Otra de Zarraspastrón y Birya

La bolera de la TPA

"La Bolera" ye un programa de la Televisión de Principado de Asturias que se dedica a la difusión y desplicación de los deportes y xuegos tradicionales asturianos. Échenlu los sábados a les 15 hores, pola A7, y una hora más tarde, pola A8.

Ye idega del miembru fundador del CNL, Carlos Suari, qu'estudiare Ciencies de la Educación Física y el Deporte y tá enfotáu nel espardimientu de les actividades lúdico-motores del país, publicando l'añu pasáu el primer Atlas de los Bolos Asturianos (Suburbia Ediciones, 2012). Ta producíu por Antón García y presentáu por Milio Rodríguez López, más conocíu como Milio'l del Nido pola so llabor como monologuista. La presencia del liriu espárdese más p'allá, siendo l'alma del equipu técnicu la nuestra compañera Lucía Menéndez.

Va unos meses, en xineru, Sergio Buelga fue convocáu pa faer unes tomes onde desplicar el xuegu del liriu, enseñar l'usu de los preseos y responder a unes entrugues pa un espaciu dientro'l programa nomáu "El cascayu", de conocimientu xeneral sobre esta estaya de la cultura asturiana. Los resultaos pudieron vese estes caberes selmanes.

Sergio Buelga desplicando qué ye'l liriu.

Pero tamién tuvieron presentes les cámares de "La bolera" nel primer eventu de liriu de la temporada, cellebráu va una selmana nel colexu públicu d'El Llano de Xixón. Milio, Antón y Lucía acompañáronmos en tou momentu, faciendo toles entrugues que permitieren dar una idega tovía mayor de lo que ye'l liriu y el llabor desendolcáu del CNL.

Habremos esperar hasta finales de mayu pa velo, anque de xuru que merecerá la pena. Mientres, dexamos con esti corte onde'l compañeru Sergio d'Espor[a] respuende n'El Cascayu.

Sergio Buelga, n'El Cascayu.

L'entamu la nueva temporada

Esti domingu 21 d'abril, el Conceyu Naiconal de Liriu entamó la temporada 2013 col IV Abiertu de Liriu d'El Llano, prueba tradicional yá nel calendariu lirieru, que cuenta cola implicación de la Asociación de Vecinos "El Fumeru", del populosu barriu xixonés.

Averáronse en total ocho machorradores, representantes de tres equipos del CNL y un individual. Nun son unos números granibles, pero sí esperanzadores: los qu'ellí nos alcontramos somos fieles y tenemos ganes de siguir col enfotu organizador del Conceyu. Nun se necesita más pa continuar que ganes. Otra tema sedrá l'espardimientu del xuegu, l'otru de los oxetivos colos qu'entamábemos va dos temporaes y que nos paez una xera bien grande anguaño. 

Por embargu, sí llegaron al eventu les cámares del programa "La bolera", de la Televisión del Principado de Asturias. Esti programa (idega de Carlos Suari, entamador del CNL, dirixíu por Antón García, presentáu por Milio'l de Nido y grabáu pola "espora" Lucía Menéndez) xira al rodiu de los xuegos y deportes tradicionales asturianos y emítese cada sábadu a les 15 hores. Yá pol mes de xineru s'interesaron pol liriu, pa que-yos desplicásemos el mecanismu del xuegu y los oríxenes del Conceyu. Nesta ocasión, Milio entrugó pola xestión y los oxetivos del CNL d'esta temporada y sobre los concursos d'encastraos y de distancia. Y nosotros, encantaos de sirvir d'anfitriones, ufréndonos a entrevistes y esperimentos de toma d'imáxines, con cámares na tiesta inclusive. 

Antón García colocándo-y una mini-cámara na tiesta a Sergio Buelga.

Concursos

L'actividá escomenzó colos concursos de distancia y d'encastraos.

Paez que fríos tovía, la mayor parte de los machorradores nun consiguieron desaverar el liriu más p'allá del mediu'l campu de la pista del colexu públicu d'"El Llano", onde se disputó l'eventu. De los ocho, solo Hevia, Pepa, César y Sergio lo consiguieron. Sedríen estos dos últimos, con unes marques de 14 y 18 puntos respeutivamente dempués de les trés tiraes, quienes llegaríen a la final. Sergio dexóla finiquitada col primer machorrazu, qu'algamó los 9 puntos. Con 13 puntos totales, por 7 del chilenu, ganaba'l concursu.

