Conceyu Nacional de Liriu

Última xornada

2011-07-19T06:17:00.000-07:00

Esti ye'l cartel pa la última xornada del Campionatu d'Asturies de Liriu 2011. Asturliriu convídamos a xugar la partida y el II Abiertu de Liriu de Piedrasblancas el domingu 31 de xunetu, a partir de les 11 de la mañana (l'abiertu sedrá acabante la partida).
Y llega la cabera partida cola emoción por tolo alto, tanto'l Campionatu por decidir y mui apretáu por enriba. A la tiesta alcuéntrase Quirinal Liriu Sport, con solo un puntu por enriba de los actuales campiones, Espor d'Asturies, y col balance de puntos de carrera perdíos. Poro, l'oxetivu de dambos equipos va ser quedar por enriba del otru p'algamar el títulu, anque la ventaxa, ye nidio, tiénla Quirinal. Camaretá y Asturliriu Homes, anque daqué más alloñaos (a cinco puntos del equipu avilesín) índa tienen posibilidaes matemátiques, anque seyan remotes. Pa evitar la última plaza llucharán Sidrones y Asturliriu Muyeres, que s'alcuentren nun pañuelu de trés puntos de distancia.
Como pue vese, tolos equipos tienen les machorres n'alto y llistes pa ufiertar el meyor liriu de los que puean ser quienes a xugar.
Esperámosvos a toos en Piedrasblancas.

Domingu 31 de xunetu
6ª Xornada del Campionatu d'Asturies de Liriu
Inscripción na partida a partir de les 11:00
Escomienzu a les 11:15
II Abiertu de Liriu de Piedrasblancas
(Válidu pal II Campionatu d'Asturies de Liriu Individual)
Acabante la partida oficial (13:30)
Pista del Polideportivu de Piedrasblancas
Castrillón

Liriu en Piarnu

2011-07-05T15:38:00.001-07:00

El pasáu sábado 2 de xunetu disputóse la partida correspondiente a la 5ª xornada del Campionatu d'Asturies de Liriu, organizada por Quirinal nuevamente, dempués que'l equipu de Piarnu, presentáu na reunión d'apertura de la temporada n'Avilés, nun se dixebrara del equipu avilesín.

La partida

Hubo dellos problemas que nun se pudieron iguar de forma que tolos participantes quedaren agusto: la partida nun escomenzó a la hora señalada, el tarrén presentaba una yerba mui alta y delles diferencies a la hora de les inscripciones. Finalmente, cinco equipos CNL tuvieron presencia en Piarnu, más una representación de collacios gallegos, que xugaron la partida ensín perxudicar les sos carreres al resultáu de los demás. Los machorradores de la Camaretá de Liriu de Noreña nun pudieron acudir al coincidir l'alcuentru con un eventu musical de la banda de gaites a la que pertenecen.

Sobre les 12 del mediudía, dábase escomienzu a la partida nel campu fútbol de Piarnu.

Espora: Pepa, Luis Carlos y Sergio.

Quirinal: Xermán, Artuto y Juan.

Asturliriu Homes: Enrique, Falo y Javi.

Sidrones: Magda, María y Paula.

Asturliriu Muyeres: Tere, Ferrer y Jony.

Jony, d'Asturliriu, el más mozu de la competición.

Y yá dende les primeres carreres la pegada de Quirinal se dexó notar, faciendo 8 de los 10 primeros puntos en xuegu. Solo Falo, d'Asturliriu Homes, pudo faer frente al empuxón de los avilesinos con una carrera marcada pol machorrazu de salida que, de mano, tal paecía tratase d'un encastráu.

La dinámica caltúvose pa les siguientes cinco carreres, que terminaben encabezaes por Quirinal con 13 puntos, siguíu d'Espora y Asturliriu Homes con 4 puntos ná más. Sidrones diba con 1 y les muyeres d'Asturliriu ensin dengún.

Les carreres pasaben mui despacio porque la superficie nun taba dominada polos machorradores, que se les veíen y deseaben quiciás non tanto pa llegar como pa encastrar, y eso ensin contar que la yerba frenaba dientro'l liriu. Amás, el calor y el sol facía que los xugadores s'abellugaren onde la escasa solombra del graderíu del campu, lloñe del tarrén de xuegu, lo que dificultaba'l llabor de los voceros. Si a esto se suma'l retrasu col que dio comienzu la partida, diben dar les 2 y malpenes se pasaba del ecuador de la partida, con un intratable Quirinal a la tiesta.

Decidióse entós acabar a les 2 y cuartu de la tarde, ensin especificar el númberu de carreres. Pa esa hora, diben 18 y decidióse faer dos carreres en paralelo pa finar la partida con 20 carreres.

El tantéu final glayó la superioridá de Quirinal, de la mano d'un intratable Xermán, qu'anotó tolos puntos que disputó, y d'Arturo, auténtica revelación de la temporada. Con 25 puntos de carrera imponíase a Espor d'Asturies que con 12 atopaba'l segundu puestu. Asturliriu Homes quedaba terceru con 5. Y Sidrones, con 3, superaba a Asturliriu Muyeres, que sumaba'l so únicu puntu na carrera 19.

Estos resultaos na partida faen que'l Campionatu quede totalmente abiertu pa la última xornada, tanto na tiesta la clasificación Quirinal con 24 puntos, solo ún por enriba d'Espor d'Asturies, que se ta alcordando de los puntos que dexara marchar nel Pueblu d'Asturies cola so incomparecencia (y que yá-y daríen el triunfu matemáticu porque ganó la xornada). Índa con posibilidaes van Camaretá y Asturliriu Homes, empataos a 19 puntos pero colos noreñenses con un puntu de carrera por enriba. Zarren la tabla los Sidrones, con 14 puntos, y Asturliriu Muyeres, con 11, que llucharán por nun acabar na última plaza.

El Pitu Caleya

El IV abiertu'l Pitu Caleya tuvo qu'esperar un añu completu a disputase, dempués de les tremendes lluvies que cayeron l'añu pasáu na zona y qu'obligaron a suspendelu.

Dempués de la xinta, y con escasos efeutivos CNL, púnxose en xuegu el pitu con una novedosa fórmula de competición: dos grupos de cinco xugadores, d'onde saldríen dos semifinalistes de caún, siendo estos daquellos machorradores que meyor puntuación algamasen dempués de tres partides. Asina pasaron a la siguiente ronda, pol grupu 1, Xermán de Quirinal y Pepa d'Espora y, pol grupu 2, Luis Carlos d'Espora y Arturo de Quirinal, que s'enfrentaron n'empareyamientos cruciaos. Por coincidencies, les semifinales dieron con xugadores de los mesmos equipos: na primera, Xermán remontó la carrera ganada por Arturo; y la segunda, un calcu, valió pa que Luis Carlos derrotara a Pepa.

Arturo, de Quirinal, semifinalista del abiertu.

Intratable como tuvo tol día, Xermán nun-y dio opción siquiera de palpar la pechuga'l pitu a Luis Carlos, al que ganó la final pola vía rápida. Volaba pa Ribadeo otra vuelta.

Individual

Xermán llegó de Galicia pa xugar col so equipu asturianu y llevar los 15 puntos en xuegu esta xornada: 10 de la partida, al algamar el 100% de los puntos disputaos; y 5 del abiertu. Esto fai que suba, de güelpe, a la 6ª posición.

El compañeru de so, Arturo, imparable nestes tres xornaes que lleva disputaes, yá ye terceru con 24 puntos en seis eventos. Javi, d'Asturliriu Homes, caltién la segunda posición, colos sos 35 puntos, a ocho del primer clasificáu, Sergio d'Espor d'Asturies.

A falta de la homologación de los abiertos extras que puean surdir, la última xornada prométese tamién decisiva n'esti apartáu competitivu.

Prósima xornada

Y yá tenemos los horarios y les feches de la última xornada del Campionatu, muerganizada por Asturliriu nel polideportivu de Piedrasblancas, en principiu, pal domingu 29 de xunetu, a les 11 de la mañana. Vuélvese a la mítica pista castrillonense pa decidir la competencia por equipos nuna partida que promete, cuando menos, muncha emoción.

O año y la xornada 5.

2011-06-27T08:41:00.000-07:00

O año prieto.

O año ye'l nome que recibe'l corderu col que se premia al equipu que gana l'abiertu interparroquial de bilharda de Ribadeo, qu'esti añu volvió a tener repsentación asturiana con un equipu combináu de machorradores de Quirinal (Juan, Hevia, Arturo y Magda) y ún d'Espora (Sergio).

Delegación asturiana, col seleicionador gallegu.

Pagó la pena'l desplazamientu y les quemadures del sol, pesie a quedar últimos nel grupu de los campiones del tornéu, Os Ribilleiros (Os Billardeiros Musicais de Ribadeo), franquicia que cuenta con palanadores de l'altura de Franco, Daniel, Markitos, Miguel, Julio o l'asturianu Hugo, esti siempre cola camiseta del Sporting puesta.

Os Ribilleiros, col año preto.

Ficiéronse patentes les diferencies ente dambos xuegos, dende la téunica que precisa'l desendolcu'l xuegu (onde prima el ganar distancia pa varar la bilharda en cuantes menos güelpes meyor y malpenes esiste xuegu curtiu, menos cuando queda asitiada al varado cerca la llinia fondu) y les normes (la fuera de banda sácase dende el puntu por onde salió, mientres tocare'l suelu anantes, en ves de volver al sitiu de golpéu), hasta'l diseñu les bilhardas (maderes dures pa preseos grandes y nun siempre cola forma puntiaguda pelos dos caos), perfeutamente adaptaes pal xuegu. Los nuestros lirios más romos y pequeños (dalgunos nun yeren siquiera reglamentarios pales regles LNB) difícilmente puen competir en distancia colos preseos gallegos, qu'esnalen en distancia a un ritmu imparable. Amás, la efeutividá de los palanadores, que rara vez dexaben el liriu en suelu o de dar los dos güelpes, chocaba col xuegu más irregular de los asturianos que, si bien ficieron másimes puntuaciones delles veces, quedaron xustamente bien atrás na clasificación.

