El liriu, de vuelta n'Illas

Esti caberu domingu, la pista de les escueles de La Caizuela fueron l'escenariu onde se punxo en marcha el III Campionatu d'Asturies de Liriu, al empar que'l II Campionatu d'Asturies de Liriu Individual, cola partida oficial por equipos y el II Abiertu de La Caizuela – Quesu La Peral.

Equipos

Presentáronse fiches pa la participación de seis equipos distintos, pero non los esperaos.

L'equipu de Piyarnu dexó la so separtación del de Quirinal pa prau, sofitando la so decisión na debilidá que se diba creyar en dambes partes. Asina, Hevia y les fiches del equipu de Castrillón van formar parte del equipu avilesín esta temporada, pero col compromisu de mantener la fecha de primeros de xunetu, con xornada, abiertu'l Pitu Caleya y concursos d'encastráu y distancia, amás de talleres pa guah.es mientres les fiestes de la so parroquia.

Pela so parte, el decanu Asturliriu, ensín dexar de tener una identidá única, presentó dos equipos, un femenín y otru masculín. La posibilidá de presentase esti añu al Campionatu d'esta mena yá fuera adelantada nel conceyu d'Avilés, onde s'aprobó l'alcuerdu pa la celebración del III Campionatu d'Asturies. L'altu númberu de machorradores que presentaben a cada partida, facía que caún xugara mui poques carreres. Asina, con dos equipos, que presenten les sos fiches a parte l'ún del otru, tolos xugadores van disputar un mayor númberu de carreres.

La nota ñegativa del eventu púnxola l'equipu de los Sidrones. La dificultá de sacar un equipu p'alantre fizo que solamente apaecieren les fiches necesaries pa inscribilu a la competencia y una xugadora, Lili. El trabayu o la preparación pa les oposiciones d'educación a les que van concurrir dellos xugadores ficieron incompatibles l'asistencia de los trés xugadores mínimos cola primera xornada. Cola promesa d'intentar asistir a cuantes puean, Sidrones apurrió estes nueves fiches que'l CNL aceutó de buena gana pa nun perder esti grupu de xente tan entregáu a la causa'l liriu cola idega de que, pa la temporada que vien y con circunstancies más afayaíces, Sidrones rexurda con too'l so potencial.

Ensin embargu, la Camaretá de Liriu de Noreña, con Xosín Pacheco a la tiesta, venció les dificultaes propies del so conxuntu. Les incompatibilidaes ente la competencia liriera y el so deber como integrantes de la Agrupación Folklórica Musical "Villa y Condáu de Noreña" nun paecen echar p'atrás a esti equipu que yá l'añu pasáu diera buenes pruebes del so buen facer. Con toles fiches en regla y la idega d'aumentar el númberu, escomiencen con ganes renovaes el nuevu campionatu.

Por último, el campión Espor d'Asturies, tamién tuvo dificultaes pa constituyir equipu. A les baxes voluntaries, como la de Carlos Suari, machorrador más granible del añu pasáu, xuntáronse nueves dientro'l club, bien por incompatibilidá col trabayu, bien por alcontrase fuera d'Asturies. Poro, salieron, de momentu, cinco fiches xustes.

Asina, van ser estos seis equipos los que disputen el III Campionatu d'Asturies de Liriu.

Partida oficial

Lili, xugadora de los Sidrones, ufiertóse voluntaria pa faer de vocera/anotadora durante la tirada, figura qu'esti añu tien una mayor repercusión, sigún les regles aprobaes nel alcuerdu.

Configuraes les llistes y comprobáu que tolos equipos teníen el númberu mínimu de fiches (índa provisionales) desixíes, escomenzó la partida oficial colos siguientes participantes:

Quirinal: Hevia, Pravia, Pintu y Pichu.

Espor[a]: Pepa, Xuacu, Sergio y Luis Carlos.

Asturliriu Homes: Enrique, Falo y Javi.

Asturliriu Muyeres: Tere, Luisa y Ferrer.

