2 dic 2013

Copa Cantábrica 2013



A mediudía del sábadu 30 de payares, escomenzaba, nel Polideportivu de Piedrasblancas, la VII Copa Cantábrica de Liriu/Bilharda entee las seleiciones d'Asturies y Galiza. Una vez más, el Conceyu Nacional de Liriu asturiano y la Liga Nacional de Billarda gallega convocaben a los sos más destacaos xugadores pa esta competición anual qu'hermana a los dos pueblos, esta vez cola colaboración del Conceyu de Castrillón, que cedió la istalación.

La Copa coló de vuelta pa Galicia.

La Copa Cantábrica d'esti añu, como nes caberes temporaes, disputábase a 60 carreres, llevando un puntu el ganador y quedando en blanco en casu d'empate o derrota. 

Y les coses escomenzaron bien pa los siete asturianos seleicionados (Pepa, Sergio y Luis Carlos, del equipu Espora d'Uviéu, Liliana, de los Sidrones de Xixón, Xosín de la Camaretá de Liriu de Noreña, Javier Hevia de Quirinal de Avilés y Muriego, xugador de Tapia Casariego que xuega en la Lliga gallega), que dominaben nel marcador por 17 a 11 al acabar les primeres 30 carreres.

Por embargu, la reacción d'"A Auténtica" llegó. Y nes últimes 27 carreres de la mañana, llograron un parcial de 14 a 3. A falta de las tres últimes, Galicia taba delantre por solamente un puntu y Asturies tovía podía vencer, como se consiguiera l'añu anterior na plaza la Universidad Llaboral de Xixón, nel marcu de les actividaes del Festival Liet Internacional. Pero nun pudo ser porque la dinámica ganadora de la seleición gallega llevólos a llograr dos puntos de los tres posibles y vencer por 27 a 30, consiguiendo la Copa Cantábrica por quinta vegada de las siete posibles.
Seleición asturiana. De pie, Lili, Muriego, Xosín, Sergio y Luis Carlos. Agachaos, Hevia y Pepa.

Pol equipu asturianu, destacó sobre manera Javier Hevia, el capitán del conxuntu, qu'algamó 7 puntos en nueve carreres disputaes, lo que ye un 77%. Mui buen papel ficieron tamién Sergio y Muriego, con 7 puntos de diez.
Seleición gallega, col capitán Flores garrando la Copa.
Pol equipu gallegu fueron determinantes los plenos de Xermán y de Lucía, con cinco puntos de cinco carreres disputaes.


Abiertu (del llacón) Internacionalista.
Pola tarde, dempués de la xinta d'hermandad de rigor, disputose l'Abierto Internacionalista, que tien como premiu un llacón asturianu.
Momentu de la xinta d'hermandá.

Con una participación de 19 machorradores (solamente 5 d'ellos asturianos), los xugadores quedaron enmarcaos en cuatro grupos, siguiendo la normativa vixente pa los torneos abiertos a la llibre participación qu'estipuló'l Conceyu Nacional de Liriu. De esta forma, dempués de xugase cinco carreres por grupu, clasificáronse del primeru Hervy y Coedo, qu'empataron nel primer puestu; del segundu, Daniel; del terceru, Sergio, únicu asturianu na final; y del cuartu, Xermán.

La final a cinco nun tuvo casi historia y Xermán llevóla con autoridad, al vencer en cuatro de las cinco carreres. El xixonés Sergio quedó solamente a una carrera de revalidar triunfo nel "abiertu'l llacón" y volvió a repetir posición nun abiertu internacional, porque l'añu pasáu quedara segundu tamién nel Abiertu Internacional Liet, que ganara'l gallegu Daniel, qu'esta vez solo pudo faer terceru.

Finalistes del abiertu: Coedo, Hervy, Xermán, Sergio y Daniel.

Entamando la prósima edición.
La Copa Cantábrica fue una fiesta otra vuelta, un premiu para estes persones que, durante tol añu, tán tratando de dar dignidá a les cultures autóctones de los sos pueblos, recuperando las costumes y calteniéndoles en vixencia. Y asína va siguir siendo, porque la octava Copa Cantábrica yá ta planificándose.


