Concursu d'encastraos

OXETIVU.- Tardar el menor tiempu posible n'encastrar seis lirios.

1. El tarrén de xuegu tará dispuesto al rodiu d'un castru reglamentariu (80 centímetros de diámetru).
2. Colocaránse seis lirios en puntos asitiaos a diferentes distancies del castru: a la distancia d'un liriu (c. 20 cm); a la de dos lirios (c. 40 cm); a la d'una machorra (c. 60 cm.); a la d'una machorra y un liriu (c. 80 cm.); a la d'una machorra y un liriu (c. 1 m.); a la de dos machorres (c. 1,20 m.).
3. El xugador pue escomenzar por el liriu que prefiera.
4. El tiempu escomenzará a contar dende que'l machorrador toque'l liriu.
5. Los lirios nun encastraos a la primera puen ser xugaos nuevamente dende'l sitiu onde cayeron, les vegaes que-y pruyan al participante, orientándolos si asina quisiere.
6. El tiempu másimu de xuegu ye d'un minutu. Si el xugador nun encastrase los seis lirios nesi tiempu, tendrase en cuenta'l númberu de lirios que sí encastró.
7. En casu d'empate, los xugadores involucraos tirarán dende la distancia mayor, ganando quien encastre en menos güelpes.
   

Concursu de distancia

OXETIVU.- Algamar el mayor númberu de puntos dempués de les trés tiraes.

1. El tarrén de xuegu (del tamañu del reglamentariu na normativa CNL) tará dividíu en 10 tramos (los seis primeros d'unos 5 metros y los cuatro caberos, d'unos 2'5 metros). Cada tramu tendrá una puntuación, siendo mayor cuanto más lloñe del aniciu tea'l tramu.
2. El xugador tien trés tiraes p'alloñar lo más posible los lirios del puntu d'aniciu.
3. El xugador tien trés intentos por cada tirada pa realizar una tirada válida.
4. Nun ye tirada válida si el liriu nun queda dientro del tarrén de xuegu, marche esti polos llaterales o pol fondu.
5. Tampoco ye tirada válida si, dempués de golpiar el liriu, nun se consigue golpiar de nuevu enantes de que caiga al suelu.
6. Si dempués de los trés intentos por tirada, nun s'algama una tirada válida, el xugador nun puntúa esa ronda.
7. El resultáu final vien de la suma de les trés tiraes valides.
8. Los dos (o más, en casu d'empate) xugadores qu'algamen meyores resultaos, xueguen la final.
9. En casu d'empate, los xugadores involucraos tirarán una vez nueva, ganando quien alloñe más el liriu.

Alcuerdu pa la celebración del III Campionatu d'Asturies de Liriu

Sistema competitivu

1. El Campionatu va tener tantes xornaes como equipos representaos (n), caúna d’elles organizada y encontada económicamente por un equipu.
2. Encamiéntase que, empatando coles xornaes del Campionatu, s’entamen opens individuales qu’afalen la participación de xente non inscrito nos equipos del CNL, baxo fórmules lúdiques y abiertes.
3. Les partides sedrán a 30 carreres con tantos participantes en caduna como equipos representaos (n).
4. Cada equipu inscribe nel orde que quiera los sos xugadores, hasta cubrir les 30 participaciones, siempre que, polo menos, participen 3 xugadores estremaos por equipu. Tolos xugadores inscritos na competición han tar rexistraos pol equipu nel CNL, habiendo presentar la ficha correspondiente. El períodu d'inscripción ábrese 15 minutos enantes del horariu establecíu de la partida, qu'escomenzará puntual.
5. El primer xugador qu'encastre'l liriu conseguirá 2 puntos, como'l restu de xugadores que lo algamen na mesma ronda. Tolos que lo faigan na siguiente ronda de llanzamientos tendrán 1 puntu. Daquellos que nun encastren, finarán con 0 puntos de carrera.
6. Otórgase 1 puntu de carrera extra al equipu del xugador qu’algame un “encastráu” (introducir el liriu del primer güelpe).
7. Gana la partida l’equipu que sume más puntos de carrera. Asígnense n +1, n-1, n-2… y asina hasta n-(n-1) puntos de partida. En casu d’incomparecencia d’un equipu, nun sumará dengún puntu de partida.
8. La clasificación del Campionatu faise siguiendo esta xerarquía: puntos de partida, puntos de carrera, historial de puestos nes partides y historial de puestos nes carreres.