Camaretá: Aarón, Dani y Xosín.

Destacó'l nuevu sistema de puntuación, onde algamen 2 puntos los primeros n'encastrar, 1 puntu daquellos que lo faen na siguiente ronda y queden ensin ellos el restu, dio-y más rapidez a la partida, al faer les carreres más curties. Claro ta que les carines d'aquellos que quedaben a l'altura'l castru ensin posibilidá de puntuar yá, pesie a llegar en pocos güelpes, tamién yeren destacables.

Momentu de la primer carrera de la temporada, con Enrique, Aarón y Tere.

La primer carrera del tornéu llevóla Enrique d'Asturliriu Homes, por delantre d'Aarón, de la Camaretá. Pesie a la resistencia d'Espor[a] nes primeres carreres, fue síntoma de lo que diba ser toa la partida: un manu a manu ente los de Castrillón y los de Noreña, colos uvieínos detrás a curtia distancia y con Quirinal y Asturliriu Muyeres descolgaos dende un principu.

Dempués de les primeres quince carreres, la Camaretá diba en primer puestu con 13 puntos, dos por delantre d'Asturliriu Homes y cuatro d'Espora. Les muyeres d'Asturliriu llevaben 5 puntos de carrera y Quirinal, que nun puntuó hasta la carrera 11, solo 2.

A partir d'esi momentu, la igualdá na tiesta tovía fue mayor: a falt de cinco carreres, Asturliriu Homes alcanzaba a la Camaretá, a 20 tantos. Descolgáu, Espor[a] algamaba 17. Na so llucha particular por evitar el caberu puestu, Quirinal remontaba hasta los 10 puntos, superando por ún a les muyeres de Castrillón.

Les cinco últimes carreres fueron brillantes por parte de los dos equipos punteros, pa llegar a la cabera carrera cola Camaretá dos tantos por enriba nel marcador, dempués de puntuar en toles anteriores del llote. Pero surdió la figura de Javi otra vuelta, qu'algamó los dos puntos de carrera, dexando a cero al restu de contrincantes y empatando la partida a 26 tantos.

El recuentu postreru sofitaba'l resultáu, colos dos equipos, la Camaretá y Asturliriu Homes, empataos a 26. Terceru, con 21, Espora. Cuartu, Quirinal, con 12. Y Asturliriu Muyeres, quintu, con 9.

La clasificación provisional del III Campionatu d'Asturies de Liriu ta encabezada por Asturliriu Homes y la Camareta, con 7 puntos de partida; terceru, Espor d'Asturies, con 4; cuartu, Quirinal Liriu Sport, con 3; quintu, Asturliriu Muyeres, con 2; y sextu, Sidrones, con 0.

II Abiertu de La Caizuela – Quesu La Peral

Acabante la tirada oficial, escomenzó l'abiertu de La Caizuela, disputáu por segundu añu consecutivu dempués de la xornazada organzada por Quirinal.

Diecisiete machorradores lu disputaron, llegando a les semifinales Javi d'Asturliriu Homes y Luis Carlos d'Espora, pola parte d'enriba'l cuadru, y Xosín, de la Camaretá y Sergio d'Espora, pela baxa.

Luis Carlos escomenzó ganando la primer carrera, pero Javi remontó algamando les dos siguientes. Xosín, pela so parte, desfízose pela vía rápida de Sergio.

Xosín y Javi na final del abiertu.

Javi, que yá fuere resolutivu na partida por equipos, garrando los dos últmos puntos de carrera a disputar y empatando l'alcuentru, tamién ganó la final a Xosín, que nun pudo faer na énte'l rodiellu xugáu pol castrillonense.

Asina, Javi facíase col quesu La Peral de premiu d'un abiertu copáu por xugadores d'Asturliriu (l'añu pasáu ganó Falo).

Clasificación Individual

Los resultaos individuales de la partida por equipos apurrieron un par de sorpreses.