27 nov 2013

Anunciu de la Copa Cantábrica de Liriu/Bilharda 2013

Otru añu más, la seleición asturiana de Liriu enfretaráse a "A auténtica" seleición de Galiza de bilharda pola copa Cantábrica que, l'añu pasáu y a la solombra del Festival Liet, quedara n'Asturies. (Ensin ánimu de malmeter... ¿o sí?)



Cartel del eventu.


A partir de les 11:30, na plaza d'Europa (en casu llover, treslladarase al polideportivu) de Piedrasblancas, escomenzará l'encuentru ente les seleiciones d'Asturies y Galiza.

A les 15, entamará la xinta d'hermandá.
(Con un preciu de 15 euros por menú)

A les 16:30, Abiertu Internacionalista, onde quien quiera averase pue participar.



Esta VII Copa Cantábrica ta entamada pol Conceyu Nacional de Liriu, pola Liga Nacional deBillarda  y pol Conceyu de Castrillón. 

Gracies, Hevia.

Pero'l braeru motor del liriu anguaño ye Javier Hevia. Munches gracies de tola xente'l liriu (anque bien de veces nun te faigamos casu).

1 jul 2013

El liriu y Ástura

El pasáu sábadu 28 de xunu, día de San Pedru, el Conceyu Nacional de Liriu participó nel Día d'Ástura, organizáu pol Proyeutu Ástura, comandáu pol Colectivu Interferencias.

El Muséu del Pueblu d'Asturies enllenose d'actividaes asturianes. L'artesanía n'acebache de Juanrapin Joyería Creativa y María Pérez, en cueru de Yunastur Artesanía y en madera de José Ramón Fernández del Riego. Los cancios a la bandurria y los romances de Dani García de la Cuesta y la tonada de Paco Queipo y dos collacios de so. La clas d'asturianu d'Iniciativa pol Asturianu impartida por Inaciu Galán. El saber andariegu de Xurde Morán coles sos rutes per Xixón y el saber académicu de Carlos Caicoya alrodiu los horros. Y, por supuestu, la estaya lúdica: el liriu.

El tendayu colos puestos d'artesanía. Inaciu Galán cola clas de llingua d'IPA. Daniel y Xurde. La tonada. Carlos Caicoya.
 






Arturo de Quirinal y Sergio d'Espor d'Asturies presentáronese nel tendayu del Pueblu d'Asturies pa dar una charra teórico práutica sobre'l xuegu. En principiu, la idega yera entamar un eventu abiertu, con dos concursos y un tornéu, pero'l tiempu echóse enriba énte la bayura d'actividaes, y hubo que resumir. Delantre d'un públicu atentu ya entregáu, desplicose l'orixen del xuegu y de los sos milenta nomes, de l'aición motriz que da cadarma a tou'l conxuntu, de la esceicionalidá del castru y del por qué del CNL. Dempués, dambos machorradores ficieron una muestra d'un concursu d'encastrar y d'una carrera que fue mui cellebrada. Y acabamos encantaos, colos aplausos y les felicitaciones énte les desplicaciones, pola buena acoyida de los asistentes y por ver cómo los más neños pasaron un buen cachu dempués intentando encastrar.


Dámos-yos les gracies al Colectivu Interferencias, a Xose Mon y a Patricia, por conviadmos y poles atenciones pa con nós. Deseyamos qu'esta iniciativa siga p'alantre y garrando más puxu col tiempu. Y, por supuestu, que cuenten col nuestru sofitu pal Proyeutu Ástura.



22 jun 2013

Día d'Ástura

El Coleutivu Interferencias (bien conocíu por asoleyar la revista cultural "21 Le Mag" y entamar Óptica, Festival Internacional de Videoarte) lleva dellos años puxando pola cultura llariega, col envís de tornar a los raigaños pa guetar los finxos d'una identidá asturiana dende la que desendolcar rellaiciones de tou tipu, dientro y fuera d'Asturies. Con esta idega, naz el Proyeutu Ástura l'añu pasáu y, pa cellebrar l'aniversariu, va entamar nel marcu del Pueblu d'Asturies el Día d'Ástura, esti día 29 de xunu.

