Y el domingu, apaeció Luis.

La cuarta xornada del Campionatu d'esti añu tien un nome propiu a destacar: Luis Riaño. El machorrador d'Espora algamó una de les meyores participaciones del añu, col 81% de los puntos disputaos que-y dieron la partida al so equipu y con una victoria folgosa nel abiertu. De poco sirvió la inspiración que traxera consigo l'equipu de Quirinal, con un magníficu Arturo a la tiesta, y que-yos valió pa conseguir la segunda plaza por equipos y acopar los tres puestos del cuadru d'honor del abiertu.

La partida.

Escomenzó puntual la partida por equipos na pista cubierta del Colexu Públicu "El Llano" de Xixón. La mañana soleada del domingu invitaba al paséu y pronto l'avenida d'El Llano s'enllenó de curiosos que se deteníen pa ver qué facíen aquellos llocos tan temprano con dos palos. Yeren les 11:20 cuando Pepa daba'l primer machorrazu.

Asturliriu Muyeres: Jeny, María, Tere y Joni.
Asturliriu Homes: Falo, Laura y Javier.
Sidrones: Lili, Alba y Giovanna.
Quirinal: Arturo, Hevia y Juan.
Espora: Sergio, Luis Carlos, Luis y Pepa.
Camaretá: Lucía, Xosín y Aarón.

Yá dende un comienzu se dixebró la competencia en dos: por una parte, Espora, Quirinal y la Camaretá, pa garrar el triunfu; por otra, los dos equipos d'Asturliriu (esta vez mistos) y Sidrones, pa nun llevar l'ultimu puestu.

De la mano d'Arturo, Quirinal consiguió llegar al primer terciu de la partida en cabeza, siguí mui de cerca polos organizadores y la Camaretá (11, 10 y 8 puntos, respeutivamente). A estes altures, los tres equipos restantes taben empataos a 3.

Nes siguientes cinco carreres, un pequeñu emburrión d'Espora fue contrarrestáu polos contrincantes direutos, pa cruciar l'ecuador empataos carbayones y avilesiones a 14 puntos, cola Camaretá a tres de distancia. Pela so parte, l'emburrión d'Asturliriu Homes nesi mesmu períodu (seis puntos de diez) nun fue siguíu nin poles femes nin por Sidrones, que taben empataos a cuatro.

Arturo de Quirinal.

Puntu a puntu, la partida diba cayendo nes manes espores, pesie a la irregularidá de Sergio, Luis Carlos y Pepa, que daben una de cal y otra d'arena. Pela so parte, los de Quirinal yeren más estables, pero dexaben pol camín carreres onde Espora nun puntuaba. Asina, la distancia ente dambos equipos, al llegar a les cinco caberes carreres, yera de tres puntos (25-22). La Camaretá nun pudo llevantase d'un parcial de cinco ceros siguíos ente la carrera 16 y la 20 y con 16 puntos, taba mui lloñe de la victoria. L'equipu masculín d'Asturliriu, en tierra de naide, índa tenía esperances d'alcanzar a los noreñenses, colos sos 12. Y el femenín llegaba con dos puntos de ventaya sobre los (esti día, les) Sidrones.

Luis d'Espora y Falo d'Asturliriu.

Un puntu de Luis y otru de Luis Carlos ponía con una renta de cinco puntos al equipu carbayón sobre l'avilesín cuando quedaben seis puntos en xuegu en dos carreres ganaes por Jeny d'Asturliriu Muyeres y por Lili de los Sidrones, que lo dexaben too abierto per baxo. La siguiente carrera llevola en solitario Arturo de Quirinal, lo que subía les sos esperances pa ganar. Pero Luis tiró otra vuelta de la so clase y fizo dos nuevos puntos de carrera, colos que'l so equipu facía 29. Juan consiguía empatar la carrera al encastrar nel mesmu turnu, como tamién ficiera Javi d'Asturliriu Homes, y dexaba la distancia a tres puntos pa una carrera. Paecía que taba too decidío, hasta que'l machorrazu de salida d'Hevia rozaba col castru no que pudo ser un encastráu que-y diera los tres puntos a Quirinal que necesitaba. Hevia encastraba tres tiraes dempués y llevaba los insuficientes dos puntos de carrera pa llegar a 28. Y, na mesma, la debutante Giovanna tamién lo facía na mesma ronda, colo que Sidrones empataba con Asturliriu Muyeres a 8 puntos na quinta posición. La tercer plaza fue pa noreña y los 18 puntos de la Camaretá, polos 14 totales d'Asturliriu Homes.