La delegación asturiana, pola so parte, llevó una muestra de liriu en forma de concursu d'encastraos, onde grandes de la bilharda gallega como Markytos o Franco pincharon nel intento d'encastrar los seis lirios en menos d'un minuto. Nun lo fizo asina Daniel, que con una escelente marca de 46 segundos demostró qu'inda se alcuerda de la so preparación pa la Copa Cantábrica del añu pasáu.

Fraco nel intentu d'encastrar los seis lirios

Por otru lláu, l'alcuentru con Xermán (qu'esperemos se repita esti sábadu en tierres asturianes) averó delles propuestes: volvió a falase de la Copa l'Eo, a mou de rempuesta coles normes LNB a la Copa Cantábrica; y d'una Copa Ibérica, con seleiciones d'otros países peninsulares pa axuntar bilharda y liriu al bèlit, al pic y pala y a la txirikila, ente otros. Siguirán les conversaciones.

Fue una magnífica xornada de convivencia baxo un sol amburador onde la espedición asturiana deprendió y lo pasó en grande gracies a les atenciones de la organización y de los collacios palanadores de la LNB. ¡Asina da gustu!

Detallín ufiertáu pola LNB pola participación de la delegación asturiana.

Quinta xornada, n'herba.

Esti sábadu día 2, a partir de les 11 de la mañana, escomenzará la partida por equipos de la quinta xornada del Campionatu d'Asturies de Liriu nel campu de fútbol de Piarnu, en Castrillón, muerganizáu por Quirinal otra vuelta (l'equipu de Piarnu que se presentare na reunión de febreru finalmente acabó dientro l'avilesín, pero col compromisu de llevar p'alantre la xornada). Asina, les inscripciones van quedar abiertes dende les 10:45.

Acabante la partida, va disputase'l míticu Abiertu'l Pitu Caleya, na so cuarta edición, que vuelve dempués de la suspensión del añu pasáu poles lluvies torrenciales que dexaron la zona n'estáu catastróficu. Pa evitar la lluvia yá se tien pensao una pista alternativa, onde la Asociación de Vecinos de Piarnu.

Los dos eventos coinciden coles fiestes patronales de la parroquia y hai prevista una macro-fabada pa tolos vecinos y visitantes al preciu de 5 € el platu, que de xuru dexará bien fartucos a los participantes que s'animen a siguir nes fiestes.

Como alvertencia a los machorradores, ha dicise que camuda'l suelu onde disputar la partida: esta vez sedrá n'herba natural, esperemos que nuna cai bien segadina. Pa estos casos la normativa CNL recueye, nel so cuatru puntu del apartáu "Tarrén y ferramienta" lo que sigue:

"En casu de xugar nun tarrén irregular o d’herba, y siempre que tolos equipos tean d’alcuerdu, pueden usase dos lirios. Unu d’ellos val d’encontu pal principal."

Toca esperimentar.

¡Alcontrámosnos ellí!

Sábadu 2 de xunetu
5ª Xornada del Campionatu d'Asturies de Liriu
Inscripción na partida a partir de les 10:45
Escomienzu a les 11:00
IV Abiertu'l Pitu Caleya
(Válidu pal II Campionatu d'Asturies de Liriu Individual)
Acabante la partida oficial (13:00)
Campu fútbol de Piarnu
Castrillón

Y el domingu, apaeció Luis.

2011-06-20T08:07:00.000-07:00

La cuarta xornada del Campionatu d'esti añu tien un nome propiu a destacar: Luis Riaño. El machorrador d'Espora algamó una de les meyores participaciones del añu, col 81% de los puntos disputaos que-y dieron la partida al so equipu y con una victoria folgosa nel abiertu. De poco sirvió la inspiración que traxera consigo l'equipu de Quirinal, con un magníficu Arturo a la tiesta, y que-yos valió pa conseguir la segunda plaza por equipos y acopar los tres puestos del cuadru d'honor del abiertu.

La partida.

Escomenzó puntual la partida por equipos na pista cubierta del Colexu Públicu "El Llano" de Xixón. La mañana soleada del domingu invitaba al paséu y pronto l'avenida d'El Llano s'enllenó de curiosos que se deteníen pa ver qué facíen aquellos llocos tan temprano con dos palos. Yeren les 11:20 cuando Pepa daba'l primer machorrazu.

Asturliriu Muyeres: Jeny, María, Tere y Joni.
Asturliriu Homes: Falo, Laura y Javier.
Sidrones: Lili, Alba y Giovanna.
Quirinal: Arturo, Hevia y Juan.
Espora: Sergio, Luis Carlos, Luis y Pepa.
Camaretá: Lucía, Xosín y Aarón.

Yá dende un comienzu se dixebró la competencia en dos: por una parte, Espora, Quirinal y la Camaretá, pa garrar el triunfu; por otra, los dos equipos d'Asturliriu (esta vez mistos) y Sidrones, pa nun llevar l'ultimu puestu.

De la mano d'Arturo, Quirinal consiguió llegar al primer terciu de la partida en cabeza, siguí mui de cerca polos organizadores y la Camaretá (11, 10 y 8 puntos, respeutivamente). A estes altures, los tres equipos restantes taben empataos a 3.

Nes siguientes cinco carreres, un pequeñu emburrión d'Espora fue contrarrestáu polos contrincantes direutos, pa cruciar l'ecuador empataos carbayones y avilesiones a 14 puntos, cola Camaretá a tres de distancia. Pela so parte, l'emburrión d'Asturliriu Homes nesi mesmu períodu (seis puntos de diez) nun fue siguíu nin poles femes nin por Sidrones, que taben empataos a cuatro.

Arturo de Quirinal.

Puntu a puntu, la partida diba cayendo nes manes espores, pesie a la irregularidá de Sergio, Luis Carlos y Pepa, que daben una de cal y otra d'arena. Pela so parte, los de Quirinal yeren más estables, pero dexaben pol camín carreres onde Espora nun puntuaba. Asina, la distancia ente dambos equipos, al llegar a les cinco caberes carreres, yera de tres puntos (25-22). La Camaretá nun pudo llevantase d'un parcial de cinco ceros siguíos ente la carrera 16 y la 20 y con 16 puntos, taba mui lloñe de la victoria. L'equipu masculín d'Asturliriu, en tierra de naide, índa tenía esperances d'alcanzar a los noreñenses, colos sos 12. Y el femenín llegaba con dos puntos de ventaya sobre los (esti día, les) Sidrones.

Luis d'Espora y Falo d'Asturliriu.

Un puntu de Luis y otru de Luis Carlos ponía con una renta de cinco puntos al equipu carbayón sobre l'avilesín cuando quedaben seis puntos en xuegu en dos carreres ganaes por Jeny d'Asturliriu Muyeres y por Lili de los Sidrones, que lo dexaben too abierto per baxo. La siguiente carrera llevola en solitario Arturo de Quirinal, lo que subía les sos esperances pa ganar. Pero Luis tiró otra vuelta de la so clase y fizo dos nuevos puntos de carrera, colos que'l so equipu facía 29. Juan consiguía empatar la carrera al encastrar nel mesmu turnu, como tamién ficiera Javi d'Asturliriu Homes, y dexaba la distancia a tres puntos pa una carrera. Paecía que taba too decidío, hasta que'l machorrazu de salida d'Hevia rozaba col castru no que pudo ser un encastráu que-y diera los tres puntos a Quirinal que necesitaba. Hevia encastraba tres tiraes dempués y llevaba los insuficientes dos puntos de carrera pa llegar a 28. Y, na mesma, la debutante Giovanna tamién lo facía na mesma ronda, colo que Sidrones empataba con Asturliriu Muyeres a 8 puntos na quinta posición. La tercer plaza fue pa noreña y los 18 puntos de la Camaretá, polos 14 totales d'Asturliriu Homes.

Esti resultáu fai que la clasificación s'apierte muncho. Anque la Camaretá de Liriu de Noreña va siguir otra xornada nel primer puestu colos sos 19 puntos de partida, yá siente l'aliendu d'Espor d'Asturies, que va un puntu por detrás, el de Quirinal, a dos, y el d'Asturliriu Homes, a cuatro. Bien por detrás, Sidrones lleven 11 y Asturliriu Muyeres, 9. Too esto fai ver que'l Campionatu 2011 va decidise na cabera xornada.

L'abiertu y los resultaos individuales

Espor d'Asturies decidió dedicar el II Abiertu d'El Llano de Liriu a les figures d'Ígor Medio y Carlos Redondo, músicos que finaron el 23 de xunu de 2006 nun accidente de tráficu cuando taben de xira col so grupu musical Felpeyu. Esti abiertu apellidábase entós "N'Alcordanza", nome que tuvo'l conciertu del cabudañu na playa de Poniente de Xixón.

La escena cabera de la partida, volvió a repitise. Taba claro que Quirinal taba faciendo'l meyor xuegu y asina nun fue d'estrañar que los sos tres representantes se colaren nes semifinales. Pero tamién yera nidio que Luis d'Espora yera'l machorrador más granible de la xornada y, coles mesmes, desfízose nes semifinales de Juan y na final d'Arturo (que ganara al so compañeru Hevia na otra semifinal).

Arturo, Luis, Juan y Hevia, cuadru d'honor del abiertu.

Per primer vez na temporada, ganaba un abiertu un xugador distintu a Javi d'Asturliriu, que tuvo que marchar dempués de la partida al enterase de la defunción d'una familiar. Y yera'l día de Luis, por supuesto, qu'algamaba la puntuación másima de 15 puntos pal Campionatu d'Asturies de Liriu Individual, subiendo hasta'l tercer puestu, polos 20 con solamente tres eventos disputaos.

Tamién hai que destacar el xuegu d'Arturo de Quirinal, segundu xugador más granible de la partida y finalista del abiertu y los sos 11 puntos individuales.

Na xeneral, sumando mínimamente nestos eventos xixoniegos, caltiénense Sergio y Javi, con 37 y 31 puntos respeutivamente.

Prósimes feches.

El 2 o el 3 de xunetu va disputase la quinta xornada en Piarnu, col míticu pitu caleya en disputa pal abiertu, dempués de que l'añu pasáu nun se pudiera celebrar poles lluvies tremendes que cayeron na zona. Yá informaremos equí de la hora y el día concretos.