El concursu d'encastraos tuvo más reñíu. El primeru n'encastrar los seis lirios fue Sergio, con un tiempu de 30"3, pero Toño superábalu actu siguíu, dexando la marca en 26"5. César establecía un rexistru de 44"1. Pero sedría Pepa quien tuviere más cerca de la victoria: encastró cinco lirios en menos de 20 segundos, pero'l sestu resistióse y paró'l cronómetru en 54"3. D'esta miente, Toño ganaba'l concursu d'encastraos, quedando Sergio segundu, César terceru y Pepa, cuarta.

L'Abiertu

Siguiendo los parámetros propuestos la temporada pasada, esti abiertu diba puntuar pal Campionatu d'Asturies Individual de Liriu y, sumando los puntos algamos por tolos xugadores de cada equipu, pal Campionatu d'Asturies de Liriu.

Los nueve machorradores presentes dividiéronse en dos grupos. El grupu 1, de cinco, con Luis Carlos, Arturo, Cristian, Hevia y Toño. Y el grupu 2, con César, Lili, Pepa y Sergio.

Arturo, de Quirinal, preparándose pa golpiar, mientres Toño, en segundu términu, orienta'l liriu.

El grupu 1 fue mui igualáu. Si bien Cristian y Hevia quedaron escolingaos dende'l principiu, por nun puntuar en denguna carrera, los otros tres xugadores puxaron pol primer puestu hasta la cabera carrera. Toño, que la abría, encastró'l primeru y sumó dos puntos que lu colocaben a la tiesta con 6. Luis Carlos, xusto nel siguiente intentu, algamaba otros dos puntos. El siguiente tiru yera pa Arturo, qu'encastró na mesma ronda, superando a los anteriores y garrando la primer posición con 7 puntos.

Nel grupu 2 destacó Sergio dende'l principiu, ganando cuatro carreres y sumando 9 puntos al final. La so efeutividá facía qu'el restu participantes nun llegaren a encastrar hasta en dos carreres. Asina, la puntuación fue menos granible que nel grupu 1 y la segunda posición fue la única posibilidá pa entrar na final. Llucharon por ella Pepa y Lili, qu'empataron a dos puntos na última carrera, lo que significó la victoria pa la xugadora d'Espora, Campeona d'Asturies del añu pasáu.

La final escomenzó con dominiu del club de xuegos tradicional Espor d'Asturies. Luis Carlos yera'l primeru n'encastrar y Sergio-y empataba na ronda. Na segunda carrera, colocábase na tiesta, dempués de garrar un puntu polos dos de Toño. Esta pareya algamaría los puntos na tercera, dexando al restu ensin nada. D'igual mou qu'Arturo na cuarta, esta vegada en solitariu, con dos espléndidos machorrazos que-yos lo poníen imposible al restu. Asina, llegábase a la última carrera con dos xugadores con posibilidaes pa ganar: Sergio, con 5 puntos y Toño con 4; y con Arturo, que contaba con 3 puntos, con opciones pa empatar pol primer puestu. Luis Carlos, con 2 puntos, tovía podía faese cola segunda posición. Y Pepa, que tovía nun puntuare, col enfotu de garrar unos puntos más pa la clasificiación xeneral. Pero fue Sergio, que salía n'últimu turnu la ronda, quien garró los 2 puntos en tres güelpes, y solo Arturo pudo puntuar con ún, lo que-y valió pa empatar a puntos con Toño na segunda posición.

Clasificaciones

Sergio, recibiendo'l diploma del Primer Puestu del Abiertu, del so campañeru Luis Carlos.

Esti yera'l primer eventu del añu 2013 y fízose puntuable yá pa los dos campionatos. D'esta miente, Sergio, d'Espor d'Asturies, pónse primeru na clasificación, con 20 puntos. Toño, de los Sidrones, y Arturo, de Quirinal, segundos nel abiertu, queden con 17 puntos. Luis Carlos y Pepa, d'ambos d'Espor[a], lleven 12 y 10 puntos respeutivamente. La xugadora de los Sidrones, Lili, como única tercera non clasificada pa la final (puesto que nel otru grupu empataron pol segundu puestu dos machorradores), algamó 4 puntos. El restu, al haber otru empate nel grupu 1, quedaron colos dos puntos correspondientes a los cuartos clasificaos.

Asina, la clasificación por equipos del Campionatu d'Asturies de Liriu, queda con Espor d'Asturies a la tiesta, colos sos 44 puntos. Los Sidrones, segundu, con 21. Y Quirinal, terceru, con 19.

IV Abiertu d'El Llano de Liriu

Entamamos esti nuevu cursu de liriu 2013 col yá tradicional abiertu de liriu d'El Llano, a disputar por cuarta vegada consecutiva nel popular barriu xixonés. 