La primera, la dificultá pa puntuar fizo que baxaren los cocientes de los xugadores (puntos algamaos ente puntos disputaos), polo que solo trés machorrados consiguieron más del 50% de los puntos que disputaren.

La segunda, el fechu de que'l primer y el tercer clasificáu fueren d'Espora: Sergio, col 64% de los puntos dispuatos y Xuacu, cola metá exauta; que relegaron a los xugadores de los equipos ganadores de la partida (salvo a Javi, que foi segundu con un 55%).

Dani y Xosín, de la Camaretá, empataron na cuarta plaza. Sextu fue Pravia, de Quirinal. Y na sétima posición quedaron Aarón de la Camaretá, Luisa d'Asturliriu Muyeres y Falo d'Asturliriu Homes.

Les puntuaciones del abiertu fueron: 5 pa Javi, el ganador; 3 pa Xosín; 2 pa Luis Carlos d'Espora; y ún pa Sergio.

Asina, la clasificación individual queda con Javi d'Asturliriu na tiesta, con 13 puntos, siguíu por Sergio d'Espora, con 11 y de Xosín, de la Camaretá, con 8.

Siguiente xornada

La siguiente xornada va ser organizada pola Camaretá de Liriu de Noreña na so villa, durante les fiestes del picadiyu qu'organiza'l conceyu nel mes d'abril.

Va ser l'últimu momentu pa presentar les fiches de xugadores apuntaos polos equipos pa disputar el Campionatu, amás de sirvir pa consolidar el modelu d'anotación y vocéu de machorradores.

Esperemos que los equipos tengan menos problemes pa poder acudir con tolos efeutivos y que, al menos, se repita l'espectáculu vivíu l'añu pasáu na xornada celebrada nel paséu Frai Ramón de la villa condal.

¡Ellí nos vemos!

1ª Xornada del Campionatu 2011

La primera xornada del Campionatu d'Asturies de Liriu 2011 yá tien fecha definitiva: va ser el domingu 27 de marzu, nes escueles de La Caizuela, n'Illas, a partir de les 11:15 de la mañana.
La primer fecha apurrida por Quirinal Lirio Sport pa la cellebración de la partida y l'abiertu tuvo camudase porque'l sitiu ellexíu taba acutáu pol Conceyu d'Illas pa otres actividaes culturales, anque ufiertó la so collaboración en tolo necesario pa la realización d'esta xornada y de futuros eventos.
La partida, primera a disputase col nuevu sistema de puntuación, estrenará la inscripción mediante les fiches que rexistren los xugadores de los equipos del Conceyu Nacional de Liriu, polo que s'abre la fueya de partida quince minutos enantes del escomienzu, como se decidió nel conceyu d'Avilés.
Acabante la tirada oficial, daráse pasu al II Abiertu de La Caizuela - Quesu La Peral, de llibre inscripción pa tou aquel que quiera competir.
Al final, los equipos CNL aconceyaránse pa revisar la puesta en marcha de les incorporaciones reglamentaries y pa zarrar, de forma definitiva, el calendariu de la competición.
Mui ilusionaos cola nueva temporada y los cambios del sistema, dende'l CNL invitámos-vos a toos a acompañanos n'Illas.

Domingu 27 de marzu
1ª Xornada del Campionatu d'Asturies de Liriu
Inscripción na partida a partir de les 11:15
Escomienzu a les 11:30
II Abiertu La Caizuela - Quesu La Peral
(Válidu pal II Campionatu d'Asturies de Liriu Individual)
Acabante la partida oficial (13:30)
Escueles de La Caizuela
Illas

Concursu d'encastraos

OXETIVU.- Tardar el menor tiempu posible n'encastrar seis lirios.