Esti Día d'Ástura va ufrir delles actividaes, dende amueses d'artesanía y recitales poéticos, hasta actuaciones musicales y xuegos tradicionales. Pa completar esta estaya, Xosé Mon González, ún de los cabezaleros del Coleutivu Interferencias y entamadores del Proyeutu Ástura, púsoxe en contautu con nós. Y, claro ta, el Conceyu Nacional de Liriu aceutó esta invitación tan prestosa proponiendo un eventu con dos concursos y un abiertu que, por supuestu, contará pa los Campionatos d'Asturies de Liriu.

Esperamos que vos apetezca acompañamos y esfrutar col liriu y con toles estayes que van al rodiu  de la cultura asturiana nesti Día d'Ástura.


I Abiertu de liriu Día d'Ástura
29 de xunu
Dende les 17:30 hores
Muséu del Pueblu d'Asturies de Xixón



12 jun 2013

El pitu quedó n'Asturies

Por fin, el tornéu abiertu más antiguu del calendariu CNL quedó n'Asturies, dempués de tantos años de dominación de los palanadores gallegos que s'averaben a la parroquia castrillonense de Piarnu.

El sábadu 8 de xunu, con motivu de les fiestes patronales de Piarnu, entamóse'l VI Abiertu del Pitu Caleya de Piarnu, col comandante Javier Hevia d'agospiador. El día taba bien encapotáu y too aseguraba que diba acabar pasando por agua a los machorradores, como asina pasó namai dar los primeros güelpes. Poro, la primer decisión fue treslladar el tarrén de xuegu, del enllamuergáu campu de fútbol (esti abiertu xuégase en yerba tradicionalmente), hasta la pista d'al llau, onde s'asitiaben les carpes de la fiesta y l'escenariu.

El concursu de distancia.
Poco más tarde del mediu día escomenzó'l concursu de distancia. De común alcuerdu, la pista quedó dividida en 9 estayes, más una décima, de yerba y yá fuera de la pista, que yera la distancia mayor y premiaba con 10 puntos. Concursaron once machorradores de mano, siendo les meyores puntuaciones les de Sergio d'Espora (con 19 puntos) y les del gallegu Daniel (con 16 y un magníficu machorrazu que fue afuera'l tarrén, algamando 10 puntos), yá tou un habitual n'esta plaza, qu'algamara'l pitu va dos años. Escomenzó Sergio meyor, aprovechando'l fallu de Daniel, que malpenes pudo sacar el liriu del iniciu. Pero'l segundu güelpe fue resolutivu (9 de Daniel por 2 de Sergio) y el terceru (7 por 8), solo valió pa maquillar un resultáu (17 a 14) que-y dio la victoria a Daniel.


L'abiertu.

La lluvia fizo que l'eventu de distancia durara más de lo previsto y, pa nun coincidir cola xinta programada pa les 2 pola Asociación de Vecinos, decidióse escomenzar col abiertu y dexar pa más tarde'l concursu d'encastros, si daba llugar.

Los once machorradores ordenáronse en tres grupos, dos de cuatro y ún de tres.

Nel Grupu 1, Xosín de la Camaretá, que volvía al xuegu dempués d'un tempu, vioseles col convidáu de la LNB Daniel, y con dos xugadores llocales que puxaron por Quirinal, Álvaro y Diego. El dominiu de Daniel fue ablucante, ganando cuatro de les cinco carreres, algamando 8 puntos, dexando a Xosín que se ficiera col triunfu na cuarta y a los otros dos, a cero puntos.

El Grupu 2 vivió dalgo similar. La contundencia del otru finalista del concursu de distancia, Sergio, llevólu a ganar los 10 puntos a disputar, cediendo un empate a Toño, de los Sidrones, na cabera carrera, que-y valieron pa quedar segundu. Geni, tamién de la LNB, quedó tercera y Arturo, xixonés de Quirinal, cuartu.

L'anfitrión Hevia fízose col puestu cabeceru nel Grupu 3, nuna llucha zarrada con Lili, de los Sidrones, que se desfizo na última carrera, que ganó'l machorrador llariegu. Franciscu, terceru, llevó tres puntos y la victoria na segunda carrera.