Esperamos que la temporada nun quede ehí y seyamos quien a algamar un nuevu puxu pal liriu que paez desaniciao dende que, ellí pol xunetu del 2011, finara'l III Campionatu d'Asturies de Liriu. L'enfotu con que s'entamó los primero años, ficieron qu'el númberu d'equipos llegare a seis y el de machorradores, en delles ocasiones, a casi la trentena nes partíes del campionatu. Por embargu, dende aquel momentu, y van casi dos años, solo hubo dos abiertos más, en Piarnu y n'El Llano, amás de les copes Cantábriques. Son munches les torgues pa un xuegu chiquitín y ensin más sofitu qu'el de los propios interesaos en xugar, pero sigue habiendo llocos que caltienen la esperanza de qu'esti xuegu tradicional del país esporpolle de nuevo.

Poro, l'alcuentru nel Colexu Públicu d'El Llano, entamáu por Espor d'Asturies, col apoyu de la Asociación de Vecinos "El Fumeru", que confía abondo na xente del liriu y na recuperación de los xuegos tradicionales. Porque, como díciamos va unos años, préstamos xugar, pasar el tiempu al rodiu los palos, falando y viendo a la xente que comparte esta afición.

Y, con esti abiertu, y los concursos de distancia y d'encastrar qu'axunta, disponémonos a escomenzar dos nuevos Campionatu d'Asturies, por equipos y individual, que tengan una personalidá como les de los inicios y superen el triste viaxe pel desiertu de la última temporada. Porque, a la xente'l liriu, paezmos probe ganar la Copa Cantábrica a Galiza, nel marcu de la Universidá Llaboral de Xixón, y nun ser quien a caltener los eventos llariegos. Por intentalo otra vuelta, que nun quede.

Asina que esperámosvos a toos, pa sofitar esti enclín porque esti xuegu de nós nun caiga nel escaezu, p'aconceyanos y pa xugar. La cita ye:

IV Abiertu de Liriu d'El Llano

12.00 Concursu de distancia

12.30 Concursu d'encastraos

13.00 Abiertu

21 d'abril

Colexu Públicu d'El Llano - Xixón

1 d'avientu de 2012

Recopilación de les semeyes sacaes cuando la VI Copa Cantábrica de Liriu/Bilharda, na Universidá Llaboral de Xixón, dientro'l Festival Liet Internacional.

Estáu del patiu de la Llaboral, enantes d'escomenzar la partida.

 

Flores, capitán de la seleición de Galiza.

Suso, palanador imparable.

Flores y Hevia, capitanes de Galiza y Asturies, atendiendo a la televisión xermana.

Trespasu de la Copa.

Hevia y Flores, nel trespasu de la Copa.

Los capitanes, atendiendo a los medios griegos.

Dalgo que nunca nun pue faltar en cualisquier alcuenrtu Galiza-Asturies: el chiste de Flores mientres la xinta.

Y, equí, les consecuencies del chiste. Grandes, Isma y Lucía.

Un mediu del país: Radio Sele.

Aspeutu del patiu a media tarde, mientres l'abiertu.

Entrega premios: Sergio, segundu, y Daniel, primeru.

 

Lucía, tercer clasificada, recibiendo'l premiu de manes d'Hevia.

Franco, cuartu.

Flores faciéndo-yos entrega'l premiu a Luis Carlos y Pepa, quintos ex aequo.

La copa Cantábrica, quedó n'Asturies.

La mañana del 1 d'avientu fue de les más lluvioses del añu. Y el patiu de la Universidá Llaboral de Xixón taba empapáu y enllenu charcos. Ensin visión d'ameyoramientu, les delegaciones de les dos seleiciones a disputar la VI Copa Cantábrica de Liriu/Billarda a puntu tuvieron de suspender l'eventu. Pero les ñubes dieron un cachín de tregua y machorradores y palanadores escomenzaron la partida.

VI Copa Cantábrica de Liriu/Billarda.

Dempués d'un añu vacíu d'actividaes, el Conceyu Nacional de Liriu axuntaba a siete xugadores pa enfrentase al combináu gallegu. Por Espor d'Asturies, Pepa, Luis Carlos, Sergio y el chilenu César; por Quirinal, Hevia; por los Sidrones, Lili; y el tapiegu Muriego, procedente de la Liga Nacional de Billarda. 

Flores, capitán d'A Auténtica

Pela so parte, A Auténtica aportaba a Xixón col enfotu d'anovar el triunfu algamáu los dos últimos años, con un equipu bien competitivu, col bien conocíu xugador de Quirinal y Estensión Agraria, Xermán Viluba y el míticu gran capitán, Flores. Daniel, Franco, Suso, Marcos, Geni, Lucía y Isma, completaben l'esceicional plantel gallegu.

