d'Asturliriu Muyeres, trés; a Sergio, dos; y a Luisa, tamién d'Asturliriu Muyeres, ún.

Aarón, pol so encastráu, sumaba a los seis puntos de la partida otru estra.

Sergio fai un pocoñín mayor la distancia ente elli (33 puntos) y Javi (28), el so persiguidor. Toño con 19, Xosín de la Camaretá con 13 y Tere d'Asturliriu con 11, cierren los cinco primeros puestos.


Mayores con marcha.

Esta ye una de les iniciatives del ayuntamiento de Xixón pa atender pol ociu y el tiempu llibre de los nuestros mayores. Independientes ente sí, Mayores con marcha y el CNL alcontráronse nel Muséu del Pueblu d'Asturies y la esperiencia foi mui bona por dambes partes. Val que los machorradores tuvieron que guardar pola seguridá de los señorinos que pasaben, unos más despistaos qu'otros, pol mediu la pista cuando taben xugando y val que los mayores tuvieron qu'esperar a que finara l'abiertu pa qu'escomenzara'l baille. Pero toes eses torgues yeren poques: munchos d'aquellos que taben xintando nel práu y nes grades xugaren de pequeños al liriu (o la variedá del so pueblu) y prestó-yos pola vida ver que daquel xuegu de la infancia nun se perdiera nel escaezu; pa nosotros, el sintir los sos comentarios y alcordances pagónos la pena l'esfuerzu de facemos pasar por fuercies del orde públicu en cadena humana.

Milagros Robles preparándose pa golpiar la so "billarda".

Pero d'ente toes aquelles persones que s'averaron a nos pa recordar, quedámonos cola vitalidá de la lleonesa de Valderas, Milagros Robles, que mos pruyó, al acabar l'abiertu, pa que-y dexáramos un liriu y una machorra. El primer intentu nun foi buenu, porque diera'l güelpe mui fuerte y saltó'l liriu muncho; el segundu, más seliquín, malpenes lu llevantó; pero al terceru, Milagros solmenó tal machorrazu qu'aventó'l liriu a más de 20 metros. "A que no está nada mal para no haber jugado en 70 años", nos espetó con una sorisa na cara que nos val pa garrar más ganes de siguir cola nuestra empresa de promoción d'esti xuegu.

15 may. 2011

5 de mayu de 2011

Semeyes tiraes mientres la tercera xornada del Campionatu d'Asturies de Liriu 2011, nel tendayu del Muséu del Pueblu d'Asturies.

Lilian (Sidrones), preparada pal saque.

Sergio, d'Espor[a], sacando.

Lili, de los Sidrones, a puntu d'encastrar.

El convite preparáu polos Sidrones.

Sergio, nun tiru a media distancia.

Ferrer, d'Asturliriu Muyeres mientres l'abiertu la Botella.

Javi, d'Asturliriu Homes, arincando la so carrera contra Xosín, de la Camaretá (de pie, cola camisa del Sporting).

Tere, d'Asturliriu Muyeres, énte la mirada d'Enrique y de Joni.

Aarón, de la Camaretá. Robló'l primer encastráu de la temporada 2011.

Tere, finalista del abiertu, xuanto a Lili, na entrega la botella col trisquel plateáu.

Javi, ganador del eventu, con Lili de los Sidrones que-y da la botella del triques doráu.

Finalistes ya organización.

Javi, d'Asturliriu Homes, col troféu. (¿Abriralu?)


8 may. 2011

La entrada 50

¡Esta ye la entrada 50 d'esti blogue! 50 hestories dende va yá casi trés años d'esistencia del CNL. Y cellebramos esti aniversariu falando de cómo vamos algamando los oxetivos que mos punximos de la qu'escomenzamos: recuperar y esparder el xuego del liriu n'Asturies.

Espardiendo porque, nes últimes selmanes, escolinos de diferentes colexos asturianos pudieron xugar al liriu nos sos patios. D'una parte, Toño Argüellles, xugador de los Sidrones y profesor d'asturiano nel colexu Manuel Álvarez Iglesias de Salinas, en Castrillón, llévo-yos a los sos neños dalgunos xuegos tradicionales pa que conocerien tamién la bayura cultural d'esti país. Por otra, al traviés de la empresa de servicios educativos y d'ociu y tiempu llibre Escuelactiva, patrocinadora del equipu Espor d'Asturies, l'Atenéu de La Calzada de Xixón entamó una actividá de xuegos tradicionales dientro de les XVI Xornaes de Llingua y Cultura Tradicional Asturianes; durante les dos mañanes nel colexu l'Atalía y el Gracía Lorca, desfilaron más de doscientos guah.es del barrio (d'estos dos colexos y del Príncipe de Asturias, d'El Lloréu y de Santa Olaya). Los escolinos xugaron y esfrutaron coles carreres de panoyes, el dexabolu, la tarusa, el culo, el tiru al palu y, sobre too, el liriu.


Y recuperando porque, otra vuelta, nos citamos pa una nueva xornada del Campionatu d'Asturies de Liriu. L'equipu de los Sidrones llámanos a participar nuna tercera xornada y nun Abiertu de la Botella (como buenos "sidrones") a disputar nel Tendayu que facilita'l Muséu del Pueblu d'Asturies de Xixón, institución que se ta convirtiendo nun de los principales collaboradores del Conceyu Nacional de Liriu.


Domingu 15 de mayu
3ª Xornada del Campionatu d'Asturies de Liriu
Inscripción na partida a partir de les 11:00
Escomienzu a les 11:15
I Abiertu la Botella
(Válidu pal II Campionatu d'Asturies de Liriu Individual)
Acabante la partida oficial (12:45)
Muséu del Pueblu d'Asturies
Xixón

Por último, recordar qu'esta entra númeru 50 coincide cola fin de la Selmana de Lletres Asturianes, cellebración que nun podía ser escaecida pol Conceyu Nacional de Liriu nel so compromisu col idioma y la cultura asturiana. Dende equí vamos a siguir usando la llingua, que ya le meyor forma de caltanela y esfrutala. Llingua y liriu formen una pareya insepartable. ¡A falar y a xugar tol añu!