Pero, anantes, esti prósimu domingu 26, la cita ta más allá del Eo. La Liga Nacional de Billarda, como bien faciendo los últimos años, invítamos a los asturianos a participar nel Tornéu Interparroquial de Ribadeo, conocíu como l'Año Prietu o Mouro, por tratase'l premiu d'un corderu añal. Va ser nel Área Recreativa d'A Devesa, en Ribadeo, a partir de les 11 la mañana, anque tamién va haber actividaes pela tarde.

A diferencia d'otros torneos abiertos gallegos, esti dispútase por equipos d'al menos tres xugadores, por supuesto, cola normativa LNB a varar a billarda.

La caravana asturiana tará encabezada por Hevia, que se va encargar de la coordinación. Si vos apetez l'aventura gallega, poné-yvos en contautu con elli nesti númebru: 644 29 42 87 begin_of_the_skype_highlighting 644 29 42 87 end_of_the_skype_highlighting (a partir de les 14:30).

El Llano, n'alcordanza

2011-06-10T03:08:00.001-07:00

Yá ta equí la cuarta xornada del III Campionatu d'Asturies de Liriu, a disputase nel Colexu Públicu d'El LLano de Xixón, va tar organizada pol equipu d'Espor d'Asturies, cola collaboración de l'Asociación de Vecinos "El Fumeru", repitiendo'l sitiu d'aniciu de la temporada pasada. La partida por equipos escomenzará a les 11:15, una vez que se cierren les inscripciones de los equipos.

La partida preséntase mui abierta, dempués de los caberos resultaos que punxeron a la Camaretá enriba la clasificación, con Asturliriu Homes y Quirinal a curtia distancia, con Asturliriu Muyeres y Sidrones a la gueta de subir puestos y con Espor d'Asturies enrabietáu p'ameyorar la imaxen de l'anterior xornada, onde ganó pero nun puntuó, y col punxu que da xugar en casa. Ta too mui apretao, cuando acaba de cruciase l'Ecuador de la competencia.

Acabante la partida por equipos (supónse que sobre la una menos cuarto), escomenzará el II Abiertu de liriu d'El Llano/N'alcordanza -valederu pal Campionatu d'Asturies de Liriu Individual, qu'esti añu la organización dedica a la memoria d'Igor Medio y de Carlos Redondo, músicos del míticu grupu de folk asturianu Felpeyu, que finaron fadrá esti mes cinco años nun accidente de tráficu que conmocionó la vida cultural asturiana, pola vitalidá y el compromisu de dambos. Espor d'Asturies quier apurrir el so granín con esti fechu mínimu pa que nun caiga nel escaezu nin la obra nin la vida d'eses dos persones que nos ficieron un pocoñín meyores la de nos.

Ígor ya Carlos, n'alcordanza d'ellos va l'abiertu d'esta xornada. Embaxo, "Los fayeos de mayo".

Domingu 19 de xunu
4ª Xornada del Campionatu d'Asturies de Liriu
Inscripción na partida a partir de les 11:00
Escomienzu a les 11:15
II Abiertu d'El Llano/N'alcordanza
(Válidu pal II Campionatu d'Asturies de Liriu Individual)
Acabante la partida oficial (12:45)
Colexu Públicu "El Llano"
Xixón

Lirios con muncha marcha

2011-05-15T19:55:00.000-07:00

La mañana d'esti últimu domingu, el CNL averóse al tendayu del Muséu del Pueblu d'Asturies, en Xixón, con motivu de la tercer xornada del Campionatu d'Asturies de Liriu 2011. La organización corió a cargu del equipu de los Sidrones que tenía preparao too pa que la mañana saliera perfeuta ente lirios, sidre y empanaes y munchu sol.

Partida.

Los seis equipos competidores presentaron les sos credenciales enantes d'escomenzar la partida, que se retrasó unos minutos polos preparativos y el calentamientu de los machorradores.

Ensín embargu, esti tiempu de demora nun-y valió a Sergio, únicu representante d'Espor d'Asturies esta mañana, pa que llegara dalgún de los sos compañeros que, por unes causes o otres, nun apaecieron pel tendayu. Dempués llegaríen les llamentaciones énte'l resultáu algamáu pol compañeru. Espor[a], que yera líder de la xeneral enantes d'escomenzar la partida, quedaba yá ensin posibilidaes de puntuar na xornada, anque sí con plenu drechu pa llevar la victoria.

Sergio, d'Espora, nel iniciu d'una carrera.

Asturliriu Muyeres: Luisa, Ferrer, Tere y Joni.
Asturliriu Homes: Falo, Enrique y Javier.
Sidrones: Toño, Lili y María.
Quirinal: Arturo, Hevia y Juan.
Espora: Sergio.
Camaretá: Dani, Xosín y Aarón.

Asina les coses, los Sidrones, de la mano del so capitán, Toño, foron los primeros n'encastrar y algamar los dos puntos de carrera colos que s'escomenzaba la partida a 30 carreres. L'equipu anfitrión yera primeru dempués les siete carreres d'aniciu, momentu cuando Espora se fixo col primer puestu que nun soltaría.

Paez que la circunstancia de qu'un equipu tenga pocos xugadores facilíta-y l'algamar el triunfu. Yá se viera l'añu pasáu en La Villa cola Camaretá. Quiciás tenga que ver la continuidá nel llanzamientu del machorrador, que nun llega enfriar ente tirada y tirada. O quiciás seya qu'esti entra nuna dinámica de bonos resultaos que desmoralicen a los contrarios. Seya como seya, Sergio garró los dos puntos quince vegaes y solo dexó de puntuar n'ocho ocasiones, faciendo la puntuación récord esti añu: 36 puntos de carrera. Pero, ensin posibilidá de puntuar na xeneral, el so concursu yera más bien una torga pal restu los equipos, que sí lluchaben polos puntos y que víen, ñerviosos, que nun subíen pal marcador de so.

Nel ecuador de la partida diéronse dos momentos curiosos, que falen de la calidá de los dos xugadores protagonistes. Por una parte, na carrera 15, Toño conseguía encastrar dende'l puntu d'iniciu el liriu, pero la proeza vióse cortada poles desplicaciones de que nun se podía considerar encastráu pola mor de que nun yera esti el primer güelpe de la so carrera. Como diz el puntu 6 del "Sistema compatitivu" del alcuerdu reglamentariu del CNL "Otórgase 1 puntu de carrera extra al equipu del xugador qu’algame un “encastráu” (introducir el liriu del primer güelpe)." Asina, tolos presentes entendimos que daquel machorrazu merecía un mayor premiu que los simples puntos de carrera algamaos, polo que sedrá una tema a tratar en siguientes conceyos. Enteráu de la regla Aarón, de la Camaretá, brindómos una curtia pero magnífica carrera 16, encastrando d'un primer güelpe maxistral y llevando trés puntos de carrera (los dos d'encastrar en primeru y l'extra).

La igualdá caltúvose hasta la última entrada, camudando nos parciales l'equipu que diba en frente de la llucha polos puntos. A falta de diez carreres, la Camaretá diba a la tiesta con un puntu sobre Sidrones. Cinco carreres dempués, la situación yera xusto la contraria. Por embaxo, a un par de victories, Quirinal y Asturliriu Homes. Descolgáu quedaba l'equipu d'Asturliriu Muyeres, que paecía reservase pa la competición qu'habría llegar dempués.

Asina, a la última carrera, la Camaretá y los Sidrones llegaben con 15 puntos, por 14 de Quirinal y 12 de Asturliriu Homes. Una victoria nella, diba suponer un cambiu na clasificación definitiva. Pero volvió a encastrar primero Espora, qu'amás yera últimu turnu de la ronda. A falta d'una ronda, el resultáu taba en manes de Aarón y de Lili de Sidrones y, n'ultimu casu, d'Arturo de Quirinal. Aarón algamó'l puntu que, xunto al extra del encastráu, dába-y los 16 de carrera y el segundu puestu na partida (pero los sietes puntos de partida). Lili nun yera quien a meter el so liriu y dexaba al so equipu con 15. Arturo, debutante na competición, pero con una ganes de deprender y pasalo bien tremendes, estrelló'l liriu escontra'l castru y esti rebotó, quedando montáu na estructura, pero tocando por fuera. Asina, Quirinal quedaba na cuarta posición con 14. Les seiciones d'Asturliriu quedaron quinta, los homes, y sesta, les muyeres.

Esti resultáu daba un vuelcu trescendental na clasificación, subiendo l'equipu de Noreña del tercer al primer puestu. Segundu, Asturliriu Homes, empatáu a puntos con Quirinal Liriu Sport, pero con mayor númberu de puntos de carrera. Cuartu, el desaniciáu Espora. Sidrones, ye quintu. Y zarra la clasificación Asturliriu Muyeres. Pero índa queden trés partides, polo que la competencia ta por decidir y, viendo lo igualao de les fuercies, promete solucianase mui tarde.

L'abiertu.

Los Sidrones propunxéronmos un nuevu abiertu, el de la botella, que tenía por recompensa dos prestoses botelles de sidra decoraes a mano por Lili, machorradora del equipu.

21 xugadores se decidieron a xugar pero, otra vuelta Javi d'Asturliriu se fizo col primer puestu, no que vien siendo un vezu esta temporada 2011, que nun conoz otru ganador d'abiertos diferentes. La capacidá de competición del castrillonés nesti tipu de trofeos ye almirable y lo que n'otros pue calificase de bona suerte, n'elli hai que reconocer que se trata de saber facer.

Esti abiertu desfízose en semifinales de Sergio d'Espora, que sobresaliere na partida. Y na final, nun duelu a cara perru, de la so muyer, Tere d'Asturliriu Muyeres (que venciere a la so compañera d'equipu Luisa, desendolcando dambes un xuegu bien granible, que paecieren escaecer na partida por equipos), resolviéndola por 2-1.

Javi y Tere (a los llaos) colos trofeos diseñaos por Lili (en mediu).

Clasificación individual.

Los 10 puntos individuales de la partida volvió a llevalos Sergio d'Espora. con un prmediu un pocoñín más baxu que los anteriores, pero tamién ye cierto que la dificultá yerá entá mayor, pasando de xugar siete y once carreres, respeutivamente, a treinta. Caltener los númberos falen de la regularidá del xixonés. Pero lo mesmo falen de Toño de los Sidrones y d'Aarón de la Camaretá, segundu y terceru de la competencia del tendayu. El veteranu Javi d'Asturliriu algamaba'l mesmu resultáu que'l debutante Arturo de Quirinal, cuatros. Y zarráronse los puestos que puntuaben col cuádruple empate nos trés puntos de la sesta posición ente Hevia de Quirinal, Falo d'Asturliriu Homes, Xosín de la Camaretá y Luisa, d'Asturliriu Muyeres.