Dividía la partida en dos terrenos de xuegu paralelos, quedó establecía a 60 carreres, puntándose con un puntu la victoria y con cero, l'empate y la derrota.

Les primeres carreres fueron de tantéu. El terrén encharcáu nun permitía grandes vuelos y los xugadores diben a asegurar. Con estes, dempués de les primeres diez carreres, el marcador yera d'empate a 5. 

Aspeutu encharcáu del patiu, nuna carrera de demostración ente Flores y Hevia pa la televisión alemana.

Por embargu, esta igualdá fue rompiéndose na pista 2, onde los machorradores asturianos diben sumando victoria tres victoria. Na pista 1, el xuegu taba más pareyu, y la igualdá caltúvose hasta les dos últimes carreres de la primera metá del alcuentru, cuando Asturies, de la mano d'Hevia y Muriego, algamaba dos puntos que la poníen en superioridá tamién. D'esta mientre, al final de les 30 primeres carreres, Asturies ganaba por 8 a 6, na pista 1, y dominaba por 10 a 4, na pista 2. El resultáu al descansu yera d'un sorprendente 18 a 10.

Fízose un paru pa entrar en calor cola espicha isotónica. Y vino al pelu pa evitar un gran chaparrón qu'enllamuergó tovía más el patiu. Pero unes buenes tortielles, con croquetes y empanadiyes, too regao con sidra, valió pa que los xugadores perdieren el respetu a les nubes y salieren con ganes de siguir gulpiando'l liriu.

Engafentaos pol resultáu, los palanadores gallegos salieron enfotaos a remontar. Los asturianos, pela so parte, nun queríen dexar que los ganasen los nervios. A la carrera 40, pesie al esceicional xuegu billardeiro, solo teníen remontao un puntu. Siete paecíen abondos pa 20 carreres, tovía más cuando la pista 2 siguía siendo tarrén intratable de los asturianos. 28 a 20, yera'l resultáu a falta de diez carreres.

Los asturianos yá taben cellebrando'l triunfu: un par d'empates yeren suficientes pa ganar por segunda vuelta la Copa. La seleición gallega taba nun momentu finísimu, con grandes güelpes de salida que facilitaben l'encastráu en dos machorrazos. Pero, na segunda carrera de la Pista 2 (la 27 del total), Luis Carlos ganó-y el puntu a Franco. Matemáticamente, Asturies yera ganadora. Pero como'l recuentu total solo se facía cada cinco carreres, la emoción caltúvose hasta la última carrera: cuando Flores ganó a Sergio, la xente tiróse a los voceros pa sumar los puntos. El resultáu final yera de Asturies, 30; Galiza, 28. (Dempués camudóse'l resultáu al apreciase un fallu na marcación d'un empate, ente César y Suso, con un puntu pa caún; quedando Asturies, 29; Galiza, 27)

La gayola asturiana españó finalmente. Yera un puxu tremendu p'aquellos siete llocos que se llanzaren a organizar un eventu d'estes carauterístiques, nel marcu del Liet Internacional, dempués d'un añu casi valeru d'actividaes. Fue'l momentu de les reivindicaciones: más liriu y más llingua asturiana. 

Pepa, Muriego, Hevia, Sergio, Lili y Luis Carlos.

Abiertu de Liriu "Liet Internacional"

Dempués de la xinta d'hermandá, a les 16:30 hores, escomenzó l'Abiertu de Liriu "Liet Internacional". Esti festival de la canción de llingües minoritaries, gracies al puxu de los miembros del CNL y del LNB, y la xestión de xente de la Xunta pola Defensa de la Llingua Asturiana, contó col liriu pa sofitar una de les actividaes paraleles al xuegu. Durante tol tiempu de xuegu, medios de comunicación de dellos países que cubríen el festival, ficieron entrevistes y reportaxes a los machorradores. Anque, ensin dubia, la más prestosa pa nós fuera la presencia de Daniel Vallina, de Radio Sele, una de les radios llibres que ta puxando por caltenese con vida y, amás, n'asturianu. Sedría Daniel Vallina ún de los atractivos del abiertu, porque nun duldó en garrar machorra y liriu ponese a xugar. (L'otru gran atractivu sedría'l licor de café "Auga Vella", bálsamu tonificador pa cuerpu y mente)

El troféu quedaba dividíu en un grupu de seis xugadores y dos de cinco y clasificaríense los tres primeros y los dos segundos meyores, dempués de les cinco carreres previes. El primeru n'encastrar, y tolos que lo ficieren na mesma ronda, algamaríen 3 puntos; si lo facíen na ronda siguiente, 2; si necesitaben dos güelpes más, 1; y nel casu de nun encastrar tovía, la carrera acabábase con cero puntos.