Esti resultáu fai que la clasificación s'apierte muncho. Anque la Camaretá de Liriu de Noreña va siguir otra xornada nel primer puestu colos sos 19 puntos de partida, yá siente l'aliendu d'Espor d'Asturies, que va un puntu por detrás, el de Quirinal, a dos, y el d'Asturliriu Homes, a cuatro. Bien por detrás, Sidrones lleven 11 y Asturliriu Muyeres, 9. Too esto fai ver que'l Campionatu 2011 va decidise na cabera xornada.


L'abiertu y los resultaos individuales

Espor d'Asturies decidió dedicar el II Abiertu d'El Llano de Liriu a les figures d'Ígor Medio y Carlos Redondo, músicos que finaron el 23 de xunu de 2006 nun accidente de tráficu cuando taben de xira col so grupu musical Felpeyu. Esti abiertu apellidábase entós "N'Alcordanza", nome que tuvo'l conciertu del cabudañu na playa de Poniente de Xixón.


La escena cabera de la partida, volvió a repitise. Taba claro que Quirinal taba faciendo'l meyor xuegu y asina nun fue d'estrañar que los sos tres representantes se colaren nes semifinales. Pero tamién yera nidio que Luis d'Espora yera'l machorrador más granible de la xornada y, coles mesmes, desfízose nes semifinales de Juan y na final d'Arturo (que ganara al so compañeru Hevia na otra semifinal).

Arturo, Luis, Juan y Hevia, cuadru d'honor del abiertu.

Per primer vez na temporada, ganaba un abiertu un xugador distintu a Javi d'Asturliriu, que tuvo que marchar dempués de la partida al enterase de la defunción d'una familiar. Y yera'l día de Luis, por supuesto, qu'algamaba la puntuación másima de 15 puntos pal Campionatu d'Asturies de Liriu Individual, subiendo hasta'l tercer puestu, polos 20 con solamente tres eventos disputaos.

Tamién hai que destacar el xuegu d'Arturo de Quirinal, segundu xugador más granible de la partida y finalista del abiertu y los sos 11 puntos individuales.

Na xeneral, sumando mínimamente nestos eventos xixoniegos, caltiénense Sergio y Javi, con 37 y 31 puntos respeutivamente.



Prósimes feches.

El 2 o el 3 de xunetu va disputase la quinta xornada en Piarnu, col míticu pitu caleya en disputa pal abiertu, dempués de que l'añu pasáu nun se pudiera celebrar poles lluvies tremendes que cayeron na zona. Yá informaremos equí de la hora y el día concretos.

Pero, anantes, esti prósimu domingu 26, la cita ta más allá del Eo. La Liga Nacional de Billarda, como bien faciendo los últimos años, invítamos a los asturianos a participar nel Tornéu Interparroquial de Ribadeo, conocíu como l'Año Prietu o Mouro, por tratase'l premiu d'un corderu añal. Va ser nel Área Recreativa d'A Devesa, en Ribadeo, a partir de les 11 la mañana, anque tamién va haber actividaes pela tarde.


A diferencia d'otros torneos abiertos gallegos, esti dispútase por equipos d'al menos tres xugadores, por supuesto, cola normativa LNB a varar a billarda.

La caravana asturiana tará encabezada por Hevia, que se va encargar de la coordinación. Si vos apetez l'aventura gallega, poné-yvos en contautu con elli nesti númebru: 644 29 42 87 begin_of_the_skype_highlighting 644 29 42 87 end_of_the_skype_highlighting (a partir de les 14:30).