L'abiertu apurría-y a Javi cinco valiosos puntos; a Tere d'Asturliriu Muyeres, trés; a Sergio, dos; y a Luisa, tamién d'Asturliriu Muyeres, ún.

Aarón, pol so encastráu, sumaba a los seis puntos de la partida otru estra.

Sergio fai un pocoñín mayor la distancia ente elli (33 puntos) y Javi (28), el so persiguidor. Toño con 19, Xosín de la Camaretá con 13 y Tere d'Asturliriu con 11, cierren los cinco primeros puestos.

Mayores con marcha.

Esta ye una de les iniciatives del ayuntamiento de Xixón pa atender pol ociu y el tiempu llibre de los nuestros mayores. Independientes ente sí, Mayores con marcha y el CNL alcontráronse nel Muséu del Pueblu d'Asturies y la esperiencia foi mui bona por dambes partes. Val que los machorradores tuvieron que guardar pola seguridá de los señorinos que pasaben, unos más despistaos qu'otros, pol mediu la pista cuando taben xugando y val que los mayores tuvieron qu'esperar a que finara l'abiertu pa qu'escomenzara'l baille. Pero toes eses torgues yeren poques: munchos d'aquellos que taben xintando nel práu y nes grades xugaren de pequeños al liriu (o la variedá del so pueblu) y prestó-yos pola vida ver que daquel xuegu de la infancia nun se perdiera nel escaezu; pa nosotros, el sintir los sos comentarios y alcordances pagónos la pena l'esfuerzu de facemos pasar por fuercies del orde públicu en cadena humana.

Milagros Robles preparándose pa golpiar la so "billarda".

Pero d'ente toes aquelles persones que s'averaron a nos pa recordar, quedámonos cola vitalidá de la lleonesa de Valderas, Milagros Robles, que mos pruyó, al acabar l'abiertu, pa que-y dexáramos un liriu y una machorra. El primer intentu nun foi buenu, porque diera'l güelpe mui fuerte y saltó'l liriu muncho; el segundu, más seliquín, malpenes lu llevantó; pero al terceru, Milagros solmenó tal machorrazu qu'aventó'l liriu a más de 20 metros. "A que no está nada mal para no haber jugado en 70 años", nos espetó con una sorisa na cara que nos val pa garrar más ganes de siguir cola nuestra empresa de promoción d'esti xuegu.

5 de mayu de 2011

2011-05-15T14:30:00.000-07:00

Semeyes tiraes mientres la tercera xornada del Campionatu d'Asturies de Liriu 2011, nel tendayu del Muséu del Pueblu d'Asturies.

Lilian (Sidrones), preparada pal saque.

Sergio, d'Espor[a], sacando.

Lili, de los Sidrones, a puntu d'encastrar.

El convite preparáu polos Sidrones.

Sergio, nun tiru a media distancia.

Ferrer, d'Asturliriu Muyeres mientres l'abiertu la Botella.

Javi, d'Asturliriu Homes, arincando la so carrera contra Xosín, de la Camaretá (de pie, cola camisa del Sporting).

Tere, d'Asturliriu Muyeres, énte la mirada d'Enrique y de Joni.

Aarón, de la Camaretá. Robló'l primer encastráu de la temporada 2011.

Tere, finalista del abiertu, xuanto a Lili, na entrega la botella col trisquel plateáu.

Javi, ganador del eventu, con Lili de los Sidrones que-y da la botella del triques doráu.

Finalistes ya organización.

Javi, d'Asturliriu Homes, col troféu. (¿Abriralu?)

La entrada 50

2011-05-08T13:18:00.001-07:00

¡Esta ye la entrada 50 d'esti blogue! 50 hestories dende va yá casi trés años d'esistencia del CNL. Y cellebramos esti aniversariu falando de cómo vamos algamando los oxetivos que mos punximos de la qu'escomenzamos: recuperar y esparder el xuego del liriu n'Asturies.

Espardiendo porque, nes últimes selmanes, escolinos de diferentes colexos asturianos pudieron xugar al liriu nos sos patios. D'una parte, Toño Argüellles, xugador de los Sidrones y profesor d'asturiano nel colexu Manuel Álvarez Iglesias de Salinas, en Castrillón, llévo-yos a los sos neños dalgunos xuegos tradicionales pa que conocerien tamién la bayura cultural d'esti país. Por otra, al traviés de la empresa de servicios educativos y d'ociu y tiempu llibre Escuelactiva, patrocinadora del equipu Espor d'Asturies, l'Atenéu de La Calzada de Xixón entamó una actividá de xuegos tradicionales dientro de les XVI Xornaes de Llingua y Cultura Tradicional Asturianes; durante les dos mañanes nel colexu l'Atalía y el Gracía Lorca, desfilaron más de doscientos guah.es del barrio (d'estos dos colexos y del Príncipe de Asturias, d'El Lloréu y de Santa Olaya). Los escolinos xugaron y esfrutaron coles carreres de panoyes, el dexabolu, la tarusa, el culo, el tiru al palu y, sobre too, el liriu.

Y recuperando porque, otra vuelta, nos citamos pa una nueva xornada del Campionatu d'Asturies de Liriu. L'equipu de los Sidrones llámanos a participar nuna tercera xornada y nun Abiertu de la Botella (como buenos "sidrones") a disputar nel Tendayu que facilita'l Muséu del Pueblu d'Asturies de Xixón, institución que se ta convirtiendo nun de los principales collaboradores del Conceyu Nacional de Liriu.

Domingu 15 de mayu
3ª Xornada del Campionatu d'Asturies de Liriu
Inscripción na partida a partir de les 11:00
Escomienzu a les 11:15
I Abiertu la Botella
(Válidu pal II Campionatu d'Asturies de Liriu Individual)
Acabante la partida oficial (12:45)
Muséu del Pueblu d'Asturies
Xixón

Por último, recordar qu'esta entra númeru 50 coincide cola fin de la Selmana de Lletres Asturianes, cellebración que nun podía ser escaecida pol Conceyu Nacional de Liriu nel so compromisu col idioma y la cultura asturiana. Dende equí vamos a siguir usando la llingua, que ya le meyor forma de caltanela y esfrutala. Llingua y liriu formen una pareya insepartable. ¡A falar y a xugar tol añu!

Abondo de lirios, lluvia y picadillu en Noreña.

2011-04-26T22:02:00.000-07:00

El domingu 24, el Conceyu Nacional de Liriu averóse a Noreña pa disputar la segunda xornada del Campiontau d'Asturies de Liriu 2011, nun eventu organizáu pola Camaretá de Liriu de Noreña, cola collaboración de la Asociación Folklórico Musical "Villa y Condáu de Noreña".

Cambiu de sitiu

La idega de repitir la xornada noreñense de la temporada anterior prometía que l'eventu diba a ser espectacular: el paséu de Frai Ramón, arteria principal de la villa condal, cortáu pal xuegu, nun de los díes patronales del conceyu. Ensin embargu, la mañana ñació lloviendo y les ñubes caltuviéronse nel cielu tola tarde. La organización de la xornada improvisó un nuevu tarrén de xuegu, pa evitar la suspensión de la mesma, asitiando la partida dientro del antiguu mercáu d'abastos, al pie la torre'l reló, onde s'alcuentra la see social de l'Asociación.

Esti cambiu bien fue decisivu pa la competición: pasóse de xugar al aire llibre a facelo embaxo cubierta y d'un tarren pindiu y llargu a ún llanu y mui curtiu, fechu que, sumáu a lo resbalizo'l suelu, procuró qu'un bon númberu de primeros güelpes acabaren topetando escontra la paré del fondu. Los miramientos nestos güelpes de salida, p'averar el liriu lo más posible al castru ensin pasase, ficieron que nun se diere dengún encastráu, como s'esperaba d'un principiu.

Tarrén de xuegu na antigua plaza d'abastos.

Partida

Dempués de les inscripciones, per primer vez, de los seis equipos en competencia y de la delimitación del tarrén, escomenzó la partida a 30 carreres, colos siguientes participantes:

Sidrones: María, Paula, Lili y Toño.
Quirinal: Hevia, Pintu y Juan.
Asturliriu Homes: Falo, Javi y Enrique.
Asturliriu Muyeres: Tere, Luisa y Ferrer.
Camaretá: Felipe, Abel, Dani y Xosín.
Espor[a]: Luis, Luis Carlos y Sergio.

La Camaretá, que partía como favorita al ser líder, empatada con Asturliriu Homes, y organizadora del eventu, nun escomenzó bien, nun atopando los primero puntos hasta la décima carrera. A eses altures, Espor[a], de la mano de Luis, Sergio y Luis Carlos algamaba 9 puntos y destacábase respeuto al resto d'equipos, que dengún nun superaba los 4.

Ausente Luis dende la carrera 11, Espor d'Asturies foi un mano a mano ente Sergio y Luis Carlos, que sofitaron la so ventaya hasta últimu momentu, consiguiendo 25 puntos de carrera.

Solo en determinaos momentos Quirinal amenazó al equipu uvieín, pero les diez caberes carreres nun foron tan brillantes como les primeres pa los avilesinos y tuvieron quedar cola segunda plaza, nun ensín torgues: los Sidrones, de la mano de Toño, apaecíen na última carrera empataos na segunda posición, pero mientres Juan de Quirinial llevaba dos puntos, Lili de Sidrones solo pudo facese con ún.

Por detrás, pero mui de cerca, Asturliriu Muyeres, con una increyible Tere, desfacía l'empate cola otra seición del futuru club, con dos puntos (encastró al empar con Sergio y Juan).

La sorpresa diéronla los dos ganadores de la anterior xornada, Asturliriu Homes y la Camaretá, qu'ocuparon les dos últimes posiciones, quiciás pola ventaya d'estos equipos nel xuegu llargu.

La puntuación final quedó con Espor d'Asturies, primeru con 25 puntos; Quirinal, segundu con 17; terceru, Sidrones, con 16; Asturliriu Muyeres, cuartu, con 14; Asturliriu Homes, quintu, con 12; y sestu, Camaretá, con 10.