Sistema de xuegu

1. L’anotador/voceru noma a los n xugadores de la carrera. Éstos respeten a lo llargo de tola carrera l’orde de llanzamientu nel que fueron nomaos. Dengún xugador pue llanzar enantes de que l'anotador/voceru lu nome. Si lo fae, repite'l llanzamientu, independientemente del resultáu qu'algamara col anterior invalidáu.
2. Depués de llanzar, el xugador espera que pare’l liriu cola fin de conservar la posición si fuera preciso volver a ella
3. Nun se considera acabáu’l llanzamientu hasta que nun para’l liriu por sí solu, ensin que’l xugador puea tocalu una vez que caiga al suelu. La posición válida ye na que para’l so movimientu, independientemente de lo que fixera na so trayectoria.
4. Nun hai avance válidu si nun hai los dos golpeos (suelu y aire). En casu de fallu, vuélvese al llugar d’orixe.
5. Ye fallu que’l liriu pose fuera dafechu del tarrén acotau.
6. Mentanto tea nel aire, el liriu pue ser golpeáu infinites vegaes.
7. La carrera acaba pa un xugador cuando’l so liriu, paráu, dexa de tener contactu col área qu’arrodia’l castru.
8. El liriu puede orientase como quier el xugador siempre que nun conlleve avance.

Tarrén y ferramienta

1. El liriu tendrá, tolo más, 22 centímetros de llargor y 3 centímetros de diámetru máximu. Ha ser de madera y nun tener elementos artificiales, a nun ser una pegatina o una rotulación.
2. La machorra tendrá, tolo más, 4 centímetros de diámetru mayor y ha ser de madera. El cau de golpéu nun pue tener elementu artificial nengún.
3. El tarrén ha tener un llargor d’ente 30 y 50 m. y un anchor d’ente 15 y 25 m. Tará bien marcáu con cinta al ras, pintura o cambiu de material.
4. En casu de xugar nun tarrén irregular o d’herba, y siempre que tolos equipos tean d’alcuerdu, pueden usase dos lirios. Unu d’ellos val d’encontu pal principal.
5. El castru ye una estaya circular de 0,80 a 1,20 metros de diámetru (la lonxitú de una a dos machorres). Puede pintase en suelu, ser un círculu de lona o, inclusive, tener unos centímetros d’elevación. Tará colocáu na llinia medular de la pista a una distancia de salida equivalente al 75% del so llargor.

A mín préstame xugar

Estes yeren les pallabres de Falo d'Asturlirio y les que ficieron salvar les distancies esistentes ente los equipos CNL nel primer conceyu del añu, porque quedó claro que a toos nos prestaba. A les cuatro y media de la tarde d'esti domingu 27 de febreru, nel Bar Timo d'Avilés, escomenzaba la xunta preparatoria de la Temporada 2011 del Conceyu Nacional de Liriu.

Asistieron los representantes de los cinco equipos de la temporada pasada, más el d'ún nuevu nomáu Piyarnu, surdíu nesa parroquia castrillonense y del sen de Quirinal Liriu Sport.

Discutiréronse la puesta en marcha de les propuestes falaes pol CNL nel conceyu de creyación de la Promotora de la FALA (ochobre del 2010). Decidióse dexar el tiempu que dure'l nuevu Campionatu pa creyar los clubes necesarios pala constitución de la Federación y consolidar dalgunos equipos que tan teniendo problemes d'organización interna, y ponese manes a la obra colos estatutos a partir del branu.