1. El tarrén de xuegu tará dispuesto al rodiu d'un castru reglamentariu (80 centímetros de diámetru).
2. Colocaránse seis lirios en puntos asitiaos a diferentes distancies del castru: a la distancia d'un liriu (c. 20 cm); a la de dos lirios (c. 40 cm); a la d'una machorra (c. 60 cm.); a la d'una machorra y un liriu (c. 80 cm.); a la d'una machorra y un liriu (c. 1 m.); a la de dos machorres (c. 1,20 m.).
3. El xugador pue escomenzar por el liriu que prefiera.
4. El tiempu escomenzará a contar dende que'l machorrador toque'l liriu.
5. Los lirios nun encastraos a la primera puen ser xugaos nuevamente dende'l sitiu onde cayeron, les vegaes que-y pruyan al participante, orientándolos si asina quisiere.
6. El tiempu másimu de xuegu ye d'un minutu. Si el xugador nun encastrase los seis lirios nesi tiempu, tendrase en cuenta'l númberu de lirios que sí encastró.
7. En casu d'empate, los xugadores involucraos tirarán dende la distancia mayor, ganando quien encastre en menos güelpes.
   

Concursu de distancia

OXETIVU.- Algamar el mayor númberu de puntos dempués de les trés tiraes.

1. El tarrén de xuegu (del tamañu del reglamentariu na normativa CNL) tará dividíu en 10 tramos (los seis primeros d'unos 5 metros y los cuatro caberos, d'unos 2'5 metros). Cada tramu tendrá una puntuación, siendo mayor cuanto más lloñe del aniciu tea'l tramu.
2. El xugador tien trés tiraes p'alloñar lo más posible los lirios del puntu d'aniciu.
3. El xugador tien trés intentos por cada tirada pa realizar una tirada válida.
4. Nun ye tirada válida si el liriu nun queda dientro del tarrén de xuegu, marche esti polos llaterales o pol fondu.
5. Tampoco ye tirada válida si, dempués de golpiar el liriu, nun se consigue golpiar de nuevu enantes de que caiga al suelu.
6. Si dempués de los trés intentos por tirada, nun s'algama una tirada válida, el xugador nun puntúa esa ronda.
7. El resultáu final vien de la suma de les trés tiraes valides.
8. Los dos (o más, en casu d'empate) xugadores qu'algamen meyores resultaos, xueguen la final.
9. En casu d'empate, los xugadores involucraos tirarán una vez nueva, ganando quien alloñe más el liriu.

Alcuerdu pa la celebración del III Campionatu d'Asturies de Liriu

Sistema competitivu

1. El Campionatu va tener tantes xornaes como equipos representaos (n), caúna d’elles organizada y encontada económicamente por un equipu.
2. Encamiéntase que, empatando coles xornaes del Campionatu, s’entamen opens individuales qu’afalen la participación de xente non inscrito nos equipos del CNL, baxo fórmules lúdiques y abiertes.
3. Les partides sedrán a 30 carreres con tantos participantes en caduna como equipos representaos (n).
4. Cada equipu inscribe nel orde que quiera los sos xugadores, hasta cubrir les 30 participaciones, siempre que, polo menos, participen 3 xugadores estremaos por equipu. Tolos xugadores inscritos na competición han tar rexistraos pol equipu nel CNL, habiendo presentar la ficha correspondiente. El períodu d'inscripción ábrese 15 minutos enantes del horariu establecíu de la partida, qu'escomenzará puntual.
5. El primer xugador qu'encastre'l liriu conseguirá 2 puntos, como'l restu de xugadores que lo algamen na mesma ronda. Tolos que lo faigan na siguiente ronda de llanzamientos tendrán 1 puntu. Daquellos que nun encastren, finarán con 0 puntos de carrera.
6. Otórgase 1 puntu de carrera extra al equipu del xugador qu’algame un “encastráu” (introducir el liriu del primer güelpe).
7. Gana la partida l’equipu que sume más puntos de carrera. Asígnense n +1, n-1, n-2… y asina hasta n-(n-1) puntos de partida. En casu d’incomparecencia d’un equipu, nun sumará dengún puntu de partida.
8. La clasificación del Campionatu faise siguiendo esta xerarquía: puntos de partida, puntos de carrera, historial de puestos nes partides y historial de puestos nes carreres.