La clasificación provisional del Campionatu dio un vuelcu granible, esnalando Espor[a] hasta'l primer puestu, con 11 puntos de partida, al superar a Asturliriu Homes, segundu con 9 y la Camaretá, terceru con 8. Quirinal ye cuartu colos mesmos 8 puntos de partida, pero menos puntos de carrera (26 a 36). Asturliriu Muyeres ta nel quintu llugar, con 5 puntos. Y cierra'l llistáu los Sidrones, con 4 puntos.

Abiertu'l Picadillu de Noreña

Acabante la partida, como siempre, escmenzó el segundu Abiertu'l Picadillu de Noreña. El nome nun ye gratuitu: la fiesta de San Marcos, pesie a la coincidencia col domingu de Resurreción, cellébrase en Noreña al rodiu del picadillu y el sabadiegu. Y tolos miembros del CNL que s'averaron al mercáu d'abastos, pudieron dar buena cuenta, mientres el trescursu la xornada, d'esos placeres gastronómicos. (Faláronse de dos nueves especialidaes de liriu: la de en pista curtia y la de a una mano)

Xosín, de la Camaretá, prauticando'l "liriu a una mano".

28 participantes ficieron d'esti abiertu ún de los más bayurosos. Pero los xugadores más destacaos fueron los semifinalistes Ferrer (Asturliriu Muyeres), Hevia (Quirinal), Toño (Sidrones) y Javi (Asturliriu Homes). Javi y Toño desficiéronse pela vía rápida, respeutivamente, de Ferrer y Hevia pa pasar a la final que, como pasara nel anterior abiertu n'Illas, llevara Javi con autoridá, otra vuelta.

Campionatu Individual

La igualdá que carauterizó la partida tamién tuvo reflexu nos cómputos individuales: na menos que cinco machorradores algamaron 1 puntu con un cociente de 0,25. Tamién hubo empate na segunda posición, ente Tere, d'Asturliriu Muyeres, y Toño de Sidrones (anque hai que dicir que la primera disputó más carreres), que llevaron la metá de los puntos disputaos. Solo Sergio, d'Espor[a], tuvo un cociente superior a metá (63%), polo que llevó los 10 puntos en xuegu.

Al vencer nel abiertu, Javi llevó los 5 puntos. Toño, segundu, llevó 3. Y los semifinalistes: Hevia, 2 y Ferrer, 1.

Toño y Javi, finalistes del abiertu.

Cola so regularidá nes tirades por equipos (nes dos xornaes foi el meyor na partida), Sergio algama la primer posición, con 21 puntos, con trés puntos de ventaya sobre Javi, que ye'l más competitivu nos abiertos, con dos victories de dos posibles. El buen facer de Toño, segundu na partida y nel abiertu, súbelu hasta la tercer posición con 11 puntos, pesie haber disputao namás estos dos eventos. Xosín, de la Camaretá, con 10, ye cuartu. Y Tere, colos 8 de la segunda plaza na última partida, queda quinta nuna llista que yá presenta 18 xugadores.

Prósima xornada.
A falta de confirmación de la direición, podemos adelantar que'l prósimu eventu va ser organizau pol equipu de los Sidrones el domingu 15 de mayu, sobre les 11 de la mañana, nel tendayu del Muséu del Pueblu d'Asturies, qu'inda vuelve a collaborar col mundiu'l liriu.

Segunda xornada en Noreña

2011-04-18T14:07:00.000-07:00

El prósimu domingu, el quioscu de música de Noreña va ser espectador d'esceición de la segunda xornada del Campionatu d'Asturies de Liriu, como lo fuere tamién nel 2010, n'aquel espectacular alcuentru de liriu na cai.

La Camaretá de Liriu de Noreña, virtual líder de la clasificación xunto a la seición masculina d'Asturlirio, va organizar la xornada nel paséu de Frai Ramón, na villa noreñense. La partida oficial escomenzará a les cinco de la tarde (un cuartu d'hora enantes abriránse les inscripciones de los equipos). Acabante la mesma, cálculase que pa les seis y media, va facese'l sortéu previu al II Abiertu'l Picadillu de Noreña.

Pista de xuegu nel paséu Frai Ramón, l'añu pasáu.

Pesie a la coincidencia col partíu'l Sporting a la mesma hora y ser día de regresu de vacaciones, les fiestes del picadillu que se cellebren na villa condal sofiten la idega de que l'ésitu de públicu pue ser paecíu al del añu pasáu. Dende'l CNL tamos seguros que vien de xente s'allugará a la rampla u los lirios esnalaran el domingu.

¡Esperámosvos!

Domingu 24 d'abril
2ª Xornada del Campionatu d'Asturies de Liriu
Inscripción na partida a partir de les 16:45
Escomienzu a les 17:00
II Abiertu' Picadillu de Noreña
(Válidu pal II Campionatu d'Asturies de Liriu Individual)
Acabante la partida oficial (18:30)
Paséu de Frai Ramón
Noreña

El liriu, de vuelta n'Illas

2011-03-29T14:16:00.000-07:00

Esti caberu domingu, la pista de les escueles de La Caizuela fueron l'escenariu onde se punxo en marcha el III Campionatu d'Asturies de Liriu, al empar que'l II Campionatu d'Asturies de Liriu Individual, cola partida oficial por equipos y el II Abiertu de La Caizuela – Quesu La Peral.

Equipos

Presentáronse fiches pa la participación de seis equipos distintos, pero non los esperaos.

L'equipu de Piyarnu dexó la so separtación del de Quirinal pa prau, sofitando la so decisión na debilidá que se diba creyar en dambes partes. Asina, Hevia y les fiches del equipu de Castrillón van formar parte del equipu avilesín esta temporada, pero col compromisu de mantener la fecha de primeros de xunetu, con xornada, abiertu'l Pitu Caleya y concursos d'encastráu y distancia, amás de talleres pa guah.es mientres les fiestes de la so parroquia.

Pela so parte, el decanu Asturliriu, ensín dexar de tener una identidá única, presentó dos equipos, un femenín y otru masculín. La posibilidá de presentase esti añu al Campionatu d'esta mena yá fuera adelantada nel conceyu d'Avilés, onde s'aprobó l'alcuerdu pa la celebración del III Campionatu d'Asturies. L'altu númberu de machorradores que presentaben a cada partida, facía que caún xugara mui poques carreres. Asina, con dos equipos, que presenten les sos fiches a parte l'ún del otru, tolos xugadores van disputar un mayor númberu de carreres.

La nota ñegativa del eventu púnxola l'equipu de los Sidrones. La dificultá de sacar un equipu p'alantre fizo que solamente apaecieren les fiches necesaries pa inscribilu a la competencia y una xugadora, Lili. El trabayu o la preparación pa les oposiciones d'educación a les que van concurrir dellos xugadores ficieron incompatibles l'asistencia de los trés xugadores mínimos cola primera xornada. Cola promesa d'intentar asistir a cuantes puean, Sidrones apurrió estes nueves fiches que'l CNL aceutó de buena gana pa nun perder esti grupu de xente tan entregáu a la causa'l liriu cola idega de que, pa la temporada que vien y con circunstancies más afayaíces, Sidrones rexurda con too'l so potencial.

Ensin embargu, la Camaretá de Liriu de Noreña, con Xosín Pacheco a la tiesta, venció les dificultaes propies del so conxuntu. Les incompatibilidaes ente la competencia liriera y el so deber como integrantes de la Agrupación Folklórica Musical "Villa y Condáu de Noreña" nun paecen echar p'atrás a esti equipu que yá l'añu pasáu diera buenes pruebes del so buen facer. Con toles fiches en regla y la idega d'aumentar el númberu, escomiencen con ganes renovaes el nuevu campionatu.

Por último, el campión Espor d'Asturies, tamién tuvo dificultaes pa constituyir equipu. A les baxes voluntaries, como la de Carlos Suari, machorrador más granible del añu pasáu, xuntáronse nueves dientro'l club, bien por incompatibilidá col trabayu, bien por alcontrase fuera d'Asturies. Poro, salieron, de momentu, cinco fiches xustes.

Asina, van ser estos seis equipos los que disputen el III Campionatu d'Asturies de Liriu.

Partida oficial

Lili, xugadora de los Sidrones, ufiertóse voluntaria pa faer de vocera/anotadora durante la tirada, figura qu'esti añu tien una mayor repercusión, sigún les regles aprobaes nel alcuerdu.

Configuraes les llistes y comprobáu que tolos equipos teníen el númberu mínimu de fiches (índa provisionales) desixíes, escomenzó la partida oficial colos siguientes participantes:

Quirinal: Hevia, Pravia, Pintu y Pichu.

Espor[a]: Pepa, Xuacu, Sergio y Luis Carlos.

Asturliriu Homes: Enrique, Falo y Javi.

Asturliriu Muyeres: Tere, Luisa y Ferrer.

Camaretá: Aarón, Dani y Xosín.

Destacó'l nuevu sistema de puntuación, onde algamen 2 puntos los primeros n'encastrar, 1 puntu daquellos que lo faen na siguiente ronda y queden ensin ellos el restu, dio-y más rapidez a la partida, al faer les carreres más curties. Claro ta que les carines d'aquellos que quedaben a l'altura'l castru ensin posibilidá de puntuar yá, pesie a llegar en pocos güelpes, tamién yeren destacables.

Momentu de la primer carrera de la temporada, con Enrique, Aarón y Tere.

La primer carrera del tornéu llevóla Enrique d'Asturliriu Homes, por delantre d'Aarón, de la Camaretá. Pesie a la resistencia d'Espor[a] nes primeres carreres, fue síntoma de lo que diba ser toa la partida: un manu a manu ente los de Castrillón y los de Noreña, colos uvieínos detrás a curtia distancia y con Quirinal y Asturliriu Muyeres descolgaos dende un principu.

Dempués de les primeres quince carreres, la Camaretá diba en primer puestu con 13 puntos, dos por delantre d'Asturliriu Homes y cuatro d'Espora. Les muyeres d'Asturliriu llevaben 5 puntos de carrera y Quirinal, que nun puntuó hasta la carrera 11, solo 2.