Con estes nueves, el Conceyu Nacional de Liriu siguirá siendo l'ámbitu d'organización, pero col calter de provisionalidá tovía más marcáu. La necesidá de contratar un seguru de responsabilidá civil y de mutua pa los participantes túvose güéi por tolos equipos como una cuestión fundamental y el retrasu nesta estaya burocrática, que'l marcu federativu tien de solucionar, ye sintida como mui perxudicial.

SISTEMA COMPETITIVU

Sicasí, como adaptación y adelantu, el Conceyu Nacional de Liriu aprobó por unanimidá la creyación d'un sistema de fiches, similar al modelu federativu, pol cual los equipos identifiquen a los xugadores nes partides oficiales del III Campionatu d'Asturies de Liriu. Asina, creyarase un rexistru de xugadores CNL, que sofite'l compromisu de los machorradores col xuegu y colos sos equipos. Esti documentu identificativu sedrá necesariu pa la almisión d'un xugador na fueya de la xornada ya implicará l'adhesión del machorrador a un equipu concretu.

Modelu de ficha.

Amás, consensuóse que cada equipu ha rexistrar un númberu mínimu de 5 xugadores pa poder participar nel Campionatu. La inscripción de xugadores tará abierta hasta l'escomienzu de la segunda xornada del campionatu, a finales d'abril.

Más difícil foi llegar a un acuerdu prestosu pa tolos miembros col númeru mínimu de xugadores que cada equipu tien d'inscribir na fueya de la xornada pa participar na xornada. En LLamorgal falóse de 3 xugadores, baxando de los 4 del añu pasáu. Pa los equipos que tienen un númberu grande y, sobre too, estable de machorradores, ye un agraviu porque, como bien dicía Falo d'Asturlirio "A mín préstame xugar", porque tien d'esperar muncho pa disputar la so carrera, mientres que los xugadores d'otros equipos con más dificultaes, cuerren más de siguío. Aprobóse al final la rebaxa, estimando que ye meyor pa la competición y pal xuegu un mayor númberu d'equipos, col enfotu de superar los sos problemes, a contar con dos equipos fuertes que dexen estancáu el procesu d'esportificación del liriu.

La inscripción de los xugadores a la partida fadráse durante'l cuartu d'hora anterior al aniciu de la partida. Cada equipu, escomenzando pol organizador del eventu, darán los nomes de los xugadores pol orde que deseye, apurriéndo les fiches de los mesmos. Dengún xugador podrá inscribise más tarde o ensín mostrar la identificación CNL.

Respeutu al sistema competitivu de les partides, mantiénse'l númberu de carreres en 30 y ensín posibilidá de reduciles. Ensín embargo, camúdase'l sistema de puntuación, por ún que favorez carreres de menos duración. Asina, sumen 2 puntos daquellos xugadores qu'encastren primero, 1 puntu daquellos que lo faigan na siguiente ronda y 0, los que queden ensín encastrar.

Amás, establezse dafechu la figura del Anotador/Voceru. Va ser miembru del equipu organizador de la xornada (puen ser dos, en casu de que'l primeru participe na partida). Encargaráse d'inscribir a tolos xugadores na fueya de la xornada; glayar l'orde de xuegu de los machorradores en cada carrera, amás d'avisar que tean preparaos los de la siguiente tirada; dar el permisu de tiru al xugador que-y correspuenda, pa evitar que l'orde de la carrera camude; anotar los resultaos de cada carrera y los finales; y asegurase de qu'ún representante por equipu robla la ficha. El Anotador/Voceru nun tien atribuciones d'arbitraxe y les sos opiniones nun tendrán rangu sancionaor.

Especial mención se fizo al fechu de mantener siempre'l turnu de xuegu durante la carrera. Decidióse que siempre qu'un xugador s'adelante al permisu'l voceru, tenga que repitir el tiru.