D'esta mientre, quedaron clasificaos Sergio, Daniel y Hevia, como cabezaleros de grupu, Toño y Lili, como segundos, y Geni, como tercera, pero cola particularidá de tener sumaos tantos puntos como Lili. La final, por consensu, decidióse que fuera a seis.

Sergio volvió a mostrase intratable, ganando les dos primeres, onde solo pudo algamar un puntu Daniel. A la tercera, diéronse vuelta les tornes, y fue'l gallegu quien superó nun puntu al xixonés. Geni rompió la llucha, ganando la cuarta carrera, quedando Daniel y Sergio empataos a ún puntu. Pesie a la ventaya, si Daniel ganaba dexando a cero a Sergio, volvería a llevar el pitu pa Ribadeo. Pero dambos empataron nel primer llugar, quedando'l pitu caleya en tierres asturianes por primer vez dende que s'escomenzó esti abiertu.



Sergio, d'Espora, col pitu caleya de troféu.


Clasificaciones de los Campionatos d'Asturies.

L'abiertu  yera válidu pa dambos Campionatos d'Asturies de Liriu, l'individual y el d'equipos.

Pal individual, cola so victoria, Sergio caltenía la posición y aumentaba la distancia pa colos sos perseguidores, Toño, que sumaba 12 puntos más y quedaba segundu con 29; y Arturo, que pinchaba algamando solo 2, pa sumar 19. Daniel, gracies al so segundu puestu, subía a la cuarta plaza, colos 17 conseguíos en Piarnu. Y Lili quedaba quinta, con 16, al sumar los 12 del cuartu puestu a los 4 que algamara n'El Llano.

Por equipos, pesie a qu'Espora se caltién nel primer puestu, con 64 puntos (20 puntos en Piarnu), los Sidrones recorten distancies (24 puntos del abiertu'l pitu caleya) sumando 45. Quirinal, sumó 22, pa ponese na xeneral con 41. Y cierra la Camaretá de Liriu de Noreña, colos 7 puntos que consiguió Xosín.


El concursu d'encastraos.

Acabante l'abiertu y a puntu d'escomenzar el repartu la fabada, entamóse'l concursu d'encastraos enriba l'escenariu de los festexos. Ocho fueron los machorradores que lu disputaron  sobre l'entabláu de madera, que dificultaba abondo'l llabor de los xugadores, al amortiguar los güelpes.

Sergio fue'l primeru n'encastrar los seis lirios nun tiempu récord de 24"66. De secute, Xosín taba a puntu de consiguir meyoralo, pero quedaba en 28"01. Daniel quedaría en tercer posición, con un tiempu de 48"88. Y el portugués afincáu en Piarnu, Álvaro, conseguíalo in estremis, a los 58"36.

Ganaba otra vuelta Sergio, que taba n'estáu de gracia.

 

Hevia, entamador de los abiertos del pitu caleya.

Diego, rapacín de la parroquia, que s'averó al eventu'l CNL.


Toles semeyes fueron apurríes por Daniel, de la LNB-Norleste. Munches gracies.



24 may 2013

El pitu caleya en Piarnu

Cartel promocional del abiertu.

Otru añu más, mientres les Fiestes Sacramentales organizaes pola Asociación de Vecinos de Piarnu, en Castrillón, va entamase l'Abiertu'l Pitu Caleya, ensin dubia, el más señeru de los alcuentros de liriu.

L'eventu escomenzará a les 12 del mediudía colos concursos téunicos de distancia y d'encastraos, pa dar pasu de secute, sobre les 13 hores, al abiertu que tien por premiu'l pitu caleya ufiertáu pol machorrador del llugar Javier Hevia. Dempués habrá fabada pa xintar. (El númberu de vales ye llimitáu a la capacidá de la carpa, asina qu'hai que reservalo con anticipación nos siguientes númberos: 636 09 95 14 y 650 18 43 97. El preciu del menú ye de 6 €) Y de tarde, taller de liriu pa los guah.es que s'averen, a partir de les 17:30.

