Los cinco equipos miembros del Conceyu allugáronse a les pistes del colexu d’El Llano de Xixón, la mañana d’esti domingu 28, pa disputar la primer xornada del II Campionatu d’Asturies de Liriu y el primer Abiertu d’El LLano, valederu pal Campionatu individual.
Les 11 yera la hora elexida pa escomencipiar a xugar la partida del Campionatu, tan esperada dempués de tantes conversaciones preparatories y de tantos meses d’iviernu colos lirios xelaos d’inactividá. Les instalaciones bien afayidices, el solín de la mañana de primavera y les ganes de xugar de tolos machorradores reunidos xuniéronse p’algamar una partida intensa ya emocionante hasta l’últimu momentu.
Dende les primeres carreres, el organizador del eventu, Espor d’Asturies, quiso repitir la dinámica que lu llevó a ser campión del añu pasáu y algamó más puntos que’l restu los equipos xuntos nes cinco primeres carreres. Pero l’equipu avilesín del Quirinal, capitaneáu pol magníficu xugador Xermán Viluba, foi averándose carrera tres carrera hasta que, a falta de diez pal final de la partida, alcontrábase disputando la victoria solo un puntu per embaxo. Per detrás, la Camaretá de Liriu de Noreña esfrutaba d’un cómodu tercer puestu mientres diben avezándose a la competición. Astur Liriu y Sidrones puxaben por nun acabar col puntu de la cabera plaza.
Ensin embargu, la partida dio un vuelcu espectacular que coincidió cola marcha del gallegu Xermán: Quirinal solo foi quien a consiguir dos puntos de carrera nes últimes diez carreres, atenazáu polos nervios de ver como se-y alloñaba la posibilidá de ganar la partida ante la regularidá d’Espor[a] y, sobre too, a los estraordinarios güelpes del equipu condal. Los ánimos de los gaiteros a los sos compañeros xugadores, convirtiéronse nun récord de 22 puntos nesti intre, aventayando al equipu avilesín a falta d’una carrera.
Espectación ante la penúltima carrera con Toño (Sidrones),Aarón (Camaretá) y Enrique (Asturliriu) xugando.
Pela parte baxa, y pesie a la magnífica actuación de Toño, l’equipu de los Sidrones pagó la novatada y nun pudo superar al decanu Asturlirio.
Asina, Espor d’Asturies mantuvo la so imbatibilidá con esti nuevu formatu a cinco equipos gracies al so llabor d’equipu y a la regularidá de los sos miembros, que finaron la partida toos ente los diez primeros xugadores a nivel individual.
Ensin embargu, el xugador más granible de la xornada foi el yá citáu Xermán de Quirinal, qu’algamó’l 92% de los puntos de les nueve carreres que disputó. Toño, de los Sidrones, alcanzó’l 91% quedando en segundu puestu. Aarón, de la Camaretá de Noreña, averóse hasta’l 88% y Iyán, d’Espor[a], col so 86% completó’l poker d’ases de la xornada.
La llarga duración de la partida superó toles previsiones y fizo que’l I Abiertu d’El LLano tuviera a puntu de suspendese. Ensin embargo, la decisión de los representantes de los cuatro equipos que se mantuvieron nes pistes dio’l vistu buenu pal so escomienzu.Dieciochu xugadores d’Espor[a], Asturliriu, Sidrones y la Camaretá, amás de dalguna atrevida independiente, pusiéron los sos lirios en xuegu, sabiendo que’l tornéu sedría valederu pal I Campionatu d’Asturies de Liriu Individual. Les rondes previes corrieron bien rápides, con enfrentamientos d’a dos y a tres machorradores, daqué estremao cola dinámica de la partida oficial. Les semifinales volvieron a teñise de verde y negro, colores d’Espor[a], con tres xugadores d’esti equipu: Carlos, Mara y Sergio. Ensin embargu, nun se repitió la final d’Illas porque surdió de Noreña la figura de la machorradora Lucía, que-y arrebató el pasu a la final a Sergio pela vía rápida y venció a Carlos nuna final muncho más trabayada. Facíase Lucía col honor de vencer el primer abiertu homologáu pol CNL, de da-y el primer títulu al so equipu recién estrenáu y, sobre too, de ser la primer muyer qu’algama un tornéu individual del Conceyu.
Ganaba Lucía 5 puntos valiosos pal Campionatu Individual. Xermán, el xugador más granible de la xornada oficial, facíase colos 10 puntos gracies al so magníficu cociente, colocándose na primera plaza de la clasificación.
Dende’l Conceyu Nacional de Liriu damos les nueses más fonderes gracies a la direición del Colexu Públicu “El LLano” y a la Asociación de Vecinos “El Fumeru” d’esti barriu xixonés, poles facilidaes prestaes pala organización d’esti eventu, amás del sofitu amosáu cola so presencia n’elli. Amás, l’agradecimientu pol apoyu alcontráu na Academia de la LLingua Asturiana, que se fizo cómplice del CNL apurriendo los lliterarios premios pa los ganadores del abiertu.
Carlos (Espor[a]), Lucía (Camaretá) y Sergio(Espor[a]), podiu del I Abiertu d'El LLano,
colos premios apurrios dende la ALLA.
El Conceyu Nacional de Liriu dio esti domingu un importante pasu p’hacia alantre nesti proyeutu de consolidación del xuegu del liriu, al poner en marcha d’una forma efeutiva la temporada 2010 y, sobre too, porque quedó patente l’eleváu grau de compromisu de tolos sos miembros, a nivel grupal y particular.
El siguiente pasu, a mediaos d’abril en Noreña. La Camaretá de Liriu de la villa condal prométemos un magníficu día de fiesta y de liriu coincidiendo cola fiesta del Sabadiegu. ¡Ellí taremos!