Por últimu, fáise regla que les decisiones arbitrales seyan entamaes polos propios xugadores de la carrera. Solo ellos tendrán la capacidá de debatir sobre cualquier fechu duldosu (zarrapastrones, encastraos, salides del tarrén...), siendo necesarios trés votos en sentíu a repitir la xugada.

CONCURSOS

Aprobóse la propuesta d'Espor[a] introducir xunto a los abiertos que nun fueren asociaos a xornaes, los concursos d'encastrar y de distancia que se probaron nel II Alcuentru Xixón de Liriu, en xineru de 2011.

D'esta forma, les actividades de cada encuentru quedaríen más equilibraes en cuanto a tiempu, favoreciendo'l desplazamientu de la xente que tendría más posibilidaes de participar nel eventu. (L'añu pasáu, nos abiertos independientes, los xugadores qu'acudíen podíen quedar eliminaos na primer carrera y nun tener posibilidá de xugar más)

CALENDARIU

Finalmente, decidióse faer un calendariu d'actividaes, con al menos un eventu al mes. El Campionatu d'esti añu tendrá seis xornaes, entamando la primera Quirinal Liriu Sport en La Caizuela, el 20 de marzo a les 11:30 hores, cola partida y el II Abiertu de Liriu de La Caizuela.

La Camaretá de Liriu de Noreña organizará la segunda n'abril; los Sidrones, la tercera, en mayu; Espor d'Asturies, la cuarta, en xunu; y en xunetu, les dos últimes a cargu de Piyarnu y d'Asturlirio. Les feches, horarios y sitios definitivos apurriránse nun conceyu a cellebrase dempués de la primer xornada n'Illas.

Lirios na rede

Dende'l primer momentu, el Conceyu Nacional de Liriu tuvo n'internet un perfectu aliáu pal so llabor de caltenimientu y recuperación del nuestru xuegu, porque les múltiples característiques y ferramientes que presenta la rede faen muncho más afayaíza la xera del espardimientu de los proyeutos, los eventos y les noticies qu'esti movimientu bien xenerando.

Esta selmana pasada, el liriu encastró de nueves na rede gracies a una anicitiva propia y a otra que nos toca de ceo y de la que ya falamos equí: el premiu al Meyor Blogue n'Asturianu del añu 2010. Vamos por partes.

Dempués de faer los perfiles en Youtube y en Facebook, creyáronse varies entraes na Uiquipedia, enciclopedia llibre y virtual n'idioma asturianu, pa collaborar con esti trabayu fonderu tan importante p'asitiar la nuestra llingua nel mapa. Pero amás, va valir p'apurrir a daquelles persones que s'interesen de nueves pol xuegu información fiable y procedente de nos. Liriu, Conceyu Nacional de Liriu, Copa Cantábrica y Campionatu d'Asturies de Liriu foron dalgunes de les entraes subides, amás d'información relativa a caún de los cinco equipos que componen el CNL. Amás. llibertáronse de los drechos de dalgunes semeyes propies del Conceyu, pa daquien-y pruya usales. Anque tovía nun ta'l trabayu fináu (nin finará como'l liriu siga esnalando), el siguiente pasu va ser tornar estes entrades al español y al inglés, pa introducir el liriu nes más xeneralistes es.wikipedia y en.wikipedia.

Pero si la noticia cabera ye importante, mucho más prestosa ye la siguiente: esti blogue del Conceyu Nacional de Liriu algamó'l premiu al Meyor Blogue n'Asturianu del 2010 según los llectores, col 20% de los votos. La movilización de la xente del liriu dio los sos frutos y más de cien persones decidieron entrar na páxina de les votaciones pa faer clic nel botón del CNL. Esti sábadu 12 de febreru a les 5 de la tarde, na Casa de Cultura de La Pola Siero, va cellebrase el III Sidra&Blogues, eventu col que se cellebra la nueva edición del concursu y se toma pulsu a l'actualidá de la rede n'asturianu. Acabante l'actu, y como nun podía ser d'otra mena, la xente allugarase al chigre polesu Abre César pa facer una espicha.