Sistema de xuegu

1. L’anotador/voceru noma a los n xugadores de la carrera. Éstos respeten a lo llargo de tola carrera l’orde de llanzamientu nel que fueron nomaos. Dengún xugador pue llanzar enantes de que l'anotador/voceru lu nome. Si lo fae, repite'l llanzamientu, independientemente del resultáu qu'algamara col anterior invalidáu.
2. Depués de llanzar, el xugador espera que pare’l liriu cola fin de conservar la posición si fuera preciso volver a ella
3. Nun se considera acabáu’l llanzamientu hasta que nun para’l liriu por sí solu, ensin que’l xugador puea tocalu una vez que caiga al suelu. La posición válida ye na que para’l so movimientu, independientemente de lo que fixera na so trayectoria.
4. Nun hai avance válidu si nun hai los dos golpeos (suelu y aire). En casu de fallu, vuélvese al llugar d’orixe.
5. Ye fallu que’l liriu pose fuera dafechu del tarrén acotau.
6. Mentanto tea nel aire, el liriu pue ser golpeáu infinites vegaes.
7. La carrera acaba pa un xugador cuando’l so liriu, paráu, dexa de tener contactu col área qu’arrodia’l castru.
8. El liriu puede orientase como quier el xugador siempre que nun conlleve avance.

Tarrén y ferramienta

1. El liriu tendrá, tolo más, 22 centímetros de llargor y 3 centímetros de diámetru máximu. Ha ser de madera y nun tener elementos artificiales, a nun ser una pegatina o una rotulación.
2. La machorra tendrá, tolo más, 4 centímetros de diámetru mayor y ha ser de madera. El cau de golpéu nun pue tener elementu artificial nengún.
3. El tarrén ha tener un llargor d’ente 30 y 50 m. y un anchor d’ente 15 y 25 m. Tará bien marcáu con cinta al ras, pintura o cambiu de material.
4. En casu de xugar nun tarrén irregular o d’herba, y siempre que tolos equipos tean d’alcuerdu, pueden usase dos lirios. Unu d’ellos val d’encontu pal principal.
5. El castru ye una estaya circular de 0,80 a 1,20 metros de diámetru (la lonxitú de una a dos machorres). Puede pintase en suelu, ser un círculu de lona o, inclusive, tener unos centímetros d’elevación. Tará colocáu na llinia medular de la pista a una distancia de salida equivalente al 75% del so llargor.

A mín préstame xugar

Estes yeren les pallabres de Falo d'Asturlirio y les que ficieron salvar les distancies esistentes ente los equipos CNL nel primer conceyu del añu, porque quedó claro que a toos nos prestaba. A les cuatro y media de la tarde d'esti domingu 27 de febreru, nel Bar Timo d'Avilés, escomenzaba la xunta preparatoria de la Temporada 2011 del Conceyu Nacional de Liriu.

Asistieron los representantes de los cinco equipos de la temporada pasada, más el d'ún nuevu nomáu Piyarnu, surdíu nesa parroquia castrillonense y del sen de Quirinal Liriu Sport.

Discutiréronse la puesta en marcha de les propuestes falaes pol CNL nel conceyu de creyación de la Promotora de la FALA (ochobre del 2010). Decidióse dexar el tiempu que dure'l nuevu Campionatu pa creyar los clubes necesarios pala constitución de la Federación y consolidar dalgunos equipos que tan teniendo problemes d'organización interna, y ponese manes a la obra colos estatutos a partir del branu.

Con estes nueves, el Conceyu Nacional de Liriu siguirá siendo l'ámbitu d'organización, pero col calter de provisionalidá tovía más marcáu. La necesidá de contratar un seguru de responsabilidá civil y de mutua pa los participantes túvose güéi por tolos equipos como una cuestión fundamental y el retrasu nesta estaya burocrática, que'l marcu federativu tien de solucionar, ye sintida como mui perxudicial.