A partir d'esi momentu, la igualdá na tiesta tovía fue mayor: a falt de cinco carreres, Asturliriu Homes alcanzaba a la Camaretá, a 20 tantos. Descolgáu, Espor[a] algamaba 17. Na so llucha particular por evitar el caberu puestu, Quirinal remontaba hasta los 10 puntos, superando por ún a les muyeres de Castrillón.

Les cinco últimes carreres fueron brillantes por parte de los dos equipos punteros, pa llegar a la cabera carrera cola Camaretá dos tantos por enriba nel marcador, dempués de puntuar en toles anteriores del llote. Pero surdió la figura de Javi otra vuelta, qu'algamó los dos puntos de carrera, dexando a cero al restu de contrincantes y empatando la partida a 26 tantos.

El recuentu postreru sofitaba'l resultáu, colos dos equipos, la Camaretá y Asturliriu Homes, empataos a 26. Terceru, con 21, Espora. Cuartu, Quirinal, con 12. Y Asturliriu Muyeres, quintu, con 9.

La clasificación provisional del III Campionatu d'Asturies de Liriu ta encabezada por Asturliriu Homes y la Camareta, con 7 puntos de partida; terceru, Espor d'Asturies, con 4; cuartu, Quirinal Liriu Sport, con 3; quintu, Asturliriu Muyeres, con 2; y sextu, Sidrones, con 0.

II Abiertu de La Caizuela – Quesu La Peral

Acabante la tirada oficial, escomenzó l'abiertu de La Caizuela, disputáu por segundu añu consecutivu dempués de la xornazada organzada por Quirinal.

Diecisiete machorradores lu disputaron, llegando a les semifinales Javi d'Asturliriu Homes y Luis Carlos d'Espora, pola parte d'enriba'l cuadru, y Xosín, de la Camaretá y Sergio d'Espora, pela baxa.

Luis Carlos escomenzó ganando la primer carrera, pero Javi remontó algamando les dos siguientes. Xosín, pela so parte, desfízose pela vía rápida de Sergio.

Xosín y Javi na final del abiertu.

Javi, que yá fuere resolutivu na partida por equipos, garrando los dos últmos puntos de carrera a disputar y empatando l'alcuentru, tamién ganó la final a Xosín, que nun pudo faer na énte'l rodiellu xugáu pol castrillonense.

Asina, Javi facíase col quesu La Peral de premiu d'un abiertu copáu por xugadores d'Asturliriu (l'añu pasáu ganó Falo).

Clasificación Individual

Los resultaos individuales de la partida por equipos apurrieron un par de sorpreses.

La primera, la dificultá pa puntuar fizo que baxaren los cocientes de los xugadores (puntos algamaos ente puntos disputaos), polo que solo trés machorrados consiguieron más del 50% de los puntos que disputaren.

La segunda, el fechu de que'l primer y el tercer clasificáu fueren d'Espora: Sergio, col 64% de los puntos dispuatos y Xuacu, cola metá exauta; que relegaron a los xugadores de los equipos ganadores de la partida (salvo a Javi, que foi segundu con un 55%).

Dani y Xosín, de la Camaretá, empataron na cuarta plaza. Sextu fue Pravia, de Quirinal. Y na sétima posición quedaron Aarón de la Camaretá, Luisa d'Asturliriu Muyeres y Falo d'Asturliriu Homes.

Les puntuaciones del abiertu fueron: 5 pa Javi, el ganador; 3 pa Xosín; 2 pa Luis Carlos d'Espora; y ún pa Sergio.

Asina, la clasificación individual queda con Javi d'Asturliriu na tiesta, con 13 puntos, siguíu por Sergio d'Espora, con 11 y de Xosín, de la Camaretá, con 8.

Siguiente xornada

La siguiente xornada va ser organizada pola Camaretá de Liriu de Noreña na so villa, durante les fiestes del picadiyu qu'organiza'l conceyu nel mes d'abril.

Va ser l'últimu momentu pa presentar les fiches de xugadores apuntaos polos equipos pa disputar el Campionatu, amás de sirvir pa consolidar el modelu d'anotación y vocéu de machorradores.

Esperemos que los equipos tengan menos problemes pa poder acudir con tolos efeutivos y que, al menos, se repita l'espectáculu vivíu l'añu pasáu na xornada celebrada nel paséu Frai Ramón de la villa condal.

¡Ellí nos vemos!

1ª Xornada del Campionatu 2011

2011-03-14T12:27:00.000-07:00

La primera xornada del Campionatu d'Asturies de Liriu 2011 yá tien fecha definitiva: va ser el domingu 27 de marzu, nes escueles de La Caizuela, n'Illas, a partir de les 11:15 de la mañana.
La primer fecha apurrida por Quirinal Lirio Sport pa la cellebración de la partida y l'abiertu tuvo camudase porque'l sitiu ellexíu taba acutáu pol Conceyu d'Illas pa otres actividaes culturales, anque ufiertó la so collaboración en tolo necesario pa la realización d'esta xornada y de futuros eventos.
La partida, primera a disputase col nuevu sistema de puntuación, estrenará la inscripción mediante les fiches que rexistren los xugadores de los equipos del Conceyu Nacional de Liriu, polo que s'abre la fueya de partida quince minutos enantes del escomienzu, como se decidió nel conceyu d'Avilés.
Acabante la tirada oficial, daráse pasu al II Abiertu de La Caizuela - Quesu La Peral, de llibre inscripción pa tou aquel que quiera competir.
Al final, los equipos CNL aconceyaránse pa revisar la puesta en marcha de les incorporaciones reglamentaries y pa zarrar, de forma definitiva, el calendariu de la competición.
Mui ilusionaos cola nueva temporada y los cambios del sistema, dende'l CNL invitámos-vos a toos a acompañanos n'Illas.

Domingu 27 de marzu
1ª Xornada del Campionatu d'Asturies de Liriu
Inscripción na partida a partir de les 11:15
Escomienzu a les 11:30
II Abiertu La Caizuela - Quesu La Peral
(Válidu pal II Campionatu d'Asturies de Liriu Individual)
Acabante la partida oficial (13:30)
Escueles de La Caizuela
Illas

Concursu d'encastraos

2011-03-01T13:53:00.000-08:00

OXETIVU.- Tardar el menor tiempu posible n'encastrar seis lirios.

El tarrén de xuegu tará dispuesto al rodiu d'un castru reglamentariu (80 centímetros de diámetru).
Colocaránse seis lirios en puntos asitiaos a diferentes distancies del castru: a la distancia d'un liriu (c. 20 cm); a la de dos lirios (c. 40 cm); a la d'una machorra (c. 60 cm.); a la d'una machorra y un liriu (c. 80 cm.); a la d'una machorra y un liriu (c. 1 m.); a la de dos machorres (c. 1,20 m.).
El xugador pue escomenzar por el liriu que prefiera.
El tiempu escomenzará a contar dende que'l machorrador toque'l liriu.
Los lirios nun encastraos a la primera puen ser xugaos nuevamente dende'l sitiu onde cayeron, les vegaes que-y pruyan al participante, orientándolos si asina quisiere.
El tiempu másimu de xuegu ye d'un minutu. Si el xugador nun encastrase los seis lirios nesi tiempu, tendrase en cuenta'l númberu de lirios que sí encastró.
En casu d'empate, los xugadores involucraos tirarán dende la distancia mayor, ganando quien encastre en menos güelpes.

Concursu de distancia

2011-03-01T13:09:00.001-08:00

OXETIVU.- Algamar el mayor númberu de puntos dempués de les trés tiraes.

El tarrén de xuegu (del tamañu del reglamentariu na normativa CNL) tará dividíu en 10 tramos (los seis primeros d'unos 5 metros y los cuatro caberos, d'unos 2'5 metros). Cada tramu tendrá una puntuación, siendo mayor cuanto más lloñe del aniciu tea'l tramu.
El xugador tien trés tentatives de tiru p'alloñar lo más posible los lirios del puntu d'aniciu.
El resultáu vien de la suma de les trés tiraes.
Contaráse como tirada dende'l momentu que la machorra toca col liriu, llevantándose esti del suelu o non.
Nun ye tirada válida si el liriu nun queda dientro del tarrén de xuegu, marche esti polos llaterales o pol fondu.
En casu d'empate, los xugadores invlucraos tirarán una vez nueva, ganando quien alloñe más el liriu.

Alcuerdu pa la celebración del III Campionatu d'Asturies de Liriu

2011-02-28T14:18:00.000-08:00

Sistema competitivu

El Campionatu va tener tantes xornaes como equipos representaos (n), caúna d’elles organizada y encontada económicamente por un equipu.
Encamiéntase que, empatando coles xornaes del Campionatu, s’entamen opens individuales qu’afalen la participación de xente non inscrito nos equipos del CNL, baxo fórmules lúdiques y abiertes.
Les partides sedrán a 30 carreres con tantos participantes en caduna como equipos representaos (n).
Cada equipu inscribe nel orde que quiera los sos xugadores, hasta cubrir les 30 participaciones, siempre que, polo menos, participen 3 xugadores estremaos por equipu. Tolos xugadores inscritos na competición han tar rexistraos pol equipu nel CNL, habiendo presentar la ficha correspondiente. El períodu d'inscripción ábrese 15 minutos enantes del horariu establecíu de la partida, qu'escomenzará puntual.
El primer xugador qu'encastre'l liriu conseguirá 2 puntos, como'l restu de xugadores que lo algamen na mesma ronda. Tolos que lo faigan na siguiente ronda de llanzamientos tendrán 1 puntu. Daquellos que nun encastren, finarán con 0 puntos de carrera.
Otórgase 1 puntu de carrera extra al equipu del xugador qu’algame un “encastráu” (introducir el liriu del primer güelpe).
Gana la partida l’equipu que sume más puntos de carrera. Asígnense n +1, n-1, n-2… y asina hasta n-(n-1) puntos de partida. En casu d’incomparecencia d’un equipu, nun sumará dengún puntu de partida.
La clasificación del Campionatu faise siguiendo esta xerarquía: puntos de partida, puntos de carrera, historial de puestos nes partides y historial de puestos nes carreres.