Dende'l CNL queremos agradecer a la organización del premiu l'interés del so proyectu, que da lluz al llabor de munches persones que faen del asturianu llingua d'usu cotidianu en toles estayes de la vida, y la oportunidá de participar a la so vera. Taremos presentes en La Pola pal III Sidra&Blogues. Llámanos enforma pol nuestru compromisu pa cola llingua y pol presto de recibir un premiu bien guapu ya interesante.

Xineru de liriu

Escomenzamos esta temporada 2011 con un tastu agridulce. Porque l'eventu'l dmingu y la nominación al meyor blogue son noticies mui buenes, pero la tristura pola muerte d'un pa nun ye complicao de superar: solo'l tiempu y el sofitu de la xente que te quier axuda. Dende equí, Javier, queremos unviate tol ánimu y el cariñu de la familia'l liriu, de la que tú yes, por méritos propios, ún de los miembros más queridos. Que to pa descanse en paz. Yá tenemos ganes d'abrazate.

Eventu en Xixón.

Como yá adelantáremos na primer entrada del añu, el domingu 23 Espor[a] organizó, nel Muséu del Pueblu d'Asturies , el II Alcuentru Xixón de Liriu. La terrible mañana de fríu y lluvia acabó por rescamplar y los valientes que s'averaron al tendayu del equipamientu cultural xixonés pudieron esfrutar d'una mañana protagonizada pol liriu.

Espor d'Asturies quería introducir un par d'actividaes que permitieren averar el liriu a la xente, amás de conseguir que daquellos que se desplacen a los abiertos salgan contentos d'aprovechar el tiempu xugando al liriu. Si daqué falló na temporada pasada yera ver les cares de los xugadores eliminaos na primer ronda d'un abiertu, ensin posibilidá de siguir xugando. Como'l formatu d'abiertu cuayó, la solución paecía tar n'apurrir nuevos xuegos. Y, polo visto'l domingu, paez que prestaron abondo.

Álex, n'un de los primeros intentos de güelpéu.

Primero probóse'l Concursu de distancia. Yá desplicáramos que se trataba de mandar tres lirios lo más lloñe posible, puntuando sigún onde estos pararen nun tarrén delimitáu previo en diez zones. Prestó enforma a los dieciséis participantes, tanto que se pidió una segunda ronda por aclamación. Al final de les dos tandes, disputóse una final colos dos ganadores, Pepa d'Espor[a] y Xosín de la Camaretá, venciendo esti por 11 a 9.

Xosín, de la Camaretá, ganador del Concursu de distancia, xunto a Balvo.

Pasóse dempués al Concursu d'encastraos. El conceptu desti xuegu ye daqué más complicao y la práctica ye muncho más técnica. N'un minutu de tiempu, el participante tien qu'encastrar seis lirios, dimpuestos n'espiral a distancies diferentes (20, 40, 60, 80, 100 y 120 centímetros) alredor del castru. Toos los xugadores xueguen colos mesmos lirios y ye decisión d'ellos la estratexa de xuegu (dende liriu pol qu'escomenzar, hasta l'enfotu por un liriu determináu que nun acaba entrar). Los catorce machorradores que decidieron disputar el concursu pudieron comprobar lo estresante que pue resultar lluchar contra'l tiempu nun xuegu onde la pausa y la preparación ante cada güelpe ye indispensable. Asina, solo cinco consiguieron faer plenu: Xosín (55"89), María (37"64), Sergio (36"82), Dani (27"33) y Toño, que venció con un tiempu de 25"22.

Toño, de los Sidrones, col títulu del Concursu d'encastraos, con Sergio.