SISTEMA COMPETITIVU

Sicasí, como adaptación y adelantu, el Conceyu Nacional de Liriu aprobó por unanimidá la creyación d'un sistema de fiches, similar al modelu federativu, pol cual los equipos identifiquen a los xugadores nes partides oficiales del III Campionatu d'Asturies de Liriu. Asina, creyarase un rexistru de xugadores CNL, que sofite'l compromisu de los machorradores col xuegu y colos sos equipos. Esti documentu identificativu sedrá necesariu pa la almisión d'un xugador na fueya de la xornada ya implicará l'adhesión del machorrador a un equipu concretu.

Modelu de ficha.

Amás, consensuóse que cada equipu ha rexistrar un númberu mínimu de 5 xugadores pa poder participar nel Campionatu. La inscripción de xugadores tará abierta hasta l'escomienzu de la segunda xornada del campionatu, a finales d'abril.

Más difícil foi llegar a un acuerdu prestosu pa tolos miembros col númeru mínimu de xugadores que cada equipu tien d'inscribir na fueya de la xornada pa participar na xornada. En LLamorgal falóse de 3 xugadores, baxando de los 4 del añu pasáu. Pa los equipos que tienen un númberu grande y, sobre too, estable de machorradores, ye un agraviu porque, como bien dicía Falo d'Asturlirio "A mín préstame xugar", porque tien d'esperar muncho pa disputar la so carrera, mientres que los xugadores d'otros equipos con más dificultaes, cuerren más de siguío. Aprobóse al final la rebaxa, estimando que ye meyor pa la competición y pal xuegu un mayor númberu d'equipos, col enfotu de superar los sos problemes, a contar con dos equipos fuertes que dexen estancáu el procesu d'esportificación del liriu.

La inscripción de los xugadores a la partida fadráse durante'l cuartu d'hora anterior al aniciu de la partida. Cada equipu, escomenzando pol organizador del eventu, darán los nomes de los xugadores pol orde que deseye, apurriéndo les fiches de los mesmos. Dengún xugador podrá inscribise más tarde o ensín mostrar la identificación CNL.

Respeutu al sistema competitivu de les partides, mantiénse'l númberu de carreres en 30 y ensín posibilidá de reduciles. Ensín embargo, camúdase'l sistema de puntuación, por ún que favorez carreres de menos duración. Asina, sumen 2 puntos daquellos xugadores qu'encastren primero, 1 puntu daquellos que lo faigan na siguiente ronda y 0, los que queden ensín encastrar.

Amás, establezse dafechu la figura del Anotador/Voceru. Va ser miembru del equipu organizador de la xornada (puen ser dos, en casu de que'l primeru participe na partida). Encargaráse d'inscribir a tolos xugadores na fueya de la xornada; glayar l'orde de xuegu de los machorradores en cada carrera, amás d'avisar que tean preparaos los de la siguiente tirada; dar el permisu de tiru al xugador que-y correspuenda, pa evitar que l'orde de la carrera camude; anotar los resultaos de cada carrera y los finales; y asegurase de qu'ún representante por equipu robla la ficha. El Anotador/Voceru nun tien atribuciones d'arbitraxe y les sos opiniones nun tendrán rangu sancionaor.

Especial mención se fizo al fechu de mantener siempre'l turnu de xuegu durante la carrera. Decidióse que siempre qu'un xugador s'adelante al permisu'l voceru, tenga que repitir el tiru.

Por últimu, fáise regla que les decisiones arbitrales seyan entamaes polos propios xugadores de la carrera. Solo ellos tendrán la capacidá de debatir sobre cualquier fechu duldosu (zarrapastrones, encastraos, salides del tarrén...), siendo necesarios trés votos en sentíu a repitir la xugada.

CONCURSOS

Aprobóse la propuesta d'Espor[a] introducir xunto a los abiertos que nun fueren asociaos a xornaes, los concursos d'encastrar y de distancia que se probaron nel II Alcuentru Xixón de Liriu, en xineru de 2011.