Sistema de xuegu

L’anotador/voceru noma a los n xugadores de la carrera. Éstos respeten a lo llargo de tola carrera l’orde de llanzamientu nel que fueron nomaos. Dengún xugador pue llanzar enantes de que l'anotador/voceru lu nome. Si lo fae, repite'l llanzamientu, independientemente del resultáu qu'algamara col anterior invalidáu.
Depués de llanzar, el xugador espera que pare’l liriu cola fin de conservar la posición si fuera preciso volver a ella
Nun se considera acabáu’l llanzamientu hasta que nun para’l liriu por sí solu, ensin que’l xugador puea tocalu una vez que caiga al suelu. La posición válida ye na que para’l so movimientu, independientemente de lo que fixera na so trayectoria.
Nun hai avance válidu si nun hai los dos golpeos (suelu y aire). En casu de fallu, vuélvese al llugar d’orixe.
Ye fallu que’l liriu pose fuera dafechu del tarrén acotau.
Mentanto tea nel aire, el liriu pue ser golpeáu infinites vegaes.
La carrera acaba pa un xugador cuando’l so liriu, paráu, dexa de tener contactu col área qu’arrodia’l castru.
El liriu puede orientase como quier el xugador siempre que nun conlleve avance.

Tarrén y ferramienta

El liriu tendrá, tolo más, 22 centímetros de llargor y 3 centímetros de diámetru máximu. Ha ser de madera y nun tener elementos artificiales, a nun ser una pegatina o una rotulación.
La machorra tendrá, tolo más, 4 centímetros de diámetru mayor y ha ser de madera. El cau de golpéu nun pue tener elementu artificial nengún.
El tarrén ha tener un llargor d’ente 30 y 50 m. y un anchor d’ente 15 y 25 m. Tará bien marcáu con cinta al ras, pintura o cambiu de material.
En casu de xugar nun tarrén irregular o d’herba, y siempre que tolos equipos tean d’alcuerdu, pueden usase dos lirios. Unu d’ellos val d’encontu pal principal.
El castru ye una estaya circular de 0,80 a 1,20 metros de diámetru (la lonxitú de una a dos machorres). Puede pintase en suelu, ser un círculu de lona o, inclusive, tener unos centímetros d’elevación. Tará colocáu na llinia medular de la pista a una distancia de salida equivalente al 75% del so llargor.

A mín préstame xugar

2011-02-27T16:12:00.000-08:00

Estes yeren les pallabres de Falo d'Asturlirio y les que ficieron salvar les distancies esistentes ente los equipos CNL nel primer conceyu del añu, porque quedó claro que a toos nos prestaba. A les cuatro y media de la tarde d'esti domingu 27 de febreru, nel Bar Timo d'Avilés, escomenzaba la xunta preparatoria de la Temporada 2011 del Conceyu Nacional de Liriu.

Asistieron los representantes de los cinco equipos de la temporada pasada, más el d'ún nuevu nomáu Piyarnu, surdíu nesa parroquia castrillonense y del sen de Quirinal Liriu Sport.

Discutiréronse la puesta en marcha de les propuestes falaes pol CNL nel conceyu de creyación de la Promotora de la FALA (ochobre del 2010). Decidióse dexar el tiempu que dure'l nuevu Campionatu pa creyar los clubes necesarios pala constitución de la Federación y consolidar dalgunos equipos que tan teniendo problemes d'organización interna, y ponese manes a la obra colos estatutos a partir del branu.

Con estes nueves, el Conceyu Nacional de Liriu siguirá siendo l'ámbitu d'organización, pero col calter de provisionalidá tovía más marcáu. La necesidá de contratar un seguru de responsabilidá civil y de mutua pa los participantes túvose güéi por tolos equipos como una cuestión fundamental y el retrasu nesta estaya burocrática, que'l marcu federativu tien de solucionar, ye sintida como mui perxudicial.

SISTEMA COMPETITIVU

Sicasí, como adaptación y adelantu, el Conceyu Nacional de Liriu aprobó por unanimidá la creyación d'un sistema de fiches, similar al modelu federativu, pol cual los equipos identifiquen a los xugadores nes partides oficiales del III Campionatu d'Asturies de Liriu. Asina, creyarase un rexistru de xugadores CNL, que sofite'l compromisu de los machorradores col xuegu y colos sos equipos. Esti documentu identificativu sedrá necesariu pa la almisión d'un xugador na fueya de la xornada ya implicará l'adhesión del machorrador a un equipu concretu.

Modelu de ficha.

Amás, consensuóse que cada equipu ha rexistrar un númberu mínimu de 5 xugadores pa poder participar nel Campionatu. La inscripción de xugadores tará abierta hasta l'escomienzu de la segunda xornada del campionatu, a finales d'abril.

Más difícil foi llegar a un acuerdu prestosu pa tolos miembros col númeru mínimu de xugadores que cada equipu tien d'inscribir na fueya de la xornada pa participar na xornada. En LLamorgal falóse de 3 xugadores, baxando de los 4 del añu pasáu. Pa los equipos que tienen un númberu grande y, sobre too, estable de machorradores, ye un agraviu porque, como bien dicía Falo d'Asturlirio "A mín préstame xugar", porque tien d'esperar muncho pa disputar la so carrera, mientres que los xugadores d'otros equipos con más dificultaes, cuerren más de siguío. Aprobóse al final la rebaxa, estimando que ye meyor pa la competición y pal xuegu un mayor númberu d'equipos, col enfotu de superar los sos problemes, a contar con dos equipos fuertes que dexen estancáu el procesu d'esportificación del liriu.

La inscripción de los xugadores a la partida fadráse durante'l cuartu d'hora anterior al aniciu de la partida. Cada equipu, escomenzando pol organizador del eventu, darán los nomes de los xugadores pol orde que deseye, apurriéndo les fiches de los mesmos. Dengún xugador podrá inscribise más tarde o ensín mostrar la identificación CNL.

Respeutu al sistema competitivu de les partides, mantiénse'l númberu de carreres en 30 y ensín posibilidá de reduciles. Ensín embargo, camúdase'l sistema de puntuación, por ún que favorez carreres de menos duración. Asina, sumen 2 puntos daquellos xugadores qu'encastren primero, 1 puntu daquellos que lo faigan na siguiente ronda y 0, los que queden ensín encastrar.

Amás, establezse dafechu la figura del Anotador/Voceru. Va ser miembru del equipu organizador de la xornada (puen ser dos, en casu de que'l primeru participe na partida). Encargaráse d'inscribir a tolos xugadores na fueya de la xornada; glayar l'orde de xuegu de los machorradores en cada carrera, amás d'avisar que tean preparaos los de la siguiente tirada; dar el permisu de tiru al xugador que-y correspuenda, pa evitar que l'orde de la carrera camude; anotar los resultaos de cada carrera y los finales; y asegurase de qu'ún representante por equipu robla la ficha. El Anotador/Voceru nun tien atribuciones d'arbitraxe y les sos opiniones nun tendrán rangu sancionaor.

Especial mención se fizo al fechu de mantener siempre'l turnu de xuegu durante la carrera. Decidióse que siempre qu'un xugador s'adelante al permisu'l voceru, tenga que repitir el tiru.

Por últimu, fáise regla que les decisiones arbitrales seyan entamaes polos propios xugadores de la carrera. Solo ellos tendrán la capacidá de debatir sobre cualquier fechu duldosu (zarrapastrones, encastraos, salides del tarrén...), siendo necesarios trés votos en sentíu a repitir la xugada.

CONCURSOS

Aprobóse la propuesta d'Espor[a] introducir xunto a los abiertos que nun fueren asociaos a xornaes, los concursos d'encastrar y de distancia que se probaron nel II Alcuentru Xixón de Liriu, en xineru de 2011.

D'esta forma, les actividades de cada encuentru quedaríen más equilibraes en cuanto a tiempu, favoreciendo'l desplazamientu de la xente que tendría más posibilidaes de participar nel eventu. (L'añu pasáu, nos abiertos independientes, los xugadores qu'acudíen podíen quedar eliminaos na primer carrera y nun tener posibilidá de xugar más)

CALENDARIU

Finalmente, decidióse faer un calendariu d'actividaes, con al menos un eventu al mes. El Campionatu d'esti añu tendrá seis xornaes, entamando la primera Quirinal Liriu Sport en La Caizuela, el 20 de marzo a les 11:30 hores, cola partida y el II Abiertu de Liriu de La Caizuela.

La Camaretá de Liriu de Noreña organizará la segunda n'abril; los Sidrones, la tercera, en mayu; Espor d'Asturies, la cuarta, en xunu; y en xunetu, les dos últimes a cargu de Piyarnu y d'Asturlirio. Les feches, horarios y sitios definitivos apurriránse nun conceyu a cellebrase dempués de la primer xornada n'Illas.

Lirios na rede

2011-02-08T14:48:00.000-08:00

Dende'l primer momentu, el Conceyu Nacional de Liriu tuvo n'internet un perfectu aliáu pal so llabor de caltenimientu y recuperación del nuestru xuegu, porque les múltiples característiques y ferramientes que presenta la rede faen muncho más afayaíza la xera del espardimientu de los proyeutos, los eventos y les noticies qu'esti movimientu bien xenerando.

Esta selmana pasada, el liriu encastró de nueves na rede gracies a una anicitiva propia y a otra que nos toca de ceo y de la que ya falamos equí: el premiu al Meyor Blogue n'Asturianu del añu 2010. Vamos por partes.

Dempués de faer los perfiles en Youtube y en Facebook, creyáronse varies entraes na Uiquipedia, enciclopedia llibre y virtual n'idioma asturianu, pa collaborar con esti trabayu fonderu tan importante p'asitiar la nuestra llingua nel mapa. Pero amás, va valir p'apurrir a daquelles persones que s'interesen de nueves pol xuegu información fiable y procedente de nos. Liriu, Conceyu Nacional de Liriu, Copa Cantábrica y Campionatu d'Asturies de Liriu foron dalgunes de les entraes subides, amás d'información relativa a caún de los cinco equipos que componen el CNL. Amás. llibertáronse de los drechos de dalgunes semeyes propies del Conceyu, pa daquien-y pruya usales. Anque tovía nun ta'l trabayu fináu (nin finará como'l liriu siga esnalando), el siguiente pasu va ser tornar estes entrades al español y al inglés, pa introducir el liriu nes más xeneralistes es.wikipedia y en.wikipedia.