Una vez ensayáu'l tiru a llarga y a curtia distancia, yera'l momentu afayaízu pa'l II Abiertu Xixón de Liriu, disputá a tres mangues ensin desempates, lo que valió p'acabar con una final a trés ente Xosín de la Camaretá, Sergio d'Espor[a] y Dani de los Sidrones, que s'impuso con autoridá en dos de les trés carreres posibles.

Dani, de los Sidrones, qu'algamó'l II Abiertu Xixón de Liriu, xunto a Pepa.

Les propuestes prestaron a los asistentes tanto como les bollines de Pepa o les tortiyes de la ma de Sergio, yá bautizaes como "tortiyes volantes" polo poco que duren. La sidre de baldre, la rifa de la empanada, los perrucos come-lirios y el valiente cámara de la TPA (al que-y sobrevolaron varios lirios ensín inmutase) dieron más color a la primer mañana liriera del añu.

Nominación del blogue.

Esti mes de xineru cellebrase'l concursu al Meyor blogue n'asturianu 2010, ún concursu completamente altruísta, ensin sovenciones y col únicu enfotu de faer visible'l llabor de daquellos que faen de la llingua asturiana ferramienta digna pala tresmisión de les sos idegues y propuestes.

Imaxiná-yvos la gayola al saber qu'esti blogue tar ente los nominaos, al llau de firmes como la del Xanu'l Caborniu, González y González, Fueya en blanco, Xuan Pandiella, Tapaponga, los nuestros compañeros Chus Solis y LLar 867 o TrayasgayA, aniciadores de la idega.

Hai trés modalidaes de votu: dos pa blogueros (al meyor blogue y al meyor diseñu) y una pa llectores.

Si quereis participar nun vos va llevar más d'un minutu, siguiendo estos pasos:

1.- Entra nesti enllaz:

http://votacionmeyorblogue.dyndns.org/pral/

2.- Pica onde pon "LLectores voten equí". (Si tienes blogue propiu pues inscribite na otra opción)

3.- Busca'l to blogue preferíu (yá puestos, el del Conceyu Nacional de Liriu)

4.- Vota.

Espublizaremos los resultaos, porque xeres d'esta mena préstenmos asgaya.

Primer eventu del añu

La Temporada 2011 escomienza'l domingu 23, a partir de les 11 de la mañana, nel tendayu del Muséu del Pueblu d'Asturies col II Alcuentru Xixón de Liriu, organizáu por Espor d'Asturies.

L'alcuentru consistirá de trés partes pa esfrutar d'esti sitiu tan afayadizu'l mayor tiempu posible xugando al liriu.

Escomenzará sobre les 11 y media con un concursu de distancia, pa comprobar si les fuercies de los machorradores se vieren amenorgaes dempués de les festividaes navideñes. Los participantes golpiarán trés lirios dende un puntu d'aniciu común pa toos. El tarrén dividiráse en diferentes zones, que tendrán distintes puntuaciones sigún la distancia al aniciu. Ganará'l xugador qu'algame más puntos.

Acabante esti, otru concursu, esta vez d'encastraos, pa poner a prueba l'habilidá de los asistentes. L'oxetivu sedrá encastrar seis lirios dispuestos al rodiu'l castru nel menor tiempu posible, ensín superar el minutu de duración.

L'eventu finará col II Abiertu Xixón de Liriu, tornéu a disputar col sistema tradicional.

Estes pruebes, como siempre, tarán abiertes a toos aquellos que quieran participar, dende los machorradores con mayor esperiencia hasta los que descubran por casualidá esti xuegu al averase al muséu nuna mañana de domingu.

¡Tais toos convidaos!

II Alcuentru Xixón Liriu
23 de xineru - 11:00 h
Muséu del Pueblu d'Asturies
(Xixón)

11:00 h. Apertura del alcuentru.
11:30 h. Concursu de distancia.
12:00 h. Concursu d'encastraos.
12:30 h. II Abiertu de Liriu de Xixón.