El grupu 1 quedó conformáu por Luis Carlos, Flores, Geni, Marcos, Daniel y Dani Vallina. Quiciás la suerte'l principiante fizo qu'el periodista de Radio Sele llevare los 3 primeros puntos del tornéu. Pero la constancia del campeón gallegu Daniel fue imponiéndose, p'acabar na primer posición con 9 puntos. L'esporu Luis Carlos facíase cola segunda plaza gracies a los sos 8 puntos. Geni, garró 7; Flores, 6; Marcos, 5; y Dani Vallina, 4 (los tres de la primera y ún de la última).

Sergio Buelga xunto a Daniel Vallina, periodista de Radio Sele.

El grupu 2 ganólu Lucía impúsose al restu, puntuando en toles carreres p'algamar 9 puntos, remontando'l buen arranque de Pepa, que quedó segunda, y de Muriego, que perdió la clasificación al nun puntuar na última. Isma, con 5 puntos, y Suso, que quedare en blancu, completaben el grupu.

Por últimu, el grupu 3 tuvu nel italo-gallegu Franco al gran dominador, ganado les cinco carreres con autoridá y faciéndos col primer puestu'l grupu y un plenu de 15 puntos. El resto de machorradores, disputó la segunda plaza hasta'l final, pero fue Sergio, con 9 puntos, quien l'algamó. Xermán, con 7; Hevia, con 5; y Julio, con 4, zarraron la tabla.

Quedaben clasificaos pa la final Franco, Daniel y Lucía, como primeros y Sergio, por ser el meyor segundu. Luis Carlos y Pepa quedaben empataos a puntos pa la segunda plaza de segundos y, en cuenta d'un desempate reglamentariu, consensuóse que disputaren dambos la final, que quedaba a seis xugadores.

Sergio y Daniel, segundu y primer clasificaos del Abiertu de Liriu "Liet Internacional"

La final quedó frallada dende'l primer momentu. Daniel, Lucía y Sergio empataben la primer carrera, dexando a cero al restu. La segunda, y'a-y dio una ventaya granible a Daniel, que algamaba otros tres puntos. Con seis, por cuatro de Sergio, Daniel podía xugar con mayor tranquilidá. Pero, na tercera carrera, resurdió Franco y dexó a cero al restu competidores, empatando nel segundu puestu con Sergio. Pa la cuarta carrera, too taba nel aire. Y fue entós cuando Daniel dio la puntiya, garrando los tres puntos otra vuelta, pa garrase nunos inalcanzables 9 puntos. Sergio ganó la cabera carrera p'asegurase la segunda plaza, por delantre de Lucía que, con un nuevu puntu, quedaba tercera. A Franco valiéron-y los cuatro puntos del iniciu pa quedar na cuarta plaza. Y Luis Carlos y Pepa, fieles a la so igualdá, empataben na quinta plaza a ún puntu, que ganaren dambos na última carrera.

VI Copa Cantábrica

El primeru d'avientu, nel marcu del Festival Liet Internacional de la canción en llingües minoritaries, va cellebrase la VI Copa Cantábrica que va afrontar a les seleiciones d'Asturies y de Galiza, ná más y ná menos que que nel patiu central de la Universidá Llaboral de Xixón.

Esti añu de tantes dificultaes pal Conceyu Nacional de Liriu nun paez que seya'l más propiciu pa que los asturianos faigamos frente a los preparaos palanadores gallegos de la Liga Nacional de Bilharda, col míticu Xermán Viluba a la tiesta. Pero'l buen papel fechu nel Tornéu l'Año Prieto de Ribadeo en xunetu, damos puxu pa testerar por algamar la victoria.

L'alcuentru sedrá a partir de les 11 de la mañana y disputarase al meyor equipu de 60 carreres de dos machorradores, onde la victoria ufrirá un puntu y quedará con cero quien empate o pierda.

Dempués de la xinta d'hermandá, onde s'espera con xacíu les intervenciones del capitán d'A Aunténtica Flores, disputaráse'l Abiertu Liet Internacional, sigún la normativa CNL pa la Temporada 2012. A partir de les 16:30 hores, tamién nel patiu la Universidá Llaboral y entonao col meyor licor de café de Galicia "Auga Vella" (que tamos deseyando prebar).

Tais toos convidaos a participar xunto a nós nesti día de fiesta pal liriu y pa la llingua asturiana.