Esti abiertu, que puntuará tamién pal Campionatu d'Asturies de Liriu, por ser el más antiguu, suel contar con xugadores que vienen d'afuera d'Asturies. Dende la LNB yá se tan preparando "p'asaltar el gallineru del liriu asturianu" y caltener la rivalidá que se vive siempre cola Copa Cantábrica. Asina, "o comandante" Hevia respuende na so muria de facebook a les provocaciones gallegues de la siguiente forma: "Estos gallegos perdieron la Copa Cantábrica y creen que se comerán el pitu caleya. JA JA JA.  Como nun se fartuquen equí de fabada y sidra." Va ser una competición digna de ver.

Anunciu del abiertu dende la LNB.

Abiertu'l Pitu Caleya
8 de xunu
12 hores.- Concursos de distancia y encastraos.
13 hores.- Abiertu.
Campu de fútbol de Piarnu, Castrillón.


Esti sábadu, en La bolera.
Por otru llau, y como viníamos anunciando, esti sábadu 25 de mayu, día cuando se cellebra (o habría cellebrase con más enfotu) la emancipación de la Xunta Xeneral de Principáu d'Asturies, el programa de la televisión autonómica asturiana, "La bolera", va emitir el reportaxe grabáu mientres l'Abiertu d'El Llano. De xuru que salimos toos mui guapos y gayoleros. Asina que nun vos lo podéis perder. (A les 15 hores, na TPA7)

27 abr 2013

La bolera de la TPA

"La Bolera" ye un programa de la Televisión de Principado de Asturias que se dedica a la difusión y desplicación de los deportes y xuegos tradicionales asturianos. Échenlu los sábados a les 15 hores, pola A7, y una hora más tarde, pola A8.


Ye idega del miembru fundador del CNL, Carlos Suari, qu'estudiare Ciencies de la Educación Física y el Deporte y tá enfotáu nel espardimientu de les actividades lúdico-motores del país, publicando l'añu pasáu el primer Atlas de los Bolos Asturianos (Suburbia Ediciones, 2012). Ta producíu por Antón García y presentáu por Milio Rodríguez López, más conocíu como Milio'l del Nido pola so llabor como monologuista. La presencia del liriu espárdese más p'allá, siendo l'alma del equipu técnicu la nuestra compañera Lucía Menéndez.

Va unos meses, en xineru, Sergio Buelga fue convocáu pa faer unes tomes onde desplicar el xuegu del liriu, enseñar l'usu de los preseos y responder a unes entrugues pa un espaciu dientro'l programa nomáu "El cascayu", de conocimientu xeneral sobre esta estaya de la cultura asturiana. Los resultaos pudieron vese estes caberes selmanes.

Sergio Buelga desplicando qué ye'l liriu.

Pero tamién tuvieron presentes les cámares de "La bolera" nel primer eventu de liriu de la temporada, cellebráu va una selmana nel colexu públicu d'El Llano de Xixón. Milio, Antón y Lucía acompañáronmos en tou momentu, faciendo toles entrugues que permitieren dar una idega tovía mayor de lo que ye'l liriu y el llabor desendolcáu del CNL.

Habremos esperar hasta finales de mayu pa velo, anque de xuru que merecerá la pena. Mientres, dexamos con esti corte onde'l compañeru Sergio d'Espor[a] respuende n'El Cascayu.


Sergio Buelga, n'El Cascayu.


24 abr 2013

L'entamu la nueva temporada

Esti domingu 21 d'abril, el Conceyu Naiconal de Liriu entamó la temporada 2013 col IV Abiertu de Liriu d'El Llano, prueba tradicional yá nel calendariu lirieru, que cuenta cola implicación de la Asociación de Vecinos "El Fumeru", del populosu barriu xixonés.

Averáronse en total ocho machorradores, representantes de tres equipos del CNL y un individual. Nun son unos números granibles, pero sí esperanzadores: los qu'ellí nos alcontramos somos fieles y tenemos ganes de siguir col enfotu organizador del Conceyu. Nun se necesita más pa continuar que ganes. Otra tema sedrá l'espardimientu del xuegu, l'otru de los oxetivos colos qu'entamábemos va dos temporaes y que nos paez una xera bien grande anguaño. 