Pero si la noticia cabera ye importante, mucho más prestosa ye la siguiente: esti blogue del Conceyu Nacional de Liriu algamó'l premiu al Meyor Blogue n'Asturianu del 2010 según los llectores, col 20% de los votos. La movilización de la xente del liriu dio los sos frutos y más de cien persones decidieron entrar na páxina de les votaciones pa faer clic nel botón del CNL. Esti sábadu 12 de febreru a les 5 de la tarde, na Casa de Cultura de La Pola Siero, va cellebrase el III Sidra&Blogues, eventu col que se cellebra la nueva edición del concursu y se toma pulsu a l'actualidá de la rede n'asturianu. Acabante l'actu, y como nun podía ser d'otra mena, la xente allugarase al chigre polesu Abre César pa facer una espicha.

Dende'l CNL queremos agradecer a la organización del premiu l'interés del so proyectu, que da lluz al llabor de munches persones que faen del asturianu llingua d'usu cotidianu en toles estayes de la vida, y la oportunidá de participar a la so vera. Taremos presentes en La Pola pal III Sidra&Blogues. Llámanos enforma pol nuestru compromisu pa cola llingua y pol presto de recibir un premiu bien guapu ya interesante.

Xineru de liriu

2011-01-24T14:21:00.000-08:00

Escomenzamos esta temporada 2011 con un tastu agridulce. Porque l'eventu'l dmingu y la nominación al meyor blogue son noticies mui buenes, pero la tristura pola muerte d'un pa nun ye complicao de superar: solo'l tiempu y el sofitu de la xente que te quier axuda. Dende equí, Javier, queremos unviate tol ánimu y el cariñu de la familia'l liriu, de la que tú yes, por méritos propios, ún de los miembros más queridos. Que to pa descanse en paz. Yá tenemos ganes d'abrazate.

Eventu en Xixón.

Como yá adelantáremos na primer entrada del añu, el domingu 23 Espor[a] organizó, nel Muséu del Pueblu d'Asturies , el II Alcuentru Xixón de Liriu. La terrible mañana de fríu y lluvia acabó por rescamplar y los valientes que s'averaron al tendayu del equipamientu cultural xixonés pudieron esfrutar d'una mañana protagonizada pol liriu.

Espor d'Asturies quería introducir un par d'actividaes que permitieren averar el liriu a la xente, amás de conseguir que daquellos que se desplacen a los abiertos salgan contentos d'aprovechar el tiempu xugando al liriu. Si daqué falló na temporada pasada yera ver les cares de los xugadores eliminaos na primer ronda d'un abiertu, ensin posibilidá de siguir xugando. Como'l formatu d'abiertu cuayó, la solución paecía tar n'apurrir nuevos xuegos. Y, polo visto'l domingu, paez que prestaron abondo.

Álex, n'un de los primeros intentos de güelpéu.

Primero probóse'l Concursu de distancia. Yá desplicáramos que se trataba de mandar tres lirios lo más lloñe posible, puntuando sigún onde estos pararen nun tarrén delimitáu previo en diez zones. Prestó enforma a los dieciséis participantes, tanto que se pidió una segunda ronda por aclamación. Al final de les dos tandes, disputóse una final colos dos ganadores, Pepa d'Espor[a] y Xosín de la Camaretá, venciendo esti por 11 a 9.

Xosín, de la Camaretá, ganador del Concursu de distancia, xunto a Balvo.

Pasóse dempués al Concursu d'encastraos. El conceptu desti xuegu ye daqué más complicao y la práctica ye muncho más técnica. N'un minutu de tiempu, el participante tien qu'encastrar seis lirios, dimpuestos n'espiral a distancies diferentes (20, 40, 60, 80, 100 y 120 centímetros) alredor del castru. Toos los xugadores xueguen colos mesmos lirios y ye decisión d'ellos la estratexa de xuegu (dende liriu pol qu'escomenzar, hasta l'enfotu por un liriu determináu que nun acaba entrar). Los catorce machorradores que decidieron disputar el concursu pudieron comprobar lo estresante que pue resultar lluchar contra'l tiempu nun xuegu onde la pausa y la preparación ante cada güelpe ye indispensable. Asina, solo cinco consiguieron faer plenu: Xosín (55"89), María (37"64), Sergio (36"82), Dani (27"33) y Toño, que venció con un tiempu de 25"22.

Toño, de los Sidrones, col títulu del Concursu d'encastraos, con Sergio.

Una vez ensayáu'l tiru a llarga y a curtia distancia, yera'l momentu afayaízu pa'l II Abiertu Xixón de Liriu, disputá a tres mangues ensin desempates, lo que valió p'acabar con una final a trés ente Xosín de la Camaretá, Sergio d'Espor[a] y Dani de los Sidrones, que s'impuso con autoridá en dos de les trés carreres posibles.

Dani, de los Sidrones, qu'algamó'l II Abiertu Xixón de Liriu, xunto a Pepa.

Les propuestes prestaron a los asistentes tanto como les bollines de Pepa o les tortiyes de la ma de Sergio, yá bautizaes como "tortiyes volantes" polo poco que duren. La sidre de baldre, la rifa de la empanada, los perrucos come-lirios y el valiente cámara de la TPA (al que-y sobrevolaron varios lirios ensín inmutase) dieron más color a la primer mañana liriera del añu.

Nominación del blogue.

Esti mes de xineru cellebrase'l concursu al Meyor blogue n'asturianu 2010, ún concursu completamente altruísta, ensin sovenciones y col únicu enfotu de faer visible'l llabor de daquellos que faen de la llingua asturiana ferramienta digna pala tresmisión de les sos idegues y propuestes.

Imaxiná-yvos la gayola al saber qu'esti blogue tar ente los nominaos, al llau de firmes como la del Xanu'l Caborniu, González y González, Fueya en blanco, Xuan Pandiella, Tapaponga, los nuestros compañeros Chus Solis y LLar 867 o TrayasgayA, aniciadores de la idega.

Hai trés modalidaes de votu: dos pa blogueros (al meyor blogue y al meyor diseñu) y una pa llectores.

Si quereis participar nun vos va llevar más d'un minutu, siguiendo estos pasos:

1.- Entra nesti enllaz:

http://votacionmeyorblogue.dyndns.org/pral/

2.- Pica onde pon "LLectores voten equí". (Si tienes blogue propiu pues inscribite na otra opción)

3.- Busca'l to blogue preferíu (yá puestos, el del Conceyu Nacional de Liriu)

4.- Vota.

Espublizaremos los resultaos, porque xeres d'esta mena préstenmos asgaya.

Primer eventu del añu

2011-01-17T13:26:00.001-08:00

La Temporada 2011 escomienza'l domingu 23, a partir de les 11 de la mañana, nel tendayu del Muséu del Pueblu d'Asturies col II Alcuentru Xixón de Liriu, organizáu por Espor d'Asturies.

L'alcuentru consistirá de trés partes pa esfrutar d'esti sitiu tan afayadizu'l mayor tiempu posible xugando al liriu.

Escomenzará sobre les 11 y media con un concursu de distancia, pa comprobar si les fuercies de los machorradores se vieren amenorgaes dempués de les festividaes navideñes. Los participantes golpiarán trés lirios dende un puntu d'aniciu común pa toos. El tarrén dividiráse en diferentes zones, que tendrán distintes puntuaciones sigún la distancia al aniciu. Ganará'l xugador qu'algame más puntos.

Acabante esti, otru concursu, esta vez d'encastraos, pa poner a prueba l'habilidá de los asistentes. L'oxetivu sedrá encastrar seis lirios dispuestos al rodiu'l castru nel menor tiempu posible, ensín superar el minutu de duración.

L'eventu finará col II Abiertu Xixón de Liriu, tornéu a disputar col sistema tradicional.

Estes pruebes, como siempre, tarán abiertes a toos aquellos que quieran participar, dende los machorradores con mayor esperiencia hasta los que descubran por casualidá esti xuegu al averase al muséu nuna mañana de domingu.

¡Tais toos convidaos!

II Alcuentru Xixón Liriu
23 de xineru - 11:00 h
Muséu del Pueblu d'Asturies
(Xixón)

11:00 h. Apertura del alcuentru.
11:30 h. Concursu de distancia.
12:00 h. Concursu d'encastraos.
12:30 h. II Abiertu de Liriu de Xixón.

Abiertu Navidá

2010-12-28T12:33:00.000-08:00

La Plaza d'Europa de Piedrasblancas fue'l sitiu onde se disputó'l II Abiertu de Navidá de Liriu, el domingu 26 de payares.

Esti eventu, que cerraba la temporada de liriu 2010, axuntó a nueve machorradores, que se dividieron en tres grupos. Les carreres puntuábense con 3, 2 y 1 puntu, sigún foren primeru, segundu y terceru. El meyor dempués de tres carreres, pasaba a la final. Asina lo ficieron Sergio d'Espor[a], Toño de Sidrones y Juan de Quirinal (dempués de defacese del so compañeru Hevia nun desempate).
La final tuvo mui emocionante y la plaza enllonóse de xente curioseando sobre qué yera aquello que facíen aquello mozos. Hevia, organizador del eventu, vestíu como un paisanu d'aldea, repartía piruletes ente los críos. Y los gaiteros y tamboriteros de la Camaretá poníen la nota musical nuna soleada pero fría mañana de domingu.

Sergio ganó la primer carrera, por delantre de Toño. La segunda, más igualada, finó col empate ente estos dos, dexando descolgáu a Juan, con dos puntos. Pero esti llevaría la tercer carrera y los nervios apoderáronse de Sergio y Toño, que tardaron los tres güelpes permitíos n'encastrar, empatando nuevamente, lo que-y dio'l triunfu al esporu por 7 puntos. Toño algamara 6 y Juan, 5.

D'esta miente, Sergio volvía a facese col títulu caberu del añu, como la temporada pasada, y con una bayurosa cesta de productos de Vallina, que de xuru va dar buena cuenta d'ellos estes fiestes.
Finó la temporada 2010. Na mirada, el futuru, col proyeutu de creación de la FALA, la configuración del calendariu de pruebes pal 2011 y una nueva cita, yá pa xineru: el II Alcuentru de Liriu de Xixón, organizáu por Espor d'Asturies.
El Conceyu Nacional de Liriu espera qu'esti 2011 sea tovía meyor qu'esti, col recuerdu pa toos aquellos que sofitaron el nuestru sueñu de facer del liriu un espor al alcance de toos.

¡BON AÑU 2011!