Impresionante día de liriu en Noreña.

La tarde del domingu 26 d'abril va pasar a la hestoria del CNL pol regresu del liriu a la cai. El tarrén de xuegu foi esta vegada'l noreñense paséu de Frai Ramón, presidíu pol quiscu música de la villa condal. Y yá dende un principiu la xente foi averándose a les veres vallaes de la curva onde se dispunxo el campu xuegu.

La partida d'esta xornada foi especial: los equipos CNL alcordaron acurtiala a quince carreres pol retrasu nel aniciu y pa faer sitiu a les munches piticiones de participación de los espectadores nel abiertu del Picadillu. Nun hebo dengún problema énte la propuesta de la organización, que corrió a cargu d'una entregada Camaretá de Liriu de Noreña, sofitada pola Asociación Folklórica Musical "Villa y Condáu de Noreña" y la collaboración de la Orden del Sabadiegu y del Conceyu de Noreña.

La principal torga que se barruntaba al principiu, esto ye, que'l liriu esnidiara pela cuesta, solucionóse col alcuerdu de poder paralu y dio pasu a otru obstáculu más que provocó vuelcos inesperaos nos resultaos de les carreres: la estrema dificultá d'encastrar dende la parte superior del castru, onde los lirios más pesaos salíen rodando.

Toño (Sidrones) encastrando dende arriba'l castru.

Dempués de la presentación del eventu dende lo alto'l quioscu, escomenzaron los lirios a esnalar pela pindia pista del paséu Frai Ramón, col xenial Toño de los Sidrones algamando los tres puntos de la carrera pal so equipu. Al final de les cinco primeres carreres, la veteranía del equipu decanu del xuegu n'Asturies imponíase y Asturlirio diba primeru.

Falo, d'Asturlirio, encastrando.

Pero entós salieron a rellucir les machorres d'Espor[a], onde destacaron Carlos Suari e Iyán con un plenu de 9 puntos de 9 xugaos caún, pa acabar con 35 puntos la partida curtia de Noreña y conseguir un nuevu triunfu pal club capitalín. Asturliriu foi segundu con 18 puntos, superando en dos al equipu llocal de la Camaretá, que quedó terceru. Quirinal Liriu Esport firmó 14 puntos de carrera, pero por culpa d'incompatibilidaes llaborales, solo pudo presentase al eventu con tres xugadores; la norma aprobada nel Alcuerdu pa la celebración del II Campionatu d'Asturies de Liriu dexa claro que "Cada equipu inscribe nel orde que quiera los sos xugadores, [...] siempre que, polo menos, participen 4 xugadores estremaos por equipu" y que "En casu d’incomparecencia d’un equipu, nun sumará dengún puntu de partida" y, poro, Sidrones, pesie a ser últimu na partida, con 11 puntos, alcontró los dos puntos de partida correspondientes al cuartu puestu.

Esti ye l'acta de la 2ª xornada y la clasificación provisional del Campionatu:

Ensin embargu, tolos xugadores de la partida tuvieron premiu a los sos esfuercios: la organización fízo-yos entrega d'una bolsa con presentes del conceyu de Noreña, ente los que destacó sobremanera la riestra sabadiegos (que, de xuru, nun llegarán a la fin de selmana que sigue).

El públicu taba mui ilusionáu: los mayores porque s'alcordaben de los sos tiempos mozos de xugar al liriu o al pinchu; los neños, porque taben descubriendo un xuegu nuevu. Amás, taba averada a Noreña esti domingu xente de toes partes: valencianos que xugaben al pic i pala, salmantinos que prauticaren la chimba y gallegos que nos falaben del llabor de la LNB y de Xermán, Daniel y Geni na recuperación de la billarda, xuegos toos ellos hermanos del liriu.

Néstes, dióse pasu entós al I Abiertu del Picadillu de Noreña, que contó con una participación de 30 machorradores y que foi valederu pal I Campionatu d'Asturies de Liriu Individual.

Les rondes previes foron mui emotives, con liriazos coreaos por toos, como los de Vero, Felipe o Chus Rosete; pero quienes más aplausos llevaron foron Alejandro y Sergio Gago, que recién descubrieren el xuegu y punxieron tol so valor de neños intentando llevantar el liriu del suelu.

Sergio Gago y Alejandro, dos figueres en ciernes.

Les semifinales foron una sorpresa hasta pa los propios xugadores: Dani, machorrador de los Sidrones que debutaba nesta xornada, impúsose nel desempate al xugador llocal Cabeza, que dexó clara la so bona memoria al alcordase perfeutamente de cómo xugaba de guah.e. Enrique, d'Asturlirio, fízose cola otra plaza na final, al vencer 3-1 a Abel, de la Camaretá.

La final nun tuvo color y Dani impúsose por 2 carreres a 0 al so alversariu Enrique. D'esta mena, el equipu de los Sidrones fáise col so primer troféu CNL y Dani escomienza'l so pasu dientro'l liriu de la meyor manera posible.

Podiu del I Abiertu del Picadillu de Noreña:
2º, Enrique (Asturliriu); 1º, Dani (Sidrones); 4º Abel (Camaretá); 3º Cabeza (Independiente).

No tocante al Campionatu Individual, les puntuaciones de la xornada dexaron claru'l bon momentu d'Espor[a]: los sos cinco xugadores algamaron puntos de la partida, dexando güecu pa Javier (Asturiliriu), Aarón (Camaretá) y Toño (Sidrones). Ensin embargu, l'abiertu dio los sos puntos a cuatro nuevos xugadores: Dani (Sidrones), Enrique (Asturliriu), Cabeza (independiente) y Abel (Camaretá). La baxa de Xermán (Quirinal) nesta xornada fizo que perdiera la so primer posición en favor de Carlos Suari (Espor[a]) con 16 puntos, siguíu d'Iyán (Espor[a]), con 15, y de Toño (Sidrones), con 13.

Carlos Suari, primer clasificáu provisional del Campionatu Individual.

Acabante la competición, la fiesta del CNL treslladóse a la Plaza d'Abastos onde la Camaretá tien la so sede social, pa siguir con un convite propiu de les meyores cellebraciones. Nun faltaron nin el picadillu nin los sabadiegos a la hora de poner fin a una espectacular xornada de liriu na cai, esperiencia que se nos abultaba a toos indispensable pal añu que vien.

La siguiente xornada correrá a cargu del otru equipu debutante, los Sidrones, que tán en conversaciones col Conceyu de Villaviciosa pa organizar otru eventu na cai. ¡Ellí taremos!