Por embargu, sí llegaron al eventu les cámares del programa "La bolera", de la Televisión del Principado de Asturias. Esti programa (idega de Carlos Suari, entamador del CNL, dirixíu por Antón García, presentáu por Milio'l de Nido y grabáu pola "espora" Lucía Menéndez) xira al rodiu de los xuegos y deportes tradicionales asturianos y emítese cada sábadu a les 15 hores. Yá pol mes de xineru s'interesaron pol liriu, pa que-yos desplicásemos el mecanismu del xuegu y los oríxenes del Conceyu. Nesta ocasión, Milio entrugó pola xestión y los oxetivos del CNL d'esta temporada y sobre los concursos d'encastraos y de distancia. Y nosotros, encantaos de sirvir d'anfitriones, ufréndonos a entrevistes y esperimentos de toma d'imáxines, con cámares na tiesta inclusive. 

Antón García colocándo-y una mini-cámara na tiesta a Sergio Buelga.


Concursos

L'actividá escomenzó colos concursos de distancia y d'encastraos.

Paez que fríos tovía, la mayor parte de los machorradores nun consiguieron desaverar el liriu más p'allá del mediu'l campu de la pista del colexu públicu d'"El Llano", onde se disputó l'eventu. De los ocho, solo Hevia, Pepa, César y Sergio lo consiguieron. Sedríen estos dos últimos, con unes marques de 14 y 18 puntos respeutivamente dempués de les trés tiraes, quienes llegaríen a la final. Sergio dexóla finiquitada col primer machorrazu, qu'algamó los 9 puntos. Con 13 puntos totales, por 7 del chilenu, ganaba'l concursu.


El concursu d'encastraos tuvo más reñíu. El primeru n'encastrar los seis lirios fue Sergio, con un tiempu de 30"3, pero Toño superábalu actu siguíu, dexando la marca en 26"5. César establecía un rexistru de 44"1. Pero sedría Pepa quien tuviere más cerca de la victoria: encastró cinco lirios en menos de 20 segundos, pero'l sestu resistióse y paró'l cronómetru en 54"3. D'esta miente, Toño ganaba'l concursu d'encastraos, quedando Sergio segundu, César terceru y Pepa, cuarta.


L'Abiertu

Siguiendo los parámetros propuestos la temporada pasada, esti abiertu diba puntuar pal Campionatu d'Asturies Individual de Liriu y, sumando los puntos algamos por tolos xugadores de cada equipu, pal Campionatu d'Asturies de Liriu.
Los nueve machorradores presentes dividiéronse en dos grupos. El grupu 1, de cinco, con Luis Carlos, Arturo, Cristian, Hevia y Toño. Y el grupu 2, con César, Lili, Pepa y Sergio.
Arturo, de Quirinal, preparándose pa golpiar, mientres Toño, en segundu términu, orienta'l liriu.

El grupu 1 fue mui igualáu. Si bien Cristian y Hevia quedaron escolingaos dende'l principiu, por nun puntuar en denguna carrera, los otros tres xugadores puxaron pol primer puestu hasta la cabera carrera. Toño, que la abría, encastró'l primeru y sumó dos puntos que lu colocaben a la tiesta con 6. Luis Carlos, xusto nel siguiente intentu, algamaba otros dos puntos. El siguiente tiru yera pa Arturo, qu'encastró na mesma ronda, superando a los anteriores y garrando la primer posición con 7 puntos.

Nel grupu 2 destacó Sergio dende'l principiu, ganando cuatro carreres y sumando 9 puntos al final. La so efeutividá facía qu'el restu participantes nun llegaren a encastrar hasta en dos carreres. Asina, la puntuación fue menos granible que nel grupu 1 y la segunda posición fue la única posibilidá pa entrar na final. Llucharon por ella Pepa y Lili, qu'empataron a dos puntos na última carrera, lo que significó la victoria pa la xugadora d'Espora, Campeona d'Asturies del añu pasáu.