D'esta forma, les actividades de cada encuentru quedaríen más equilibraes en cuanto a tiempu, favoreciendo'l desplazamientu de la xente que tendría más posibilidaes de participar nel eventu. (L'añu pasáu, nos abiertos independientes, los xugadores qu'acudíen podíen quedar eliminaos na primer carrera y nun tener posibilidá de xugar más)

CALENDARIU

Finalmente, decidióse faer un calendariu d'actividaes, con al menos un eventu al mes. El Campionatu d'esti añu tendrá seis xornaes, entamando la primera Quirinal Liriu Sport en La Caizuela, el 20 de marzo a les 11:30 hores, cola partida y el II Abiertu de Liriu de La Caizuela.

La Camaretá de Liriu de Noreña organizará la segunda n'abril; los Sidrones, la tercera, en mayu; Espor d'Asturies, la cuarta, en xunu; y en xunetu, les dos últimes a cargu de Piyarnu y d'Asturlirio. Les feches, horarios y sitios definitivos apurriránse nun conceyu a cellebrase dempués de la primer xornada n'Illas.

Lirios na rede

Dende'l primer momentu, el Conceyu Nacional de Liriu tuvo n'internet un perfectu aliáu pal so llabor de caltenimientu y recuperación del nuestru xuegu, porque les múltiples característiques y ferramientes que presenta la rede faen muncho más afayaíza la xera del espardimientu de los proyeutos, los eventos y les noticies qu'esti movimientu bien xenerando.

Esta selmana pasada, el liriu encastró de nueves na rede gracies a una anicitiva propia y a otra que nos toca de ceo y de la que ya falamos equí: el premiu al Meyor Blogue n'Asturianu del añu 2010. Vamos por partes.

Dempués de faer los perfiles en Youtube y en Facebook, creyáronse varies entraes na Uiquipedia, enciclopedia llibre y virtual n'idioma asturianu, pa collaborar con esti trabayu fonderu tan importante p'asitiar la nuestra llingua nel mapa. Pero amás, va valir p'apurrir a daquelles persones que s'interesen de nueves pol xuegu información fiable y procedente de nos. Liriu, Conceyu Nacional de Liriu, Copa Cantábrica y Campionatu d'Asturies de Liriu foron dalgunes de les entraes subides, amás d'información relativa a caún de los cinco equipos que componen el CNL. Amás. llibertáronse de los drechos de dalgunes semeyes propies del Conceyu, pa daquien-y pruya usales. Anque tovía nun ta'l trabayu fináu (nin finará como'l liriu siga esnalando), el siguiente pasu va ser tornar estes entrades al español y al inglés, pa introducir el liriu nes más xeneralistes es.wikipedia y en.wikipedia.

Pero si la noticia cabera ye importante, mucho más prestosa ye la siguiente: esti blogue del Conceyu Nacional de Liriu algamó'l premiu al Meyor Blogue n'Asturianu del 2010 según los llectores, col 20% de los votos. La movilización de la xente del liriu dio los sos frutos y más de cien persones decidieron entrar na páxina de les votaciones pa faer clic nel botón del CNL. Esti sábadu 12 de febreru a les 5 de la tarde, na Casa de Cultura de La Pola Siero, va cellebrase el III Sidra&Blogues, eventu col que se cellebra la nueva edición del concursu y se toma pulsu a l'actualidá de la rede n'asturianu. Acabante l'actu, y como nun podía ser d'otra mena, la xente allugarase al chigre polesu Abre César pa facer una espicha.

Dende'l CNL queremos agradecer a la organización del premiu l'interés del so proyectu, que da lluz al llabor de munches persones que faen del asturianu llingua d'usu cotidianu en toles estayes de la vida, y la oportunidá de participar a la so vera. Taremos presentes en La Pola pal III Sidra&Blogues. Llámanos enforma pol nuestru compromisu pa cola llingua y pol presto de recibir un premiu bien guapu ya interesante.