La final escomenzó con dominiu del club de xuegos tradicional Espor d'Asturies. Luis Carlos yera'l primeru n'encastrar y Sergio-y empataba na ronda. Na segunda carrera, colocábase na tiesta, dempués de garrar un puntu polos dos de Toño. Esta pareya algamaría los puntos na tercera, dexando al restu ensin nada. D'igual mou qu'Arturo na cuarta, esta vegada en solitariu, con dos espléndidos machorrazos que-yos lo poníen imposible al restu. Asina, llegábase a la última carrera con dos xugadores con posibilidaes pa ganar: Sergio, con 5 puntos y Toño con 4; y con Arturo, que contaba con 3 puntos, con opciones pa empatar pol primer puestu. Luis Carlos, con 2 puntos, tovía podía faese cola segunda posición. Y Pepa, que tovía nun puntuare, col enfotu de garrar unos puntos más pa la clasificiación xeneral. Pero fue Sergio, que salía n'últimu turnu la ronda, quien garró los 2 puntos en tres güelpes, y solo Arturo pudo puntuar con ún, lo que-y valió pa empatar a puntos con Toño na segunda posición.


Clasificaciones

Sergio, recibiendo'l diploma del Primer Puestu del Abiertu, del so campañeru Luis Carlos.
Esti yera'l primer eventu del añu 2013 y fízose puntuable yá pa los dos campionatos. D'esta miente, Sergio, d'Espor d'Asturies, pónse primeru na clasificación, con 20 puntos. Toño, de los Sidrones, y Arturo, de Quirinal, segundos nel abiertu, queden con 17 puntos. Luis Carlos y Pepa, d'ambos d'Espor[a], lleven 12 y 10 puntos respeutivamente. La xugadora de los Sidrones, Lili, como única tercera non clasificada pa la final (puesto que nel otru grupu empataron pol segundu puestu dos machorradores), algamó 4 puntos. El restu, al haber otru empate nel grupu 1, quedaron colos dos puntos correspondientes a los cuartos clasificaos.


Asina, la clasificación por equipos del Campionatu d'Asturies de Liriu, queda con Espor d'Asturies a la tiesta, colos sos 44 puntos. Los Sidrones, segundu, con 21. Y Quirinal, terceru, con 19.


15 abr 2013

IV Abiertu d'El Llano de Liriu


Entamamos esti nuevu cursu de liriu 2013 col yá tradicional abiertu de liriu d'El Llano, a disputar por cuarta vegada consecutiva nel popular barriu xixonés. 

Esperamos que la temporada nun quede ehí y seyamos quien a algamar un nuevu puxu pal liriu que paez desaniciao dende que, ellí pol xunetu del 2011, finara'l III Campionatu d'Asturies de Liriu. L'enfotu con que s'entamó los primero años, ficieron qu'el númberu d'equipos llegare a seis y el de machorradores, en delles ocasiones, a casi la trentena nes partíes del campionatu. Por embargu, dende aquel momentu, y van casi dos años, solo hubo dos abiertos más, en Piarnu y n'El Llano, amás de les copes Cantábriques. Son munches les torgues pa un xuegu chiquitín y ensin más sofitu qu'el de los propios interesaos en xugar, pero sigue habiendo llocos que caltienen la esperanza de qu'esti xuegu tradicional del país esporpolle de nuevo.

Poro, l'alcuentru nel Colexu Públicu d'El Llano, entamáu por Espor d'Asturies, col apoyu de la Asociación de Vecinos "El Fumeru", que confía abondo na xente del liriu y na recuperación de los xuegos tradicionales. Porque, como díciamos va unos años, préstamos xugar, pasar el tiempu al rodiu los palos, falando y viendo a la xente que comparte esta afición.

Y, con esti abiertu, y los concursos de distancia y d'encastrar qu'axunta, disponémonos a escomenzar dos nuevos Campionatu d'Asturies, por equipos y individual, que tengan una personalidá como les de los inicios y superen el triste viaxe pel desiertu de la última temporada. Porque, a la xente'l liriu, paezmos probe ganar la Copa Cantábrica a Galiza, nel marcu de la Universidá Llaboral de Xixón, y nun ser quien a caltener los eventos llariegos. Por intentalo otra vuelta, que nun quede.

Asina que esperámosvos a toos, pa sofitar esti enclín porque esti xuegu de nós nun caiga nel escaezu, p'aconceyanos y pa xugar. La cita ye:

IV Abiertu de Liriu d'El Llano

12.00 Concursu de distancia
12.30 Concursu d'encastraos
13.00 Abiertu

21 d'abril
Colexu Públicu d'El Llano - Xixón